1 Katumetume jwa kwinani jwa Ambuje Akunnungu ŵakwesile kutyochela ku Giligali kwaula ku Bokimu ni ŵaasalile Ŵaisilaeli, "Nankwesisye kutyochela ku Misili ni kunjinjisya mu chilambo chinaasalile achinangolo ŵenu kuti tinaape. Une natite, ‘Ngisingasa kose lilangano lyangu ni ŵanyamwe. 2 Ni ŵanyamwe nanlamulile kuti nkataŵa kose lilangano ni ŵandu ŵakutama mu chilambo chi, nambo ngumulanje ilisa yao.’ Nambo ŵanyamwe nganintenda inansalile yo. Kwachichi ntesile yeleyi? 3 Kwayele ngunsalila, une ngisinaatopola ŵandu ŵa atyoche pasikati jenu, nambo chaachinsausya, ni ŵanyamwe tinchitanjila kujipopelela minungu jao." 4 Katumetume jwa kwinani jwa Ambuje Akunnungu paŵaŵechete yeleyo, Ŵaisilaeli wosepe ŵatandite kulila kwakunyanyisya. 5 Kwayele ŵapaŵilasile peuto pala liina lyakwe Bokimu, malumbo gakwe kulila. Pelepo ŵapeleche mbopesi syakutinisya kwa Ambuje Akunnungu.

6 Che Yoshua paŵaalanjile Ŵaisilaeli, kila mundu ŵajawile pamalo pakwe paŵapegwile paŵe pakwe. 7 Ŵaisilaeli ŵaatumichile Ambuje Akunnungu moŵa gose che Yoshua paŵaliji ŵajumi, ni kanyuma ka chiwa chakwe, ŵajendelechele kutenda iyoyo moŵa gose paŵaliji ŵajumi achachekulu ŵaŵaiweni indu yekulungwa iŵaitesile Ambuje Akunnungu kwa Ŵaisilaeli. 8 Che Yoshua mwanache ju che Nuni, ni jwakutumichila jwa Ambuje Akunnungu ŵawile ali ni yaka mia moja na kumi. 9 Ŵandu ŵansichile ku chilambo chakwe chiŵapegwile kuti chiŵe chakwe, kwele ku Timinasi Helesi, ku chilambo cha matumbi cha ku Efulaimu, chakumpoto kwa litumbi lya Gaashi. 10 Aula uŵelesi wose uwaliji pakatema ka che Yoshua wawile, ni wakuiye uŵelesi wine wati nganiwamanyilila Ambuje Akunnungu namose indu iŵaatendele Ŵaisilaeli.

11 Nipele Ŵaisilaeli ŵatesile yaigongomalo paujo pa Ambuje Akunnungu, ni kutanda kuitumichila inyango ya minungu baali. 12 Ŵalesile kwapopelela Ambuje Akunnungu, Akunnungu jwa achinangolo ŵao, juŵaakopwesye mu chilambo cha ku Misili. Ŵanyawo ŵajikuiye minungu jine, minungu jiŵajipopelele ŵandu ŵaŵasyungulile. Ŵajijinamile minungu jo ni kwatumbilisya Ambuje Akunnungu kwannope. 13 Ŵanyawo ŵalesile kwapopelela Ambuje Akunnungu, ŵaitumichile inyago ya minungu Baali ni inyago ya nnungu jwankongwe jwakuŵilanjika Ashitaloti. 14 Kwapele Ambuje Akunnungu ŵaatumbilile Ŵaisilaeli, ni ŵalesile ŵachiswamba ŵaasumule ipanje yao. Ŵaalesile ŵammagongo ŵao ŵaŵasyungwile mosemose ŵaapunde namose Ŵaisilaeli nganakombola kulichenjela kwa ŵammagongo ŵao. 15 Kwakulikose kuŵajawile kungondo, Ambuje Akunnungu ŵaalesile ŵammagongo ŵaapunde Ŵaisilaeli mpela iŵaajamwiche ni iŵaalumbilile. Ŵaisilaeli ŵalasile kwannope.

16 Nipele Ambuje Akunnungu ŵaapele Ŵaisilaeli ilongola ŵaŵaŵilanjikwe ŵakulamula, ŵaŵaakulupwisye ni aŵala ŵachiswamba ŵaŵaasumwile ipanje yao. 17 Nambo Ŵaisilaeli nganiŵapilikanila ilongola ŵao wo, ŵatesile mpela ŵachigwagwa kwa kujikuya minungu jine ni kujipopelela. Ŵalesile kwachitema matala ga achinangolo ŵao ŵaŵagapilikanichisye makanyo ga Ambuje Akunnungu, yaani litala lya kugakuya makanyo ga Ambuje Akunnungu. 18 Katema Ambuje Akunnungu paŵapele Ŵaisilaeli chilongola, ŵankamuchisye chilongola jo ni kwakulupusya ŵandu ni ŵammagongo ŵao katema kose chilongola jo paakuŵa jwanjumi. Ambuje Akunnungu ŵaatendele chanasa paŵapilikene kuwuwula kwawo kwaligongo lya kuonelwa ni kulagaswa kwao. 19 Nambo iŵaga chilongola jula awile, ŵaujilaga mmatala gao gakalakala ni kutenda indu yakusakala nnope kupunda achachekulu ŵao. Ŵajikuiye minungu jine ni kujitumichila ni kujipopelela. Ŵakanile kuleka ugongomalo wao ni makani gao. 20 Kwayele Ambuje Akunnungu ŵaatumbilile kwannope Ŵaisilaeli ni kuti, "Pakuŵa ŵandu ŵa akaasile lilangano lyangu linataŵile ni achachekulu ŵao, ni kukana kumbilikanila, 21 ni une wakwe ngisinaatopola ŵandu ŵa ngosyo sine ŵaŵalesile che Yoshua katema paŵawile. 22 Tinjatenda ŵele ŵandu ŵa ngosyo sine wo ŵaalinje Ŵaisilaeli kuti nole iŵaga tachiuja ni kulikuya litala lyangu mpela achachekulu ŵao pane ngwamba." 23 Kwapele Ambuje Akunnungu ŵaalesile ŵandu ŵa ngosyo syo, nganiŵatopola kwachitema namose nganantenda che Yoshua ŵapunde ŵandu wo.