1 Kalakala ko katema ŵakulamula paŵaliji nkulongosya ku Isilaeli, jakopochele sala pachilambo cho. Mundu jumo kutyochela ku Beselehemu ja ku Yuda pamo ni ŵankwakwe ni achiŵanagwe ŵaŵili ŵachilume ŵajawile kukutama kwakatema ku chilambo cha ku Moabu nti achalendo. 2 Jwele mundu ju jwaŵilanjikwe che Elimeleki ni ŵankwawo ŵaŵilanjikwe che Naomi. Achiŵanagwe ŵaŵili ŵala, jumo ŵaŵilanjikwe che Mahaloni ni jwine ŵaŵilanjikwe che Kilioni. Mundu ju ni achalongo achinjakwe ŵaliji ŵa lukosyo lwa Efulati ku Beselehemu ja ku Yuda kula. Ni ŵaikangene ku Moabu ni kutama kweleko. 3 Che Elimeleki ŵankwakwe che Naomi ŵajasiche ni che Naomi ŵasigalile ni achiŵanagwe ŵaŵili. 4 Achachanda wo ŵalombele achiŵali ŵa Chimoabu, mwali jumo jwaŵilanjikwe che Opa ni mwali jwine jwaŵilanjikwe che Lusi. Paŵatemi kweleko yaka likumi, 5 wose ŵanaŵaŵili, che Maloni ni che Kilioni nombe nawo ŵajasiche ni che Naomi jwaliji jwakuwililwa ni ŵankwakwe ni achiŵanagwe.

6 Pelepo che Naomi ŵapilikene kuti Ambuje Akunnungu ŵapele upile ŵandu ŵakwe ni kwapa chakulya, nipele ŵaliŵisile chile kutyoka ku Moabu ni kuuja kumangwakwe pamo ni achakwegwao. 7 Nipele ŵatyosile paŵatamaga pala ni achakwegwao, ŵakamwile litala lya kuuja ku Yuda. 8 Pelepo che Naomi ŵaasalile achakwegwao ŵala, "Mmujangane jwalijose kumusi kwa achikulugwe. Ambuje Akunnungu ampanganyichisye yambone mpela intite pakuumbanganyichisya une ni ŵandu ŵangu ŵaajasiche ŵala. 9 Ambuje Akunnungu ankamuchisye jwalijose mwa ŵanyamwe akole jwannume ni nyuumba jakwe."

Nipele che Naomi ŵaalanjile kwakwanonyela, nambo ŵanyawo ŵatandite kulila kwaliloŵe, 10 ni kwasalila, "Ngaŵa yeleyo, tutujaule pamo ni mmwe kwa ŵandu ŵenu."

11 Nombe che Naomi ŵatite, "Mmujangane achiŵanangu. Kwaligongo chi nnongane ni une? Ana nkuganisya kuti ngukombola kukola sooni ŵanache uchaŵe achiŵankwenu? 12 Mmujangane mmangwenu achiŵanangu pakuŵa uneji njekulwipe nnope, ngangukombola kulombekwa sooni. Namose ngatite ngwete chilolelo, ni namose ngawonegene ni jwannume chilo chino ni kukola ŵanache ŵachilume, 13 ana nkakombwele kulindilila mpaka apatanje masusa? Ana nkakombwele kulisiŵila nkalombekwa ni achalume ŵane? Ngaŵa achiŵanangu! Pakuŵa uneji ngwete ipwetesi kwannope kumpunda ŵanyamwe ligongo Ambuje Akunnungu ambutile."

14 Pelepo ŵatandite sooni kulila kwa liloŵe, ni che Opa ŵankumbete nkwegwao, ŵannanjile ni kuuja kumangwakwe, nambo che Lusi ŵakanile kulekangana nawo. 15 Nipele che Naomi ŵansalile, "Che Lusi, nnole alumbu ŵenu ausile kumangwakwe ni kwa nnungu jwakwe, nipele nomwe nombe mbuje mwakuye alumbu ŵenu."

16 Nambo che Lusi ŵajanjile,

"Ngasimunjondelela nanneche mmwe,

namose ngasimunganya kulongana ni mmwe.

Papali pose pachinjaule, kweleko ni une ni kuchinyaule,

ni pachintame, ni une chindame,

ŵandu ŵenu chaŵe ŵandu ŵangu,

ni Akunnungu ŵenu chaŵe Akunnungu ŵangu.

17 Pele pachinjasichile, papopo ni une chinyasichile,

ni papopo chisichikwe.

Ambuje Akunnungu ambe majamuko gachikali iŵaga chinekanywe nomwe,

ikaŵe kwa chiwa pe."

18 Che Naomi paŵaiweni kuti che Lusi awamwiwe kwaula pamo nawo, ŵalesile kwanyenga.

19 Nipele wose ŵanaŵaŵili ŵajendelechele ni ulendo mpaka ku Beselehemu. Paŵaiche kweleko, ŵandu wose ŵasimosile namose achakongwe ŵausyene, "Ana ŵelewo che Naomi?"

20 Che Naomi ŵatite "Nnaamilanje sooni che Naomi, muumilanje che Mala pakuŵa Ambuje Akunnungu ŵaali ni machili gose asitesile ndamo syangu siŵe syaipwetesi kwannope. 21 Panatyosile pelepa nakwete indu yejinji, nambo sambano Ambuje Akunnungu amusisye makonope. Kwachichi kumilanga che Naomi iŵaga Ambuje Akunnungu anyamwiche, ni Ambuje Akunnungu anagesye?"

22 Yeleyi ni iŵatite pa kuuja che Naomi kutyochela ku Moabu pamo ni che Lusi akwegwao jwa ku Moabu, ni kwinjila ku Beselehemu katema magungulo ga shayili pagaliji nkutanda.