1 Ŵaisilaeli ŵatesile sooni indu yachigongomalo paujo pa Ambuje Akunnungu, nombe Ambuje Akunnungu wo ŵaatesile ŵandu ŵa ku Midiani ŵaatawale kwa yaka saba. 2 Ŵamidiani ŵaliji ŵamachili kwapunda Ŵaisilaeli, ni ŵaalagasisye Ŵaisilaeli mpaka ŵautuchile mmatumbi ni kulijuŵa mu mbugu ni mmasimbo. 3 Kila chaka, Ŵaisilaeli paŵapandaga mbeju jilijose, Ŵamidiani, ni Ŵaamaleki ni ŵandu ŵane ŵa kwele kungopochelo lyuwa ko ŵaikaga ni kwagungumuchila. 4 Ŵaŵisile igono mu chilambo mo, ŵatandite kuijonanga yakulya ya mmigunda mpaka mu mpika waukwaula ku Gasa, ŵaasumwile ngondolo syao ni ng'ombe ni mbunda, nganiŵaalechela chindu chachilichose Ŵaisilaeli. 5 Ŵammangongo ŵao ŵaikaga ni ilango yao ni masakasa gao. Ŵaliji ŵajinji nti sombe, ni nginikomboleka kwaŵalanga ligongo ŵaliji ŵajinji nnope, nombe ŵajinjile mu chilambo cho kuti achijonanje. 6 Ŵamidiani ŵaauŵesye kwannope Ŵaisilaeli mpaka kumalilwa kila chindu mwakwichila kwalilila Ambuje Akunnungu ŵaakamuchisye.

7 Ŵaisilaeli paŵaalilile Ambuje Akunnungu ŵaatyochesye malagasyo gaŵagapatile kutyochela kwa Ŵamidiani, 8 Ambuje Akunnungu ŵaajauchisye jwakulondola, nombejo ŵaasalile "Ambuje Akunnungu ŵa ku Isilaeli akuti nnyi, ‘Nankopwesye ku Misili kumwaliji achikapolo, 9 nammombwele kutyochela mu utawala wa Ŵamisili ni ŵandu wose ŵaŵamenyene ni ŵanyamwe mu chilambo chi, ni une naaŵinjile ŵanyawo mu chilambo chi ni kumpa ŵanyamwe chilambo chi chiŵe chenu.’ 10 Nipele nansalile kuti, ‘Une ndili Ambuje Akunnungu, Akunnungu jwenu, nkajipopelela minungu ja Ŵaamoli, ŵankutama nawo mu chilambo chao. Nambo nganimumbilikanichisya.’ "

11 Katumetume jwakwinani jwa Ambuje Akunnungu ŵajawile kukutama paasi pa chitela chekulungwa cha mwaloni chichaliji chi che Yoashi jwa lukosyo lwa Abieseli ku musi wa ku Ofila. Che Gidioni mwanagwe che Yoashi ŵaliji nkupeeta ngano peuto pakuminyila sabibu, ŵalijuŵile kuti Ŵamidiani akaawona. 12 Katumetume jwakwinani jwa Ambuje Akunnungu ŵankopochele che Gidioni ni ŵansalile, "Ambuje Akunnungu ali pamo ni mmwe, mmwe mundu jwangajogopa."

13 Che Gidioni ŵammusisye "Alakwe achimwene, iŵaga Ambuje Akunnungu ali pamo ni uwe, ana ligongo chichi indu yose yi itusimene? Ana gali kwapi masengo gao gakusimosya gaŵatusalile achinangolo ŵetu paŵatusalile kuti Ambuje Akunnungu ŵatuichisye akuno kutyochela ku Misili? Nambo sambano atulesile nombejo atutesile tuputikwe ni Ŵamidiani."

14 Ambuje Akunnungu ŵangalauchile ni kunsalila, "Njaule kwa machili ganlinago, nkaawombole Ŵaisilaeli kutyochela kwa Ŵamidiani. Uneji ni junguntuma."

15 Che Gidioni ŵanjanjile "Alakwe Ambuje Akunnungu chinaakulupusye chinauli Ŵaisilaeli? Ntundu wangu nganiukola machili gakuputana ngondo kujipunda mitundu jose ja mu lukosyo lwa Manase, ni une nansyene ngangumanyika pannango wa atati ŵetu."

16 Ambuje Akunnungu ŵansalile "Nkukombola kuitenda yeleyo pakuŵa une tinjinkamuchisya. Tinjintenda mwaulaje Ŵamidiani pangalema mpela mkuulaga mundu jumo."

17 Che Gidioni ŵansalile, "Iŵaga ngundikwe paujo penu munosye chimanyisyo pakuti manyilile kuti mmwe kusyene nli Ambuje Akunnungu junkuŵecheta ni une. 18 Choonde nkatyoka mpaka pachimuje ni kunnyichisya ntuuka wangu." Nombejo ŵajanjile "Chindame pelepa mpaka pachimmuje."

19 Pelepo che Gidioni ŵajinjile mu nyuumba jakwe, ŵateleche nyama ja kandembe ka mbusi, nipele ŵajigele utandi kilo kumi ni kukolosya mikate jangataga amila, ŵatasile nyama jo ni mikate mu chitundu ni nsusi mu chiteleko, nipele ŵampelechele katumetume jo kuusi kwa chitela cha mwaloni ni ŵaŵisile paujo pakwe. 20 Katumetume jwa kwinani jwa Akunnungu jo ŵansalile, "Njigale nyama ni mikate jangataga amila njiŵiche pa lwala lu ni mjitilile nsusi wo pachanya pakwe." Nombe che Gidioni ŵatesile yeleyo, 21 Pelepo katumetume jwakwinani jwa Ambuje Akunnungu ŵajikwaiye nyama ni mikate jila ni songa ja lubokola luŵalujigele mmakono mwakwe, mooto wakopochele mu lwala mula ni kuitinisya indu ila. Katumetume jwa kwinani jwa Ambuje Akunnungu nganawoneka paujo pakwe.

22 Che Gidioni paŵaimanyilile kuti jwejula ŵaliji katumetume jwa kwinani jwa Ambuje Akunnungu, ŵagumisile, ni ŵatite, "Nguwa une, Alakwe Ambuje Akunnungu! Pakuŵa nammweni katumetume jwa kwinani Ambuje Akunnungu kwa meeso gangu!"

23 Nambo Ambuje Akunnungu ŵansalile, "Mme ni chitendewele! Nkajogopa. Ngammwa." 24 Che Gidioni ŵalumbikenye maganga ni kuntaŵile Ambuje Akunnungu peuto pakupelechele mbopesi, ni kupaŵilanga peuto po, "Ambuje Akunnungu ali chitendewele." Peuto pakupelechela mbopesi po pali ku Ofila, musi wa Ŵaabieseli mpaka lelo jino.

25 Chilo cho Ambuje Akunnungu ŵansalile che Gidioni "Njigale ng'ombe jankambaku ja atati ŵenu, ajila ng'ombe jaaŵili ja yaka saba. Ngumulanye peuto pakupelechela mbopesi kwa nnungu Baali paataŵile atati ŵenu ni kuchikasanya chinyago cha nnungu Ashela chachili mumbali mwakwe. 26 Nipele, muundaŵile une Ambuje Akunnungu ŵenu peuto pakupelechelela mbopesi pachanya chikwesya chi mpela yaikuti kusachilwa. Nipele muumbelechele mbopesi jakutinisya ja ng'ombe jaaŵili jila, kwa sasu sya sichi sya achila chinyago cha Ashela chimwachikasenye." 27 Nipele che Gidioni ŵaajigele ŵandu likumi pasikati ja ŵakutumichila ŵakwe, ŵatesile mpela Ambuje Akunnungu iŵannajichisye. Nambo pakuŵa ŵaajogwepe ŵamu nyuumba ja atatigwe ni ŵandu ŵa mu mmusi, nganakombola kutenda yeleyo muusi, pamalo pakwe ŵaitesile chilo.

28 Ŵandu ŵaakutama mmusi mo paŵajimwiche kundaŵipe ŵapaweni peuto pakupelechela mbopesi kwa nnungu Baali ni chinyago cha Ashela chichaliji muumbali mwakwe yekasanye. Ng'ombe jankambaku jaaŵili jili jetinisye pachanya peuto pakupelechela mbopesi papataŵikwe pelepo. 29 Ŵausyeneusyene, "Ana ŵani ŵatesile yelei?" Paŵauchilichisye kwannope ŵasalilwe, "Che Gidioni mwanagwe che Yoashi ni juŵatesile yeleyo." 30 Ŵaakutama mmusi mo ŵansalile che Yoashi, "Munnyichenawo mwanagwenu tummulaje, pakuŵa agumwile pamalo pakupelechela mbopesi kwa nnungu Baali ni kuchikasanya chinyago cha Ashela chichaliji mumbali mwakwe."

31 Che Yoashi ŵaasalile ŵandu uŵakanganaga nawo ŵala, "Ana nkusaka kunchenjela nnungu Baali? Uli nkukombola kunkulupusya? Jwalijose jwaakunchenjela Baali aulajikwe nganikuche. Iŵaga Baali ali Akunnungu munneche alichenjele nsyene pakuŵa liuto lyakwe lyakutyochesya mbopesi ligumulikwe." 32 Nipele kutandilila lyuŵa lyo ŵammilasile che Gidioni, "Yelubaali," achitiji "Munneche Baali alichenjele nsyene. Pakuŵa peuto pakwe pakupelechela mbopesi pagumulikwe."

33 Katema ko Ŵamidiani ni Ŵaamaleki ni ŵandu ŵane ŵa kungopochelo lyuŵa ŵasongangene, ŵajombweche lusulo lwa Yolodani ni kuŵika igono yao mu chiŵata kuusi kwa itumbi kwele ku Yesileeli. 34 Nipele mbumu jwa Ambuje Akunnungu ŵannyichilile che Gidioni, ni che Gidioni ŵagombile lipenga kwaŵilanga ŵangondo kutyochele mu ntundu wa Ŵaabieseli kuti ŵaakuye. 35 Sooni ŵaatumile ŵantenga ajaule ku chilambo chose cha Manase kwaŵilanga ŵangondo kuti ankuye, ni sooni ŵaatumile ŵantenga kwa ngosyo sya Asheli ni Sabuloni ni Nafutali, ni ŵanyawo nombe ŵaiche kukulumbikana nawo.

36 Che Gidioni ŵansalile Akunnungu, "Ntite kuti timuundende une naawombole Ŵaisilaeli, 37 sambano nguŵika lipende lya ngondolo paluŵala lwa kupetela ngano, patikucheje iŵaga tipaŵe pana mangame pa lipende pepo ngaŵa ni pa luŵala pakwe, pelepo timanyilile kuti timuundende une naakulupusye Ŵaisilaeli mpela intite kusala." 38 Yeleyo ni iyatendekwe, pakuŵa che Gidioni paŵajimwiche kundaŵipe ŵagaweni maangame pa lipende, ŵaminyile lipende lila, maangame gakopweche ni meesi gagumbele mu bakuli. 39 Che Gidioni ŵansalile Akunnungu, "Choonde ngasimundumbilila, angunde kuti nammende chindu chine. Ngummenda muluusu nanninje sooni kwa lipende lilili. Ulendo wu ngummenda lipende pe liŵe lyakuumula ni paluŵala paŵe ni mangame." 40 Chele chilo cho Akunnungu ŵatesile iyoyo, pachanya lipende paliji papajumu ni paluŵala paliji ni mangame.