1 Che Naomi ŵaliji ni nlongo njakwe juŵaŵilanjikwe che Boasi jwa ntundu wa che Elimeleki ŵankwakwe. Mundu ju ŵaliji jwachipanje ni ŵachimbichikwe kwannope ligongo lya ipanganyoyakwe yambone. 2 Lyuŵa limo che Lusi Mmoabu ŵansalile che Naomi, "Mungunde nyaule kumigunda ngatende mawasawasa papalipose pachingundikwe ni nsyene ngunda."

Che Naomi ŵanjanjile, "Hayaga, njauleje mwanangu."

3 Nipele che Lusi ŵajawile kumigunda, ŵaakuiye ŵakugungula achilokotanyaga masache gaŵalesile. Ni yakopochele kuti nngunda uwalokotaga waliji wa che Boasi, jwa ntundu wa che Elimeleki ŵankwakwe che Naomi.

4 Papopo, che Boasi ŵaiche kutyochela ku Beselehemu ni kwakomasya ŵakugungula achitiji, "Ambuje Akunnungu aŵe ni ŵanyamwe."

Ni ŵanyawo ŵajitichisye, "Ambuje Akunnungu ampe upile."

5 Nipele che Boasi ŵambusisye jwakwajimilila ŵakugungula, "Ana jwankongwe jula ni ncheni?"

6 Jwakwajimilila ŵakugungula jula ŵajanjile, "Jwankongwe jula ali Mmoabu jwausile pamo ni che Naomi kutyochela ku chilambo cha ku Moabu. 7 Ŵamendile nakunde ŵakuye kunyuma ŵakugungula achilokotanyaga mawasawasa mungunda. Nipele ŵaiche ni apanganyisye masengo kutandila kundaŵi, ni sambano pejino ajawile kukupumulila pa lisakasa."

8 Nipele che Boasi ŵansalile che Lusi "Mpilikanile mwanangu, nkajaula kukulokota mawasawasa pangunda wine, namose nkatyoka pelepa, nlongane ni achiŵali ŵangu ŵaakupanganya masengo. 9 Nnole peuto paakugungulu mmeje papopo, naajamwiche achachanda ŵa akasansausya. Ni mwapilikanaga njota, njaule ku lulo ni ng'weje meesi gaatechile achachanda wo."

10 Pelepo che Lusi ŵaatindiŵalile che Boasi ni kwajinamila kwakwachimbichisya, ni kwausya, "Mbatile chinauli kukundikwa paujo penu kwampaka kuungolela chanasa kwanti yeleyo ni uneji ndili jwannendope?"

11 Nambo che Boasi ŵajanjile, "Mbilikene yanayose imwapanganyichisye akwegwenu chitandile paŵajasiche ŵankwenu ni intite kwaleka achaŵelesi ŵenu, ni kuchileka chilambo chenu chimpagwilwe ni kwika kukutama pasikati ja ŵandu ŵanganimwamanyilila chitandile kuundanda. 12 Ambuje Akunnungu ampe mbote kwa yanayose impanganyisye. Ambuje Akunnungu, Akunnungu ŵa ku Isilaeli umwautuchile angose, ampe ntulilo wemalilwe."

13 Che Lusi ŵajanjile, "Achimwene, alakwe mundendele yambone kwannope, namuno uneji nganiŵa jumo jwa achikatumetume ŵenu, pakuŵa mmwejo mundusisye ntima, ni kukunguluka ni uneji kwa kutulala."

14 Katema ka chakulya che Boasi ŵammilanjile che Lusi chakulya, ŵansalile, "Kalibu apano, njise kunlye nkate ni kutoŵela mu divai." Kwapele che Lusi ŵatemi pamo ni ŵakugungula ni che Boasi ŵampele imanga yekalanje, che Lusi ŵalile ni kwikuta mpaka ŵasigesye. 15 Ni yaliji Che Lusi paŵajendelechele kulokotanya mawasawasa, che Boasi ŵaasalile ŵamasengo ŵakwe "Munneche asonganganye namose pajili ilingo, nkannekasya. 16 Sooni mwasolomolele masache mu ilingo ni kunnechela alokotanye pangali kunnekasya."

17 Nipele che Lusi ŵalokwete mawasawasa mungunda mpaka ligulo. Ni paŵaputukwile shayili jila ŵagumbesye lidebe limo ni konjechesa. 18 Ni ŵatwichile ni kwaula mmusi. Ŵannosisye akwegwao yalokwete yo, ŵatyosisye yakulya yasigesye paŵajikwite ni kwapa. 19 Nipele akwegwao ŵambusisye, "Ana nnokwete kwapi lelo? Mwaliji ngunda wa acheni? Akole upile ŵelewo ŵammanyi."

Pelepo che Lusi ŵansalile che Naomi kuti ŵapanganyisye mungunda wa mundu jwakuŵilanjikwa che Boasi.

20 Nipele che Naomi ŵansalile akwegwao, "Ambuje Akunnungu ŵape upile che Boasi! Akunnungu akugumbalichisya ilanga yakwe kwa ŵaali ŵajumi ni ŵajasiche." Ni ŵajendelechele kuŵecheta, "Mundu ju ali nnongo njetu ni sooni ali jumo jwa aŵala ŵakusachilwa kutuwombola."

21 Nipele che Lusi ŵatite, "Elo, aasalile ngamulangane ni ŵamasengo ŵakwe mpaka amalisye magungulo gose."

22 Nipele che Naomi ŵansalile che Lusi nkwegwakwe, "Mwanangu ili yambone mmwe kulongana nawo ŵamasengo ŵakwe, kuti mme salama." 23 Kwapele che Lutu ŵalongene ni ŵamasengo ŵakwe che Boasi ni kulokotanya masache mpaka kumbesi kwa magungulo ga shayili ni ngano. Katema kose ŵaliji nkutama ni che Lusi akwegwao.