1 Pa lyuŵa limo che Sansoni ŵajawile ku musi wa Timina, ni kweleko ŵammweni jwankongwe Mfilisiti. 2 Paŵausile kumangwakwe ŵaasalile atatigwe ni achikulugwe, "Nammweni mwali Mfilisiti ku musi wa Timina ni ngusaka nombele jwelejo. Nkanyigalile jwelejo aŵe ŵankwangu." 3 Pelepo atatigwe ni achikulugwe ŵammusisye, "Kwachichi nkwaula kulombela kwa ŵele Ŵafilisiti ŵangaumbala? Ana nganimummona jwankongwe mu achalongo achinjenu pane pasikati ja ŵandu ŵetu wose ŵa?"

Nambo che Sansoni ŵansalile atatigwe, "Nkanyigalile jwelejo pakuŵa jwelejo ni jungunnonyela une."

4 Nambo atatigwe ni achikulugwe nganaimanyililaga kuti Ambuje Akunnungu ni ŵaŵanlongosyaga che Sansoni kuti atende yeleyi, Ambuje Akunnungu ŵasosaga ligongo lyakwaputila Ŵafilisiti, pakuŵa pa kele katema ko Ŵafilisiti ni ŵaŵaatawalaga Ŵaisilaeli.

5 Che Sansoni ŵatuluchile ku musi wa ku Timina pamo ni atatigwe ni achikulugwe. Paŵaichenje pa migunda ja misabibu kwele ku Timina ko, chisisimuchile lisimba lyakalipa lyaiche ni kwatulumila che Samsoni. 6 Mbumu jwa Ambuje Akunnungu ŵannyichilile che Sansoni kwa machili, ni che Sansoni ŵalikamwile lisimba lyo kukang'wa, ŵalipapachukwile kwa makono gakwe mpela mundu yakuti kukapapachukula kambusi, nambo nganaasalila atatigwe namose achikulugwe chele chiŵachitesile cho. 7 Nipele ŵaichenje ku musi wa Timina che Sansoni ŵapite kukukunguluka ni mwali jula, nombe mwali jula ŵaanonyelesye che Sansoni. 8 Pagapite moŵa kanandi che Sansoni ŵaujile ku Timina kukulombela mwali jo. Paŵaliji mwitala ŵasepwiche akalilole lisimba lila, ni ŵasimonjile piŵasiweni nyuchi sili mkutama mu ntembo wa lisimba lila ni siŵisile uchi nkati mwakwe. 9 Ni ŵajigele uchi wo ni kulya ali nkwenda. Ŵaaichilile atatigwe ni achikulugwe, ŵaapele uchi wo, nombe nawo ŵalile. Nambo che Sansoni nganiŵaasalila kuti ŵapakwile uchi wo mu ntembo wa lisimba.

10 Nipele atatigwe che Sansoni ŵajawile kumangwakwe mwali jo kukupeleka maali, ni che Sansoni ŵatesile chindimba cha yakulya kweleko, mpela achachanda iŵasyoŵelele kutenda. 11 Ŵafilisiti paŵammweni che Sansoni, ŵaasalile achachanda salasini akatame ni che Sansoni pa chindimba pala. 12 Che Sansoni ŵaasalile, "Chinansalile chitagu, mwakombolaga kuundagulila chitagu cho mu gelega moŵa saba ga ulombela ga, chinjimpa yakuwala salasini yeswela mbee ni yakuwala ine salasini. 13 Nambo iŵaga nkulepela kuundagulila, mwanya chimuumbe yakuwala salasini yeswela mbee ni yakuwala ine salasini."

Nipele ŵansalile, "Ntusalile chitagu chenu, tukusaka tuchipikane."

14 Che Sansoni ŵatite,

"Mu jwaakulya mwakopweche chakulya.

Mu jwamachili mwakopweche chakulyelyepela."

Niŵanyawo kwa moŵa gatatu nganakombola kutagula chitagu cho.

15 Nipele, pa lyuŵa lyancheche ŵansalile ŵankwakwe che Sansoni, "Mwanyenje ŵankwenu kuti atusalile malumbo ga chitagu cho, iŵaga ngankutenda yeleyo uwe tutujoche nyuumba ja atati ŵenu pamo ni mmwe wakwe nli mmomo. Ana mwanya mwatulaliche kuti ntusumule ipanje yetu?" 16 Nipele ŵankwakwe che Sansoni ŵanjaulile che Sansoni ali nkulila ni ŵatite, "Mmwejo nkuumenga une, ngankuunonyela kose! Mmwejo mwausisye ŵandu ŵangu chitagu ni une nganimuundagulila malumbo gakwe."

Che Sansoni ŵajanjile, "Mpilikane, atamuno atati ŵangu ni achikulu ŵangu nganinaasalila, nansalile mmwejo ligongo chichi?" 17 Nambo ŵankwakwe che Sansoni ŵalisile kwa moŵa gose saba ga chindimba cho. Pa lyuŵa lya saba che Sansoni ŵansalile ŵankwakwe malumbo ga chitagu chila pakuŵa ŵankanganichisye nnope. Nombejo ŵajawile kukwasalila Ŵafilisiti achinjakwe malumbo ga chitagu cho. 18 Palyuŵa ya saba, lyuŵa likanaŵe kutiŵili, ŵandu ŵala ŵansalile che Sansoni,

"Chichi chakulyelyepela kupunda uchi?

Ŵani ŵakwete machili mpela lisimba?"

Che Sansoni ŵajanjile,

"Ngankaanyenje mwali jungulombela ju kuti amusye,

ngankachimanyilile chigopolelo cha chitagu changu."

19 Pelepo mbumu jwa Ambuje Akunnungu ŵannyichilile che Sansoni kwa machili, nombejo ŵajawile ku Ashikeloni, ŵaauleje ŵandu salasini, ŵaausile yakuwala yao ya pachindimba ni kwapa aŵala ŵandu ŵaŵagopolele chitagu chakwe. Nipele ŵatyosile ni kuuja kumusi kwa achaŵelesi ŵakwe ali atumbile kwannope. 20 Nipele, ajula ŵankwakwe che Sansoni jula ŵanlombekasisye kwa jwanchanda jumpepe juŵaliji jwakwimilila jwa che Sansoni pa chindimba.