1 "Ambuje Akunnungu, Akunnungu ŵenu, pachachajonanga ŵandu ŵa ilambo ichampe ŵanyamwe, katema pachimwaŵinje ni kutama mu misi jao ni mmajumba gao, 2 pelepo chinsagule misi jitatu pasikati ja chilambo chaakumpa Ambuje Akunnungu, Akunnungu jwenu kuti chiŵe chenu. 3 Chinkolosye matala gagakwaula ku misi jo ni kuchigaŵa mbaande sitatu chilambo chaakumpa Ambuje Akunnungu, Akunnungu ŵenu kuti chiŵe chenu, kuti mundu jwalijose jwakuulaga njakwe akombole kuutuchila kweleko. 4 Mundu ammulagaga njakwe pangaŵa kwamele, akuno nganaŵa jwammagongo jwakwe, akukombola kuutuchila musi umo mwa misi ji, ni kuukulupusya umi wakwe. 5 Tuŵanichisye kuti, ŵandu ŵaŵili ajawile kulitinji kutema sasu, ni paakata chitela liŵago likuliche mumpini mwakwe ni kummulaga njakwe. Jwakuulaga njakwe jo akukombola kuutuchila ku musi umo mwa misi ji ni kuukulupusya umi wakwe. 6 Nambo iŵaga musi wakuutuchila wo ukaliji umope ni sooni uli kwakutalichila kwannope, ni jwakuuchisya ligongo atumbile kwannope akukombola kunkuilisya ni kunkamula ni kummulaga jwele mundu jwammuleje njakwe jo, nachiŵamuno jwauleje jo nganalamulikwa chiwa, nombe ŵele ŵandu ŵaŵili wo yaani jwakuulaga ni jwawile nganaŵa ŵammagongo. 7 Lyelelyo ni ligongo nansalile mwanya nsapule misi jitatu."

8 "Ambuje Akunnungu, Akunnungu ŵenu, patajijonjechesye mipika chilambo chenu, mpela iŵatite pakulanga kwa chilumbilo kwa achambuje ŵenu ni kumpa ŵanyamwe chele chilambo chiŵalanjile cho, 9 iŵaga chingakamulilsye makanyo ga gingumpanga lelo jino, mwaanonyelaga Ambuje Akunnungu, Akunnungu jwenu ni kugakuya matala gao moŵa gose, nipele chinjonjechesye misi jiine jitatu. 10 Ntendeje yeleyo kuti moŵa gose mundu jwangali ni chileŵo akaika kuulajikwa mu chilambo chenu chakumpa Ambuje Akunnungu, Akunnungu ŵenu kuti chiŵe chenu, ni kuntesya mme ŵaali ni chileŵo chakuulaga ŵandu."

11 "Nambo iŵaga mundu akunchima nlongo njakwe, ni anjuŵililaga njakwe jo ni kummulaga mwamele, nombejo autuchilaga musi umo mwa misi ji, 12 Pelepo achachekulu ŵa musi wo chalajisye ŵandu ŵaatyosye kweleko ni kunjausya kwa jwakuuchisya maulago kuti aulajikwe. 13 Nkankolela chanasa mundu jwakuulaga njakwe. Kwayele chinnekasye ugongomalo wa kuulaga mundu jwangali chileŵo mu Isilaeli kuti nkombole kutama mu chitendewele."

14 "Mu chilambo chakumpanga Ambuje Akunnungu, Akunnungu ŵenu, chiŵe chenu nkajityosya mipika ja jwapachiŵandi penu jeŵiche chile ni achachekulu ŵenu."

15 "Umboni wa mundu jumo ngaukukwanilisya kunlamula mundu nkati chileŵo chachilichose pane ugongomalo uliwose wautesile. Chindu chikusachilwa chisalikwe ni ŵaumboni ŵaŵili pane ŵatatu, pelepo ni pachichikundikwe. 16 Iŵaga mundu akunlambuchisya njakwe magambo ni akusimanikwa kuti akuŵecheta ya unami, 17 mundu jwakuŵechetelwa magambo jo ni mundu jwakupeleka umboni wa unani, wosepe ajaule pauto pakupopelela paujo pa Ambuje Akunnungu kuti akalamulikwe ni ŵambopesi ni ŵakulamula ŵaali pamasengo pa lyele lyuŵa lyo. 18 Ŵakulamula akusachilwa auchilichisye chenene nkati magambo go. Jwaumboni awonekaga kuti ali jwaunami ni sooni iŵaga akummechetela njakwe kwa unami, 19 mumpanganyichisye mwakulandana ni mwele mwakasachile jwalamulikwe apanganyichiswe. Pakutenda yeleyo ŵandu ngaatenda chakusakala chanti yeleyo pasikati penu. 20 Ŵandu ŵane pachapikane chajogope, ni ugongomalo wanti nyi ngautyochela sooni pasikati jenu. 21 Nkalosya chanasa kwa ŵandu ŵanti nyi. Umi chiulipilwe ni umi, liso ni liso, ni lino ni lino ni nkono ni nkono ni lukongolo ni lukongolo."