1 Aga ni malajisyo, ni makanyo ni mashaliti ga Ambuje Akunnungu, Akunnungu ŵenu, gaŵanajisye nanjiganye, kuti ngajitichisye ku chilambo chinkwaula kuchichigala chiŵe chenu, pakumala komboka lusulo lwa Yolodani. 2 Katema kose nli ŵajumi mwanyamwe mwajitichisye Ambuje Akunnungu, Akunnungu ŵenu, ni kugachimbichisya malajisyo gose ni makanyo gangumpa ŵanyamwe ni iŵelesi yenu kuti nkatame yaka yejinji. 3 Kwayele ŵanyamwe Ŵaisilaeli, nlilolesyesye kugapanganya malajisyo go kuti indu yenu injendechele yambone ni kuchuluka kwannope mu chele chilambo channanjile, chachili ni chajila, chachikufai kwa kulanga ni kulima.

4 Mpilikane ŵanyamwe Ŵaisilaeli! Ambuje Akunnungu, Akunnungu ŵetu, ali Ambuje jikape. 5 Nomwe mwanonyele Ambuje Akunnungu, Akunnungu ŵenu, kwa ntima wenu wose, kwa mbumu jenu jose ni kwa machili genu gose. 6 Nkagaliŵalila aga makanyo ga gingunnajisya lelojino, 7 ni kwajiganya ukoto ŵanache ŵenu. Chimwatanjile pachintame pamusi pane mu ulendo pane pankupumulila atamuno pankupanganya masengo. 8 Ngalembe ni kugataŵilila mmakono mwenu ni kuwala pausyo penu kuti gankumbuchisye. 9 Ngalembe mu felemu sya minango jenu ni mu milango jekulungwa jakwinjilila mu misi jenu.

10 "Katema Ambuje Akunnungu, Akunnungu ŵenu, patannyichisye ku chilambo chiŵaalumbilile achachekulu ŵenu, che Ibulahimu, ni che Isaka, ni che Yakubu, kumpa ŵanyamwe, chilambo chekulungwa, chachili ni misi jakusalala janganintaŵa, 11 nyuumba syasigumbele indu yakusalala yanganinyiŵika ŵanyamwe, ni isima yanganinyisola ni migunda ja misabibu ni miseituni janganimpande. Ambuje Akunnungu pachampeleche ku chilambo chachimme ni chakulya chachili chose chachinsache. 12 Pelepo nlilolechesye kuti ngasimwaliŵalila Ambuje Akunnungu ŵaŵankopwesye ku Misili kumwaliji achikapolo. 13 Chimwajinichile Ambuje Akunnungu, Akunnungu ŵenu, chimwatumichile ŵawowo jikape ni chinnumbile kwa liina lyawo. 14 Ngasimpopelela minungu jine, minungu ja ŵandu ŵakunsyungula, 15 nkaatendekasya Ambuje Akunnungu ŵenu antumbilile, akanjonanga pachilambo, pakuŵa Ambuje Akunnungu, Akunnungu ŵali pasikati penu, ali Akunnungu ŵa wiu."

16 "Nkaalinga Ambuje Akunnungu, Akunnungu ŵenu, mpela imwatite kwalinga kwele ku Masa ko. 17 Nlilolechesye kuti nkugajitichisya makanyo ga Ambuje Akunnungu, Akunnungu ŵenu, mashalaiti ni malajisyo gao ganlajisye. 18 Ntendeje aila yaikwanonyela Ambuje Akunnungu, kuti indu yenu injendechele yambone. Chinkombole kuchitenda chenu achila chilambo chakusalala chati Ambuje Akunnungu ŵalumbilile kwapa achachekulu ŵenu, 19 ni kuti Ambuje Akunnungu chiŵatopole ŵammagongo ŵenu mpela yatite kunlanjila."

20 "Yaka yaikwika mmbujo, ŵanache ŵenu patachimmusya kuti, ‘Kwachichi Ambuje Akunnungu, Akunnungu ŵetu ŵatulamwile kuti tugapikanileje malajisyo ni majiganyo gose ga?’ 21 Ŵanyamwe mwajanje kuti, ‘Uweji twaliji achikapolo ŵa mwenye jwa ku Misili nambo Ambuje Akunnungu, ŵatukulupwisye kwa ukombole wao wekulungwa. 22 Uweji twaweni kwa meso getu Ambuje Akunnungu, alinkwatendela ŵandu ŵa ku Misili imanyisyo ni ya kusimosya ni indu yakogoya kwannope, pamo ni mwenye jwao ni ŵandu ŵakwe wose. 23 Ambuje Akunnungu, Akunnungu ŵetu ŵatukopwesye ku Misili ni kutuichisya akuno, ŵatupele chilambo chi mpela iŵatite kulumbila kwa achachekulu ŵetu. 24 Nipele, Ambuje Akunnungu ŵatulamwile kuti tugajitichisye makanyo gosepe ga ni kwajinichila, twatendaga yele chatugose moŵa gose ni kututenda tupoche. 25 Twaŵaga ŵakukulupilichika kwitichisya kila chindu chatulajisye Ambuje Akuunungu, Akunnungu ŵetu, chanonyelwe ni uwe.’"