1 Lyuŵa limo che Sansoni ŵajawile musi wa ku Gasa, kweleko ŵasimene ni jwankongwe jwakulaŵalaŵa, ni ŵagonile najo. 2 Ŵandu ŵa musi wa ku Gasa ŵamanyilile kuti che Sansoni ali kweleko, ŵasyungwile pamalo po ni kwalindilila pa nnango wekulungwa wakwinjilila mmusi chilo chose. Ŵateminji jii chilo chose achitiji "Tulindilileje mpaka kucheje, ni tummulajeje." 3 Nipele che Sansoni ŵagonile mpaka pasikati ja chilo. Ŵajimwiche ni ŵajawile ku chikannango chekulungwa chakwinjilila mmusi. Kweleko ŵagumwile chikannango chose pamo ni njinjili syakwe, ŵanyakulile pa makoyo gakwe ni kwaula najo mpaka ku achila chitumbi chachikulolegana ni ku Hebuloni.

4 Pakumala yeleyo, che Sansoni ŵannonyele jwankongwe jwine liina lyakwe che Delila, juŵatamaga ku chiŵata cha Soleki. 5 Ilongola ŵa Ŵafilisiti ŵanjaulile che Delila ni kunsalila, "Munnyenje che Sansoni kuti ansalile chichichi chachikuntendekasya akole ni machili, ni itujile kukombola kunkamula kuti tuntaŵe ni kunlagasya. Ni uweji chitumpe kila mundu ipande ya madini ga feza elufu moja na mia moja." 6 Pelepo che Delila ŵansalile che Sansoni, "Choonde muusalile chichichi chachikuntendekasya nkole machili kwanti nyi. Mundu akukombola chinauli kumpunda ni kuntaŵa?"

7 Che Sansoni ŵanjanjile, "Andaŵaga ni singa saba syeŵisi, sya nkunje, pelepo ni patinjiŵa ni machili mpela mundu jwine jose."

8 Nipele ilongola ŵa Ŵafilisiti ŵannyichisye che Delila singa saba syeŵisi, sya nkunje, nombejo ŵantaŵile che Sansoni ni singa syo. 9 Che Delila ŵaasisile ŵangondo ŵa Ŵafilisiti mu chuumba chine ŵaŵaliji nkwajuŵilila. Nipele ŵanyanyisye achinsalilaga kuti, "Che Sansoni, Ŵafilisiti akunnyichilila." Che Sansoni ŵasikutwile singa sila nti usi wepye ni mooto. Kwayele nganapagwa juŵaimanyilile chachikwatendekasya akole ni machili.

10 Che Delila ŵansalile che Sansoni, "Mmwe muunambwisye ni kuundenda jwakuloŵela, sambano choonde muusalile, mundu akukombola kuntaŵa ni chindu chachi?" 11 Che Sansoni ŵajanjile, "Andaŵaga ni ngonji syasambano syanganisitumiche ni mundu, pelepo ni pachime ni machili mpela mundu jwine jwalijose." 12 Pelepo che Delila ŵajigele ngonji syasambano, ŵantaŵile nasyo. Nipele ŵanyanyisye achinsalilaga kuti, "Che Sansoni Ŵafilisiti akuikanga." Ni aŵala ŵangondo ŵaŵaliji nkwajuŵilila che Sansoni, ŵaliji ku chuumba chine. Nombejo ŵakutwile ngonji syo mmakono mwakwe mpela akukutula usi.

13 Che Delila ŵansalile che Sansoni, "Mpaka sambano nkuunambusya ni kuundenda jwakuloŵela. Muusalile muundu itajile pakuntaŵa." Che Sansoni ŵanjanjile, "Mwandiŵaga mabutu saba ni kuundaŵilila kumo mu ntandio wa nguo ni kutaŵilila pa mikundasi, chiime ni machili mpela mundu jwine jwalijose." 14 Che Sansoni paŵagonile, che Delila ŵantiŵile mabutu saba ni kutaŵilila kumo mu ntandio wa nguo ni kutaŵilila pa mikundasi. Nipele ŵansalile "Che Sansoni ŵangondo ŵa Ŵafilisiti akunnyichilila." Che Sansoni ŵajimwiche mu lugono, ŵaswekwile mikundasi jila ni kupapulanya ntandio wa nguo.

15 Che Delila ŵansalile che Sansoni, "Nkuti uli kuti nkuunonyela akuno nkulosya kuti ngankuusaka kwa kuunambusya? Muundesile jwakuloŵela katatu sano, nganimuusalila chachikuntendekasya nkole ni machili." 16 Che Delila ŵajendelechele kwakanganichisya che Sansoni kwa kwausyausya lyuŵa ni lyuŵa mwakuti paichile pakunsakalisya kwannope, mpaka nganakombola kupililila kwausyausya nkati chindu cho. 17 Mbesi jakwe che Sansoni ŵansalile che Delila yaili muntima mwakwe. Ŵansalile, "Umbo syangu nganisimyolekwe, pakuŵa uneji naŵichikwe pajika kwaligongo lya Akunnungu chitandilile ngunaŵe kupagwa. Namyolekwaga umbo syangu, pelepo machili gangu chigakopoche, tinjiŵa ni machili mpela mundu jwine jwalijose."

18 Che Delila paŵaimanyilile kuti che Sansoni ŵaasalile yantemela yakwe yose, ŵaaŵilasile ilongola ŵa Ŵafilisiti, ŵaasalile, "Njisangane sooni pakuŵa asalile yantemela yakwe yose." Ilongola ŵa Ŵafilisiti ŵajawile kwa che Delila ali ajigele ipande ya madini ga feza iŵalanjile. 19 Che Delila ŵannyenjile che Sansoni kuti agone pa makongolo gakwe, ni ŵammilasile mundu ammyole mabutu gakwe saba gala. Nipele che Delila ŵatandite kunnagasya che Sansoni, ligongo machili gakwe galiji gankopweche. 20 Che Delila ŵanyanyisye achitiji, "Che Sansoni Ŵafilisiti akuikanga." Che Sansoni ŵajimwiche mu lugono achiganisyaga kuti chakombole kulichenjela ni kulikulupusya mpela moŵa gose. Nganaimanyililaga kuti Ambuje Akunnungu ŵaliji ŵaalesile. 21 Ŵafilisiti ŵala ŵankamwile che Sansoni ni kunkolopola meeso, ni ŵanjigele mpaka musi wa ku Gasa, ŵantaŵilile ni magwendegwede ga shaba ni ŵanjawisye mu nyuumba jakutaŵila ŵandu, ni kweleko ŵankanganichisye apanganye masengo ga kusyaga ngano. 22 Nambo umbo syakwe syatandite kumela ni kukula sooni.

23 Ilongola ŵa Ŵafilisiti ŵasongangene kuti atende chindimba ni kuntyochesya mbopesi nnungu jwao juŵaŵilanjikwe Dagoni. Nipele ŵajimbaga yeleyi, "Dagoni nnungu jwetu atukamwisye kunkamula che Sansoni jwammagongo jwetu." 24 Ni ŵandu paŵaimanyilile iyaasime che Sansoni ŵanlapile nnungu jwao, ŵatite, "Sambano nnungu jwetu atukamwisye kwakamula che Sansoni jwammagongo jwetu juŵachijonasile chilambo chetu ni kwaulaga ŵandu ŵetu ŵajinji." 25 Ŵandu paŵasengwile kwannope, ŵatite, "Munnyichisye che Sansoni kuti atusangalasye." Nipele ŵannyichisye che Sansoni kutyochela ku nyuumba jakutaŵilwa ŵandu, nombejo ŵang'andile paujo pao. Ŵammisile pasikati ja chanamila siŵili sisyakamulile nyuumba jo. 26 Che Sansoni ŵansalile nchanda juŵaliji nkunnongosya ali ankamwile nkono, "Muumiche pamalo pati tiingombole kamulila chanamila syasikukamulila nyuumba ji kuti nyegamile." 27 Nyuumba jo jagumbele achalume ni achakongwe ŵakwe, ni ilongola wose ŵa Ŵafilisiti ŵaliji mwelemo, ni pegolofa pa nyuumba jo ŵapali achalume ni achakongwe chiŵandika ŵandu elufu tatu ali nkunlola che Sansoni ali nkwasangalalisya.

28 Che Sansoni ŵapopesile achitiji, "Alakwe Ambuje Akunnungu choonde mungumbuchile une. Muundaje machili akano pe, kuti kwa chitendo chimo chi ngombole kwauchisye Ŵafilisiti kwa kuungolopola meso gangu." 29 Che Sansoni ŵasikamwile chanamila siŵili sya mbindikati sisyakamulile nyuumba jose, nkono umo chanamila chimo ni nkono wine chanamila chaaŵili. 30 Che sansoni ŵatite, "Chimwe pamo ni Ŵafilisiti!" Ni ŵatutile chanamila sila kwa machili gakwe gose. Nyuumba jila jaagwilile ilongola wose ni ŵandu wose ŵaŵaliji munkati mula. Kwayele pakatema ka chiwa chakwe, ŵaauleje ŵandu ŵajinji kupunda aŵala ŵaŵaauleje paŵaliji jwanjumi. 31 Achalongo achinjakwe pamo ni ŵandu ŵamunyuumba ja atatigwe ŵatulwiche kukujigala chiilu chakwe. Ŵajigele chiilu cho kumangwawo ni kwaula kukuchisika pasikati ja musi wa Sola ni musi wa Eshitaoli mu lilembe liŵansichile che Manoa atatigwe. Che Sansoni ŵaliji chilongola jwa Ŵaisilaeli kwa yaka ishilini.