1 Che Musa ŵajendelechele kuŵecheta, "Agano ni makanyo ni malajisyo ni mashalaiti gachinkagapanganye ku chilambo chakumpanga Ambuje Akunnungu, Akunnungu ŵa achachekulu ŵenu kuti chiŵe chenu, kwa moŵa gose gachinkatame mu chilambo mo. 2 Ngumule kusyenesyene mwakusimanilana kujipopelela milungu jao yaŵaga mmatumbi gamaleu, pane mu ikwesya ni kuusi itela yaili ni mbwilili wekulungwa. 3 Nkaigumule ilisa yao ni kugakasanya maganga gawo gakugapopelela. Ntinisye kwa mooto njanamila sya nnungu jwankongwe jwakuŵilanjikwa Ashela, ni nkaikatanyekatanye inyago yao yakusepa ni kugasimasya mena ga minungu jao pa malo po."

4 "Atamuno ngasimwapopelela Ambuje Akunnungu, Akunnungu ŵenu, mpela yakuti kujipopelela minungu jao. 5 Nambo tinjaule pa liuto patapasagule Ambuje Akunnungu, Akunnungu ŵenu, mu ngosyo syose kuti alikondesye liina lyao, sooni kuti paŵe malo gakwe, kweleko ni kuchinkajaule. 6 Kweleko chinkapeleche mbopesi syenu syakutinisya ni sadaka sya chijama ni liunjili lya kakumi ni sadaka sya nasili ni sadaka sya michango ni sadaka syankupeleka pangankanganisisya ni mmeleko waandanda wa ng'ombe ni ngondolo syenu. 7 Kweleko, chinkalye paujo pa Ambuje Akunnungu, Akunnungu ŵenu, chinkalye ni kusengwe pamo ni ŵa pannango penu indu yambone yejinji yampele Ambuje Akunnungu, Akunnungu ŵenu pakumala kupanganya masengo."

8 "Ngasintenda nti yankuti kutenda lelo jino, mundu jwalijose akulitendela yakuti kusaka nsyene, 9 pakuŵa chiŵela nganinjinjile pa chilambo chati Ambuje Akunnungu, Akunnungu ŵenu akumpa chiŵe chenu kuti nkatame kwa chitendewele. 10 Nambo patinjomboche lusulo lwa Yolodani ni kwaula kuchijigala chilambo chakumpanga Ambuje Akunnungu, Akunnungu ŵenu kuti chiŵe chenu, tantendekasye ntame kwa kutulala, pangansausya ŵammagongo ŵenu wose ŵatansyungulile kuti ntameje kwa chitendewele. 11 Nipele pamalo pati Ambuje Akunnungu, Akunnungu ŵenu, tapasagule kuti ŵandu ŵapopelele Ambuje Akunnungu, pelepo ni pachimpeleche chindu chachili chose chitannamulile: Mbopesi syenu syakutinisya ni sadaka sya chijama ni liunjili lya kakumi ni sadaka sya nasili ni sadaka sya michango ni sadaka syankupeleka pangankanganisisya ni mmeleko wa ndanda wa ng'ombe ni ngondolo syenu. 12 Nkaŵeje ŵandu ŵakusangalala paujo pa Ambuje Akunnungu, Akunnungu ŵenu, pamo ni ŵanache ŵenu ŵa chilume ni ŵa chikongwe, ŵakutumichila ŵenu, ni Ŵalawi ŵakutama pa misi jenu, pakuŵa ŵanyao nganakola lisi lyachiliŵe lyao. 13 Ndilolechesye ngasinjaula kupeleka mbopesi syenu sya kutinisya pa malo jakulisosela mwachinsyene. 14 Nambo pa malo patapasagule Ambuje Akunnungu pasikati lukosyo lumo mu ngosyo syenu. Pelepo ni pachinkapeleche sadaka syenu sya kutinisya, sooni ni pachinkatendele yosepe inannamulile."

15 "Nambo ngankulekaswa kusikita ni kulya inyama yenu mmisi muchinkatame mo. Nkalyeje nyama muchinkasachile, kutyochela mu inyama mpela ichimpate upile ni Ambuje Akunnungu. Ŵandu wose nkalyeje, ŵangakukundikwa ni ŵakukundikwa paujo pa Akunnungu, nkalyeje mpela inkuti kulya ndandala pane mbaŵala. 16 Nambo ngasinlya myasi ja inyama yo; nkajijite pasi mpela meesi. 17 Nkaliila mmisi jenu sadaka sya liunjili lya kakumi lya magungulo genu, ni ja divai jenu, ni ja mauta genu, ni ja mmeleko waandanda wa ng'ombe ni ngondolo syenu, ni sadaka syenu sya nasili pane syankupeleka pangankanganichisya, namose yakwapelechela ineine. 18 Pamalo pakwe nkalyeje yakupeleka yo paujo pa Ambuje Akunnungu, Akunnungu ŵenu pamalo patapasagule Ambuje Akunnungu, Akunnungu ŵenu: ŵanyamwe ni ŵanache ŵenu achakongwe ni achalume ni ŵakutumichila ŵenu achakongwe ni achalume pamo ni Ŵalawi ŵakutama mu misi jenu. Nlisengwasye paujo pa Ambuje Akunnungu ŵenu kwa yose yampele. 19 Nkalilolesesye kuti, ndaŵi jose jichinkatame nchilambomo, ngasinjenda kwaliŵalila Ŵalawi."

20 "Ambuje Akunnungu, Akunnungu ŵenu, patakachikusye chilambo chenu mpela iŵatite kunlanjila. Naga chinkaŵe ni lukowo lwa kulya nyama ni nkusaka kulya nyama, nkukomboleka kulya munkusachila. 21 Naga malo jitajisagule Ambuje Akunnungu, Akunnungu ŵenu, kuti ŵandu ajaule akaapopelele kwaŵaga kutaliche, nkukombola kusikita ng'ombe pane ngondolo jwalijose jwampele Ambuje Akunnungu, mpela inatite pakunsalila kuti nkukombola kulya nyama jo munkusachila mmisi jenu. 22 Chinlye nyama jo mpela yaikuti kuligwa ndandala ni mbaŵala. Mundu jwalijose jwakukundikwa ni jwangakundikwa paujo pa Akunnungu, akukombola kulya. 23 Nambo nlilolechesye ngasinlya myasi, pakuŵa myasi jili umi; nipele ngasinlya myasi pamo ni nyama. 24 Ngasinlya myasi jo, nambo njijite pasi mpela meesi. 25 Nkalya myasi, kuti indu yenu pamo ni uŵelesi wenu inkondele, pakuŵa nkutenda yambone paujo pa Ambuje Akunnungu. 26 Indu yammiisile ligongo lya Ambuje yachimpeleche ni sadaka syenu sya nasili, chinsijigale ni kusipeleka pa malo patapasagule Ambuje Akunnungu. 27 Njisenawo mbopesi sya kutinisya, pachilisa cha Ambuje Akunnungu, Akunnungu ŵenu, nyama ni myasi jakwe. Iyoyo ni sadaka sine syati chinchilya nyama jakwe, myasi jakwe chinjitile mu mbali mwa chilisa. 28 Nlilolesesye kuikamulisya ayi inunnamulila yi kuti indu yenu injendechele yambone ŵanyamwe pamo ni uŵelesi ŵenu moŵa gangali mbesi, pakuŵa chintende chachili chambone ni chausyene paujo pa Ambuje Akunnungu ŵenu."

29 "Ambuje Akunnungu, Akunnungu ŵenu, tiŵajonanje kusyene ŵandu ŵa ilambo inkuŵandichila kwinjila ni kwatyosa. Nambo pachimwatopole ni kutama mu chilambo chao, 30 nlilolesesye ngansinditanjisya kwa kugakuya matala gao ga kupopelela minungu jao. Nkalinga kuuchilichisya yankati minungu jao, nchitiji ‘Ŵandu ŵa ŵapopelelega chinauli milungu jao? Noweji tutende iyoyo.’ 31 Ngasimwapopelela Ambuje Akunnungu, Akunnungu ŵenu, mpela ŵanyawo yakuti kwapopelela nnungu jwawo, pakuŵa pakujipopelela minungu jao akuitendekanya indu yaikwachimikasya Ambuje Akunnungu atamuno akwachoma pa mooto ŵananche ŵao ŵa chilume ni ŵachikongwe, mpela sadaka kwa minungu jao."

32 "Nlilolechesye kuti nkupanganya yose ingunnamulila; ngasinjonjechesya chachilichose namose nkapungusya."