1 Nipele ŵandu ŵa lukosyo lwa Efulaimu ŵammusisye che Gidioni, "Kwachichi ntutesile yelei? Kwachichi nganintuŵilanga pamwajaulaga kukumenyana ni Ŵamidiani?" Ŵanyawo ŵandandaulile kwannope.

2 Nambo che Gidioni ŵajanjile, "Indu indesile une ngaŵa chindu pakuilandanya aila intesile ŵanyamwe. Aila intesile mwanya Ŵaefulaimu ili yekulungwa kuipunda aila yatesile ŵandu ŵangu ŵa ntundu wa Abieseli. 3 Akunnungu antesile mwanya mwapunde ŵele mamwenye ŵaŵili ŵa Chimidiani, che Olebu ni che Seebu. Ana une ndesile ichichi chakulandanya ni ŵanyamwe?" Che Gidioni paŵaŵechete yeleyo Ŵaefulaimu ŵatulele ni nganajendelechela kutumbila.

4 Katema ko che Gidioni ni ŵangondo ŵakwe mia tatu ŵaiche ku lusulo lwa Yolodani ni ŵajombweche, ŵaliji apesile kwannope, nambo ŵajendelechele kwakuilichisya Ŵamidiani.

5 Paŵaiche ku Sukoti, che Gidioni ŵaasalile ilongola ŵa musi wo, "Choonde mwapanje ŵangondo ŵangu chakulya, pakuŵa apesilenje kwannope ni uneji ndili nkwakuilisya mamwenye ŵa ku Midiani che Seba ni che Salimuna."

6 Nambo ilongola ŵa ku Sukoti ŵammusisye, "Kwachichi kwapa chakulya ŵangondo ŵenu akuno che Seba ni che Salimuna nganimme kwakamula?"

7 Che Gidioni ŵaasalile, "Mwambone, nambo Ambuje Akunnungu patachingamuchisya naakamule che Seba ni che Salimuna, tinjiuja pelepa, chinjimputa mwanya ni kwapalamula ilu yenu kwa miiŵa ya mmatinji ni michongwe."

8 Paŵatyosile kweleko ŵajawile ku Penueli kukwaŵenda chakulya ŵandu ŵa kweleko. Nambo ŵandu ŵa ku Penueli ŵajanjile mwakulandana ni ŵandu ŵa ku Sukoti. 9 Che Gidioni ŵaasalile, "Patinjiuja ndili naapundile mamwenye wo, tinjigumula lusonga lwenu."

10 Nipele che Seba ni che Salimuna ŵaliji ku Kalikoli ni ŵangondo ŵao elufu kumi na tano. Ŵeleŵa ni ŵangondo ŵaŵasigalile mwa ŵangondo wose ŵaŵatyochele ku ngopochelo lyuŵa, pakuŵa achinjawo laki moja ni elufu ishilini ŵaulajikwe. 11 Che Gidioni ŵakwesile achilikuyaga litala liŵapitaga ŵakusamasama, lilyaliji chakungopochelo lyuŵa kwa Noba ni ku Yogibeha ni ŵaagungumuchile ŵangondo wo mwachisisimuchile. 12 Mamwenye ŵa ku Midiani wo, che Seba ni che Salimuna ŵatolweche, nambo che Gidioni ŵaakuiye ni kwakamula, ni mpingo wose wa ŵangondo ŵa mamwenye wo ŵajinjilwe ni woga.

13 Che Gidioni mwanagwe che Yoashi ŵausile kutyochela ku ngondo achipitaga pamalo pakupita papakuŵilanjikwa Helesi. 14 Kweleko ŵankamwile nchanda jumo jwa ku Sukoti ni kummusya. Nchanda jo ŵannembele che Gidioni meena sabini na saba ga ilongola ni achachekulu ŵakumanyika ŵa musi wo. 15 Che Gidioni ŵajawile kwa ŵandu ŵa ku Sukoti ni kwasalila "Nkumbuchile pamwandukene nchitiji ‘Kwachichi kwapa chakulya ŵangondo ŵenu ŵaapesile kwannope, akuno che Seba ni che Salimuna nganimme kwakamula?’ Hayaga etu, che Seba ni che Salimuna aŵapa." 16 Nipele ŵaakamwile ilongola ŵa ku Sukoti ni kwapalamula ilu yao kwakwaputa ni miiŵa ni michongwe kwajamuka ilongola wose ŵa ku Sukoti. 17 Nombe ŵagumwile lusonga lwa ku Penueli ni kwaulaga achalume wose ŵaakutama mmusi wo.

18 Nipele ŵaausisye che Seba ni che Salumuna, "Ana aŵala ŵandu ŵamwaauleje ku Taboli ŵaonekaga chantiuli?" Ŵanyawo ŵanjanjile, "Ŵawonekaga mpela mmwe, pakuŵa jwalijose jwaonekaga mpela mwanache jwa mwenye." 19 Che Gidioni ŵaajanjile "Ŵanyawo ŵaliji achapwanga, ŵalutumbo lumo. Ngulumbila kwa Ambuje Akunnungu ŵaajumi, ngankaauleje, ni une jwakwe ngangammulaje." 20 Nipele ŵansalile che Yeteli, mwanagwe jwakwitiwo, "Njime mwaulaje!" Nambo che Yeteli nganalisolomola lipanga lyao, ŵajogwepe pakuŵa ŵaliji jwannondi. 21 Pelepo che Seba ni che Salimuna ŵatite, "Ntuulaje mwasyene pakuŵa gelega gali masengo ga mundu jwakusile." Che Gidioni ŵaauleje nsyene ni kwigala yakusalalisya iyaliji mu ngosi sya ngamia syao.

22 Pelepo Ŵaisilaeli ŵansalile che Gidioni, "Mmwe mmeje ntawala jwetu, ni patinchiwa mmwe, iŵelesi yenu atawaleje, pakuŵa mmwejo ntukulupwisye ni Ŵamidiani." 23 Che Gidioni ŵaajanjile, "Une ngaama ntawala jwenu kose namose iŵelesi yangu ngasantawala ŵanyamwe. Ambuje Akunnungu ni juchaŵe ntawala jwenu." 24 Che Gidioni ŵaasalile sooni "Ngummendanga chindu chimo, mundu jwalijose ambe ileleni yaasumwile kwa mateeka." Ŵamidiani ŵala pakuŵa ŵaliji Ŵaishumaeli ŵaliji awasile ileleni ya sahabu mmawiwi mwao. 25 Ŵandu ŵanjanjile, "Chitumpe kwakusaka kwetu achinsyene." Ŵatandiche nguo ni ŵanawose ŵaŵisile ileleni iŵasumwile. 26 Utopele wa ileleni yose iŵampele waliji mpela kilogilamu ishilini. Kupunda ni yeleyo, ŵapochele ipini ni yakuwala ya sambalau iyawalikwaga ni mamwenye wa ku Midiani, ni mikufu jijaliji mu ngosi sya ngamia syao. 27 Che Gidioni ŵajitumie sahabu jo kolosya chindu chichikulandana ni nguo jakuwala pantima jiŵawalaga ŵambopesi ŵa ku Isilaeli, ŵachiŵisile ku musi wakwe wa Ofila. Ŵaisilaeli ŵajaulaga kweleko kukuchipopelela chindu cho, ni chaliji chitanje kwa che Gidioni ni kwa ŵamu nyuumba jakwe. 28 Kwayele Ŵamidiani ŵaputikwe ni Ŵaisilaeli, ni nganiŵaasausya sooni Ŵaisilaeli. Chilambo chaliji ni chitendewele kwa yaka alobaini katema kose che Gidioni paŵaliji ŵajumi.

29 Nipele che Gidioni, liina lyakwe liine ŵaŵilanjikwe Yelubaali juŵaliji mwanagwe che Yoashi, ŵaujile kumangwakwe ni kutama kweleko. 30 Che Gidioni ŵakwete ŵanache sabini ŵachilume, pakuŵa ŵalombele achakongwe ŵajinji. 31 Sooni, che Gidioni ŵakwete chilanga kwele ku Shekemu juŵammelechele mwanache jwachilume, mwanache jo ŵammilasile Abimeleki. 32 Che Gidioni mwanagwe che Yoashi ŵawile ali achekulwipe kwannope, ŵansichile pa lilembe lya che Yoashi atatigwe ku musi wa Ofila, musi wa mtundu wa Abieseli.

33 Paŵawile che Gidioni, papopo Ŵaisilaeli ŵajiujilile inyango ya minungu ja Baali ni kujipopelela. Ŵantesile Baali Beliti kuŵa nnungu jwao. 34 Ŵaisilaeli ŵanliŵalile Ambuje Akunnungu, Akunnungu jwao, juŵaawombwele ni ŵammagongo ŵao ŵakwasyungulila mosemose. 35 Sooni, nganapanganya indu yambone kwa ŵamunyuumba ja Yelubaali, liina lyakwe liine jwaŵilanjikwe che Gidioni pa yambone yose iŵaapangnyichisye Ŵaisilaeli.