1 Pakumala yeleyo che Naomi ŵaasalile che Lusi akwegwao, "Ana mwanangu ngiŵa yambone nansosele ŵalume kuti nkole nyumba jenu mwasyene. 2 Sambano aju che Boasi jumwapanganyisye masengo pamo ni ŵamasengo ŵakwe ali jwa ntundu wetu. Mpilikane, chilo cha lelo taaŵe nkupeta shayili peuto pakuputila. 3 Kwapele, njoje, npakale mauta gakununjila ni kuwalila chambone, nipele njaule peuto pakuputila, nambo nlolechesye nkalilosya kukwakwe mpaka patamale kulya ni kung'wa. 4 Nombe chiiŵe katema patagone, mpamanyilile patagone ni amalaga kugona lugono mwajaulile mbolembole, mbunukule makongolo gakwe ni kugona papopo. Nombewo tansalile chakutenda."

5 Che Lusi ŵajanjile "Yose imuusalile chimbanganye."

6 Nipele che Lusi ŵajawile mpaka peuto pakuputila, ŵatesile mpela iŵatite pakusalilwa ni akwegwao. 7 Che Boasi paŵamalisisye kulya ni kug'wa ŵasengwile muntima, nipele ŵajawile pachiŵandi ni chilingo cha shayili ni kugona. Che Lusi ŵajawile mbolembole ŵagaunukwile makongolo ga ga che Boasi ni kugona papopo. 8 Pasikati chilo che Boasi ŵatojime, ni ŵagalawiche, nipele wasimonjile kummona jwankongwe ali agonile ku makongolo gakwe. 9 Ŵatite "Ana mmweji ŵani?"

Che Lusi ŵajanjile, "Ndili une che Lusi katumetume jwenu. Pakuŵa mmwejo ni nlongo jwangu jwakuŵandichila, mmwejo ni junkusachilwa kumombola une, kwapele njinjile majumba."

10 Che Boasi ŵatite, "Ambuje Akunnungu ampe upile mwanangu, pakuŵa nkulosya unonyelo wakukulupichika kwannope kupunda aula umwalosisye kuundanda, pakuŵa nganimwakuya achachanda ŵakulaga pane ŵali ni chipanje kuti annombele. 11 Sambano mwanangu ngasinkola lipamba, uneji chinantendele yanayose inkuŵecheta pakuŵa kila mundu mmusi muno akummanyilila kuti nli ŵakongwe ŵambone. 12 Sooni isyene kuti uneji nlongo jundi jwakuŵandichila ni jungusachilwa kummombola mmwe, nambo apali mundu jwali nlongo jwakuŵandichila nnope kumbunda une. 13 Kwapele ntame apano chilo chose ni kundaŵi tutulole iŵaga chakunde kummombola pane ngwamba. Iŵaga tammombole ili yambone nambo ŵelewo akanaga, kwa liina lya Ambuje Akunnungu ŵajumi uneji tinammombole. Ngoneje apano mpaka kundaŵi."

14 Nipele che Lusi ŵagonile ku makongolo ga che Boasi mpaka kundaŵi, nambo ŵatyosile kundaŵindaŵipe mundu akanakombole kummanyilila njakwe, pakuŵa che Boasi ŵatite ŵandu akaimanyilila kuti jwankongwe ŵaiche peuto pakuputila yakulya pa. 15 Sooni che Boasi ŵansalile, "Ntandiche nguo jenu paasi" Che Lusi ŵatesile yeleyo, ni che Boasi ŵampimile mbiisi nsano ni jimo sya shayiri ni kwatwika ni che Lusi ŵausile kumangwakwe. 16 Paŵaiche kwa akwegwao, akwegwao ŵambusisye, "Uli mwanangu iŵele uli?"

Che Lusi ŵansalile yanayose yapanganyichisye ni che Boasi. 17 Nipele ŵatite "Nkauja kwa akwegwenu makono pe," kwayele ŵambele mbiisi nsano ni jimo si sya shayili.

18 Nombe che Naomi ŵatite, "Sano, mwanangu che Lusi ntulale mpaka pachimmanyilile ichikopochele, pakuŵa che Boasi ngalechela papopo, nambo taikolosye yele indu yo lelo."