1 Kwaŵaga ni umenyani pasikati ja ŵandu ŵaŵili, ajaulaga ku nkungulu, jumo asimanikwaga jwangali chileŵo ni jwine kulamulikwa kuti akwete chileŵo, 2 iŵaga mundu jwakwete chileŵo jo alamulikwe kuputikwa mbokola, jwakulamula jo chanlamulile jwakuleŵa jo kuti agone pasi ni kuputikwa mbokola malinga ni chileŵo chakwe. 3 Akukomboleka kuputikwa mbokola alobaini, nambo ikapunda pelepo. Iŵaga ikupunda pelepo, timuntende akole soni mpwenu jo.

4 Nkajitaŵa kukang'wa ng'ombe jajikupanganya masengo gakuputukula magungulo.

5 "Iŵaga mundu ni mpwakwe akutama pamalo gamo ni jumo akuwa, nambo nganaleka mwanache jwannume, jwankongwe jwawililwe ni ŵankwakwe jo akalombekwa ni mundu jwa paasa nnango wo. Mpwakwe maleemu jo tajinjile majumba kwa jwele jwankongwe jo. 6 Mwanache jwannume jwandanda kupagwa mwele mu nyuumba mo tachiŵalanjikwa kuti ali mwanache jwa maleemu kuti liina lyakwe likawa mu chilambo cha Isilaeli. 7 Nambo iŵaga nlongo jwa maleemu jo ngakusaka kulombela jwankongwe jo, nipele jwankongwe jo ŵaajaulile achakulungwa ŵa musi wo pannango wekulungwa wakwinjilila mmusi ni kwasalila, ‘Nlongo njakwe maleemu ŵankwangu ngakusaka kulombela une kuti meleche, liina lya maleemu jo likawa mu chilambo cha Isilaeli.’ 8 Pelepo achakulu wa musi wo chammilanje ni kukunguluka nao. Iŵaga chajendelechele kukana kuti ngakulombela, 9 jwele jwankongwe jwa maleemu jo ajaule kwa nlambagwe, achakulu wa musi wo ali nkunlolechesya, ammule chilatu cha lukongolo lumo ni kunsunila mata kumesoni kunsalila, ‘Yelei ni ikuti kuŵajilwa kumpanganyichisya mundu jwakukana kuutenda uŵelesi wa nkulugwe ujendelechele.’ 10 Ŵandu ŵa munyuumba ja mundu jo chamanyiche mu Isilaeli mpela ‘Nyuumba ja mundu jwaulikwe chilatu.’ "

11 "Iŵaga achalume ŵaŵili akumenyana, ni jwankongwe jwa jwannume jumo, pakusaka kwakamuchisya ŵankwakwe akunkamula mundu jwakumenyana ni ŵankwakwe wo ku yalo, 12 nkankolela chanasa jwele jwankongwe jo, munkate nkono wakwe."

13 "Nkaajiŵila ŵandu pakola maganga gaŵili gakupimila, limo lyakutopa ni liine lyangatopa. 14 Nkakola ni yakupimila iŵili yakupisyangana mu nyuumba jenu, chimo chekulungwa ni chiine chenandi. 15 Liganga lyakupimila, ni ipimo iŵeje mpela yaikuti kusachilwa kuti nkatame moŵa gamajinji mu chilambo chakumpa Ambuje Akunnungu, Akunnungu jwenu, kuti chiŵe chenu. 16 Pakuŵa Ambuje Akunnungu, Akunnungu ŵenu, akwachima ŵandu ŵakuitendekanya indu mpela ayiyi ya kwalambusya ŵandu."

17 "Nkaliŵalila achila chiŵantesile Ŵaamaleki pamwaliji mwitala kutyoka ku Misili. 18 Nkumbuchile pamwaliji mpesile kwannope ŵankuiye munyuma ni kwaulaga wose ŵaŵaikaga panyuma ligongo lyakupela. Ŵaamaleki nganiŵaajogopa Akunnungu. 19 Kwayele, Ambuje Akunnungu, Akunnungu ŵenu patachimpumusya ni ngondo ja ŵammagongo wenu ŵakutama mwakusyungulila chilambo chitakampe mwanya kuti chiŵe chenu, nkusachilwa mwaulaje Ŵaamaleki wose, nkaliŵalila.