1 Paŵawile che Abimeleki, che Tola mwanagwe che Pua, chisukulu chi che Dodo, jwa lukosyo lwa Isakali, ŵajimi kwakulupusya Ŵaisilaeli. Che Tola ŵatamaga ku Shamili chilambo cha matumbi cha ku Efulaimu. 2 Jwele ŵaliji chilongola jwa Ŵaisilaeli kwa yaka ishilini na tatu, paŵawile, ŵansichile ku Shamili.

3 Paŵawile che Tola, che Yaili jwa ku Gileadi ni juŵalongwesye Ŵaisilaeli kwa yaka ishilini na mbili. 4 Che Yaili ŵakwete ŵanache ŵachilume salasini ŵaŵaliji nkukwela mbunda salasini. Ni ŵanyawo ŵakwete misinda salasini jajikuŵilanjikwa Hawoti Yaili mpaka lelo jino, ni misinda jo jili mu chilambo cha ku Gileadi. 5 Paŵawile che Yaili ŵansichile kwele ku Kamoni.

6 Ŵaisilaeli ŵaaleŵele Ambuje Akunnungu, ŵajipopelele minungu Baali ni Ashitaloti, ni minungu ja ŵandu ŵa ku Alamu ni ku Sidoni ni ku Moabu ni ku Amoni ni Ŵafilisiti. Ŵaisilaeli ŵannesile Ambuje Akunnungu ni nganampopelela sooni. 7 Kwapele, Ambuje Akunnungu ŵaatumbilile Ŵaisilaeli, ni ŵaatesile Ŵafilisiti ni Ŵaamoni ŵaapunde Ŵaisilaeli. 8 Kwa yaka kumi na nane ŵanyawo ŵaalagesye ni kwaliŵatila Ŵaisilaeli ŵaŵatamaga kwele ku Gileadi, ku chilambo cha Ŵaamoli, chachili chakungopochelo lyuŵa kwa lusulo lwa Yolodani. 9 Ŵaamoni nombewo ŵajombweche lusulo lwa Yolodani kumenyana ni ngosyo sya Yuda ni Benjamini ni Efulaimu. Ŵaisilaeli ŵalasile kwannope.

10 Nipele Ŵaisilaeli ŵaalilile Ambuje Akunnungu achitiji, "Tunneŵele, pakuŵa tunnesile mmwe Akunnungu ŵetu ni kwapopelela nnungu Baali." 11 Ambuje Akunnungu ŵaajanjile Ŵaisilaeli, "Uli, ana une nganinammombola mwanya kwa Ŵamisili ni Ŵaamoni ni Ŵaamoli ni Ŵafilisiti? 12 Ŵasidoni ni Ŵaamaleki ni Ŵaamoni ŵanliŵatile, ni mwanya mwandilile, ana une nganinammombola kwa ŵanyawo? 13 Nambo ŵanyamwe muunesile une ni kujipopelela minungu jine, kwayele ngangummombola sooni. 14 Njaulangane nkajililile minungu jinjisagwile jo. Njileche jele minungu jo jimmombole mmasauko genu."

15 Nambo Ŵaisilaeli ŵansalile Ambuje Akunnungu, "Tutesile sambi, ntutende yailiyose inkuisaka, nambo lelo jino choonde ntuwommbole." 16 Ni ŵajityosisye minungu ja chilendo ni kwapopelela Ambuje Akunnungu, nipele Ambuje Akunnungu nganakombola kupililila sooni kugawona masauko ga Ŵaisilaeli.

17 Nipele Ŵaamoni ŵasongangene ni kuŵika chigono chao kwele ku Gileadi. Ŵaisilaeli nombe ŵasongangene ni kuŵika chigono chao kwele ku Misipa. 18 Pelepo Ŵaisilaeli ni ilongola ŵao ŵausyene, "Ana ŵani ŵachalongolele kukuputana ngondo ni Ŵaamoni? Juchalongolele tachiŵa chilongola pa ŵandu wose ŵakutama ku Gileadi."