1 "Ŵambopesi ŵaali Ŵalawi ni lukosyo lose lwa Ŵalawi, ngaapegwa lisi kuti liŵe lyao mu chilambo cha ku Isilaeli. Ŵanyawo tachitama ali nkulya mbopesi ni sadaka sine syasikutyochekwa kwa Ambuje Akunnungu. 2 Kwayele ŵanyawo ngapengwa lisi kuti liŵe lyao mpela ngosyo sine sya Ŵaisilaeli syasitite kupegwa, yaikwaŵajila ŵanyawo kuli kuŵa ŵambopesi ŵa Akunnungu mpela Ambuje Akunnungu iŵatite pakwalanjila."

3 "Ŵandu pakutyosa sadaka iŵeje ng'ombe pane ngondolo, ŵambopesi chapegwe lukongolo lwa mbujo ni chimbundi ni matuumbo nti liunjili lyao. 4 Chinchapa milimbu ja magungulo genu ni ja divai jasambano ni ja mauta ga mseituni, ni manyunya ga ngondolo gankugakata kaandanda. 5 Pakuŵa kutyochela mu ngosyo syenu syosye Ambuje Akunnungu, Akunnungu ŵenu asagwile lukosyo lwa Ŵalawi litumiche mpela ŵambopesi moŵa gose pangali mbesi."

6 "Iŵaga Mlawi asachile nsyene akukombola kutyoka ku musi wauliwose wa Ŵaisilaeli ni kwaula akula kwakusagwile Akunnungu kuti ŵaapopelele, 7 pelepo akukombola kwatumichila Ambuje Akunnungu, Akunnungu ŵakwe nti Ŵalawi ŵane yakuti kwatumichila Ambuje Akunnungu kweleko. 8 Tachipochela yalumo liunjili lya yakulya mpela yakuti kupochela ŵambopesi ŵane, namose akwete mbiya syakupata kwakusapulilwa ni achalongo achinjawo pakusumisya indu yao.

9 "Pachinjinjile mu chilambo chaakumpa Ambuje Akunnungu, Akunnungu ŵenu, nkalijiganya kuitendekanya indu ya uchimwa kutyochela kwa ŵandu ŵa ilambo yo. 10 Ngasawoneka mundu jwalijose pasikati jenu jwakuntyosya mbopesi jakutinisya nchanda jwakwe pane mwali jwakwe pa mooto wa pa chilisa, pane jwachisango pane jwakusagamukula indu yakatema pane jwausaŵi, 11 namose jwakuloga pane jwa majiini pane jwakugapopelela masoka pane jwakwaŵenda ŵandu ŵawile. 12 Mundu jwalijose jutaitendekanye indu yi ali uchimwa kwa Ambuje Akunnungu, ni kwaligongo lya yele indu yauchimwa yo Ambuje Akunnungu, Akunnungu ŵenu, akwatopola ŵandu ŵa ilambo yo mbujo mwenu. 13 Mme ŵakukulupilichika kwannope paujo pa Ambuje Akunnungu, Akunnungu ŵenu."

14 Nipele che Musa ŵajendelechele kuŵecheta kuti, "Ŵandu ŵa ilambo ine uchinchiijigala ilambo yao iŵe yenu akwapikanila ŵandu ŵakulondola ni ŵachisango. Nambo Ambuje Akunnungu, Akunnungu ŵenu, ankanyisye ŵanyamwe kuitendekanya yele indu yo. 15 Ambuje Akunnungu, Akunnungu ŵenu, tachinsagulila jwakulondola mpela une pasikati ja Ŵaisilaeli achinjenu, mumpikanileje jwelejo."

16 "Mpela imwaachondelele Ambuje Akunnungu, Akunnungu ŵenu ku Sinai kula, pa lyuŵa limwasongangene nchitiji, ‘Tukalipikana liloŵe lya Ambuje Akunnungu, Akunnungu ŵetu namose kuuwona mooto wekulungwa wu sooni, tukaika kuwa.’ 17 Ambuje Akunnungu ŵatite, ‘Chaakusala chili chisyene. 18 Chinaasagulile jwakulondola mpela mmwe pasikati ja Ŵaisilaeli achinjawo, chinjasalila chakusala, nombewo chachaasalila inayose ichinjalajisya. 19 Iŵaga jwalijose ngaagapikanila maloŵe ga jwakulondola gatinaasalile aŵechete, chinjimputa nansyene. 20 Nambo jwakulondola juchaŵechete chindu chilichose chinganinalajisya asale, pane kuŵecheta chindu chaasalilwe ni minungu jine, jwakulondola jo chaulajikwe.’ "

21 "Nambo ŵanyamwe nkukombola kuliusya, chinkombole chinauli kwimanyilila kuti liloŵe li nganilityochela kwa Ambuje Akunnungu? 22 Iŵaga jwakulondola chaaŵechete chindu achitiji, ‘Ambuje Akunnungu asasile,’ naga chindu cho ngachikutyochela pane ngaŵa cha usyene, chindu cho nganasala Ambuje Akunnungu. Jwakulondola jo aŵechete yeleyo kwa chibuli, ni ŵanyamwe nkanjogopa mundu jo."