1 Che Musa ŵajendelechele kwasalila Ŵaislaeli kuti, "Ngapilikanile malamusi ni majiganyo gingunjiganya kuti nkatame ni kuchitenda chiŵe chenu chilambo chati Ambuje Akunnungu ŵa achachekulu ŵenu akumpanga. 2 Ngasinjonjechesya chachilichose mmakanyo gingumpanga, atamuno ngasimpungusya chindu. Nkamulichisye malamusi gose ga Ambuje Akunnungu ŵenu, gingumpanga. 3 Ŵanyamwe mwalionele indu iŵaipangenye Ambuje Akunnungu akula ku Baali Peoli. Ambuje Akunnungu ŵenu ŵaauleje ŵandu ŵa munkutule mwenu ŵaŵampopelelaga jwele nnungu Baali Peoli jo. 4 Nambo ŵanyamwe umwaliji ŵakukulupilichika kwa Ambuje Akunnungu ŵenu, ndi chiŵela ŵajumi mpaka lelojino."

5 "Nnole nanjigenyenje makanyo ni malajisyo ga Ambuje Akunnungu ŵangu yatite pakuunajisya mbanganye, kuti nkamulichisye pachinjinjile mu chilambo chinkwaula kuchitenda chenu cho. 6 Nkamulichisye kwakulupilichika malajisyo go, ni yelei tiyalosye ŵandu ŵa ilambo ine kuti mwanyamwe nli ŵandu ŵanli ni luunda ni pachapikane yankati malamusi go chajile, ‘Kusyene ŵandu ŵa chilambo chekulu chino akwete luunda ni umanyilisi.’

7 "Ngapagwa chilambo chachilichose namose chiŵe ni ukulu wanti uli, chanti nnungu jwakwe ali chiŵandi nawo, mpela yatite kutuŵandichila uwe Ambuje Akunnungu ŵetu, patukwaŵenda akutukamuchisya. 8 Ni ngapagwa chilambo chine chachilichose atamuno chikule chantiuli, chachili ni makanyo ni malajisyo gagakwanonyelesya Akunnungu, mpela ginanjigenye une lelojino. 9 Nambo njende mbole ni kulilolesesya, ngasinyika kuliŵalila indu yandiwonele mwachinsyene. Nkaika kugaliŵalila aila indu inlionele mwachinsyene. Ikaika kutyochela atamuno kamo mu ndamo syenu indu yo kuliŵalikwa mmitima jenu, mwaajiganye ŵanache ni isukulu yenu. 10 Nkumbuchile lyuŵa limwajimi paujo pa Ambuje Akunnungu ŵenu, ku Holebu kula, pasalile, ‘Mwasonganganye ŵandu wo paujo pangu, kuti naasali maloŵe gangu agapikanile kuti alijiganye kunyitichisya une moŵa gose mu ndamo syao syose, ni kwajiganya ŵanache ŵao kutenda yeleyo.’

11 "Nipele, mwaŵandichile ni kwima paasi mungulugulu litumbi lilyakolelaga mooto uwaiche mpaka kwinani lili liunichilwe ni liunde pii ni chipi totolo. 12 Nipele Ambuje Akunnungu ŵakungulwiche ni ŵanyamwe kutyochela pasikati pa mooto ula, nambo nsyene jo nganimummona, mwalipilikene liloŵe lyao pe. 13 Nombewo ŵansalile lilangano lyakwe ni kwalajisya nkamulichisye makanyo likumi gaŵalembile mu ibao iŵili ya maganga. 14 Kele katema ko Ambuje Akunnungu ŵaanajisye nanjiganye malajisyo ni makanyo gose gankusachilwa kugapanganya ku chilambo chinkwaula kuchijigala ni kuchitenda chenu pakumala komboka lusulo lwa Yolodani.

15 "Kwayele njende mbole, ngasinyika kuliŵalila kuti Ambuje Akunnungu paŵaŵechete ni ŵanyamwe ku chitumbi cha Holebu kula pasikati ja mooto nganimwaona uloleche wakwe. Kwayele nndilolechesye nnope, 16 kuti nkatenda sambi kwa kulikolochesya chinyago chachilichose, chakulandana ni chachilichose, iŵeje jwannume atamuno jwankongwe, 17 pane chinyama chachilichose cha pachilambo namose chijuni, 18 pane chinyama chachikukwaŵa atamuno somba sya mmesi. 19 Ni pankulola mwinani ni kuliwona lyuŵa ni mwesi ni ndondwa ni indu yose yaili kwinani, nkalinjikwa kuipopelela ni kuitumichila, pakuŵa indu yo Ambuje Akunnungu, Akunnungu ŵenu, ŵaikolosisye kuti ŵandu wose pachilambo apoche kwa yeleyo. 20 Nambo ŵanyamwe ni uŵankulupusye kutyochela ku Misili mmalagasyo gamakulu mpela kukulupuswa mu chipala. Ŵankulupwisye kuti mme ŵandu ŵakwe mpela yantite kuŵa lelo jino. 21 Ambuje Akunnungu, Akunnungu ŵenu ŵandumbilile kwaligongo lyenu, ni ŵalumbile kuti une nganyomboka lusulo lwa Yolodani kwaula nkati chilambo chachili ni chajila chakumpanga chiŵe chenu. 22 Une chimwilile pachilambo chino nganyomboka lusulo lwa Yolodani, nambo ŵanyamwe mmandichile komboka ni kwaula ku achila chilambo chachili ni chajila chinkwaulanga kutama ni kuchitenda chenu. 23 Ndilolechesye nnope ngasinyika kuliŵalila Lilangano lya Ambuje Akunnungu ŵenu lyapanganyisye ni ŵanyamwe. Ngasinlikolosyesya inyago yaili ni uloleche wa chindu chachilichose chankanyisye Ambuje Akunnungu, Akunnungu ŵenu kwalandanya. 24 Pakuŵa Ambuje Akunnungu, Akunnungu ŵenu ali mooto waukutinisya; ŵelewo ali Akunnungu ŵali ni wiu.

25 "Pachintame pachilambo po kwa yaka yejinji, pachinkole ŵanache ni wisukulu ni pachinchekulupe, nkatenda sambi kwakulikolochesya inyago yaili yose. Nkatenda ugongomalo paujo pa Ambuje Akunnungu, Akunnungu ŵenu, ni kwatumbilisya. 26 Nipele une lelo ngusiŵilanga kwinani ni chilambo iŵe ŵaumboni pasikati jetu, ngunsalilanga kuti iŵaga ngankwitichisya, chinjonasiche kwanakamo kuchilambo chinkwaula kuchijigala chiŵe chenu, kwele pesi lusulo lwa Yolodani ko. Ngantamilisya nnope, nambo chinjonasiche tikitiki. 27 Ambuje Akunnungu champwilinganye pasikati ja ilambo yejinji, ŵandu kanandi pe ni utasigalile kwele kuchanjausye Ambuje Akunnungu. 28 Kweleko chinkapopelele minungu ja itela ni maganga jesepekwe ni makono ga ŵandu, ni jajikulepela kulola ni ngajikupikana, ni ngajikulya atamuno ngajikunusya. 29 Kutyochela mu chilambo pemo chimwasose Ambuje Akunnungu, Akunnungu ŵenu, iŵaga kweleko chimwasose kwa ntima wose ni mbumu jose chimwapate. 30 Masauko gose ga pachigampate kweleko kanyuma, chimwaujilile Ambuje Akunnungu ni kwajitichisya. 31 Ambuje Akunnungu, Akunnungu ŵenu ali Akunnungu ŵa chanasa, ngasannekanga atamuno kunjonanga, namose ngaaliŵalila Lilangano liŵaliŵisile ni achachekulu ŵenu kwa kulumbilila.

32 "Nganichisye nnope indu iyatendekwe kalakala nkanaŵe kupagwa, kutandilila pa lyuŵa Akunnungu paŵangumbile mundu pachilambo. Mmuchilichisye ku ilambo yose, iŵaga kwatyochele atamuno kupikanika chindu chakusimosya chanti nnyi. 33 Uli, ŵandu ŵapikane liloŵe lya Akunnungu lichiŵechetaga kutyochela pasikati pa mooto, mpela yantite pakulipikana ŵanyamwe, ni kusigala ni umi? 34 Uli apali nnungu jwine juŵalinjile kwaula kwajigala ŵandu kutyochela mu chilambo chine kuti ŵaatende aŵe ŵakwe, mpela Ambuje Akunnungu ŵenu, iŵatite pakuipanganya kwaligongo lyenu kwele ku Misili ko? Ŵaipangenye nli nkulola achitumiaga machili gakwe gamakulu, ni ukombole wakwe ni kuichisya iputiko ni ngondo, ŵaitesile yakusimonjeka ni imanyisyo ni sooni ŵatesile indu yejinji yakogoya ikopochele. 35 Akunnungu ŵannosisye ŵanyamwe indu yo, kuti mmanyilile yakuti Ambuje Akunnungu ni ŵali Akunnungu jikape, pangali ŵane. 36 Ŵantesile mpikane liloŵe lyao kutyochela kwinani kuti antende mme ŵandu ŵakwitichisya, ni pachilambo pa ŵantendekasisye muuone mooto wao wekulu ni kulipikana liloŵe lyao kutyochela pa mooto wo. 37 Pakuŵa ŵaanonyele achachekulu ŵenu, ŵansagwile ŵanyamwe ŵanli uŵelesi ŵao, ni kwa ukombole wao wekulu ŵankopwesye ku chilambo cha ku Misili. 38 Ŵaŵinjile mbujo mwenu ŵandu ŵa ilambo yaili yekulungwa ni yaili ni machili ga kumpunda ŵanyamwe, kuti anjinjisye ni kumpa mwanya chilambo chao kuti chiŵe chenu, mpela yaitite kuŵa lelo jino. 39 Nipele, nkumbuchile lelo jino ni nnyitaje mmitima jenu, kuti Ambuje Akunnungu ni ŵaali Akunnungu kwinani ni pachilambo, ngapagwa ŵane. 40 Nipele ngakamulisye malajisyo gao ni malamusi gao gangumpa leo jino kuti mpate upile, mwanyamwe pamo ni uŵelesi wenu, ni kutamilisya moŵa gamajinji pa chilambo champele Ambuje Akunnungu ŵenu kuti chiŵe chenu."

41 Nipele che Musa ŵajisagwile misi jitatu jajili kungopochelo lyuŵa kwa Yolodani, 42 jati mundu jwauleje pangaŵa yamele njakwe jwanganaŵa jwammagongo jwao, akakombwele kutilila. Mundu mpela jwele ikukomboleka kutilila nkati musi umo wakwe kuti akaulajikwa. 43 Ŵusagwile musi wa Beseli wauli kuchiŵata cha lipululu kwa ligongo lya lukosyo lwa Lubeni; musi wa Lamoti ku chilambo cha ku Gileadi kwa ligongo lya lukosyo lwa Gadi, ni musi wa Golani ku chilambo cha ku Bashani kwa ligongo lya lukosyo lwa Manase.

44 Ali lili lilajisyo lya che Musa liŵapele Waislaeli. 45 Aga ni malajisyo ni makanyo ni mashaliti gati che Musa ŵasalile Ŵaisilaeli natyokape ku Misili, 46 paŵaliji pesi lusulo lwa Yolodani, kulichemba lyalili mmbujo mwa Beti Peoli, ku chilambo chichaliji cha mwenye che Sihoni jwa Ŵaamoli, ŵaŵatawele kutandilila ku musi wa Heshiboni, ŵaŵaputikwe ni che Musa ni Ŵaisilaeli natyokape ku Misili. 47 Ŵachijigele chilambo chakwe ni chilambo cha mwenye che Ogu jwa ku Bashani. Mamwenye ŵaŵili ŵa Ŵaamoli wo ŵatawele chakungopochelo lyuŵa kwa lusulo lwa Yolodani. 48 Chilambo cho chajenele kutandilila ku Aloeli mungulugulu lusulo lwa Alinoni, mpaka kuchitumbi cha Silioni yani Helimoni, 49 pamo ni malo jose ja kungombochelo lyuŵa kwa Yolodani mpaka ku Bahali ja Njete, kujipelele nduluko sya litumbi lya Pisiga.