1 "Nipele twagalawiche ni kwaula ku Bashani. Mwenye che Ogu ŵatyosile ni ŵandu ŵakwe wose kwika kukuputana ni uwe chiŵandi ni musi wa ku Edilei. 2 Nambo Ambuje Akunnungu ŵasalile, ‘Nkajogopa pakuŵa une nantendekasisye mwapunde ŵandu ŵakwe wose ni chilambo chakwe. Mwatende mpela imwatendele che Sihoni mwenye jwa Ŵaamoli juŵatawalaga ku Heshiboni kula.’"

3 "Nipele, Ambuje Akunnungu, ŵatutendekasisye twapunde che Ogu mwenye jwa ku Bashani ni ŵandu ŵakwe, twaauleje wose, nganitunsigasya mundu jwalijose. 4 Twajisumwile misi jose ngapagwa atamuno musi umo utwaulesile. Misi jitwajisumwile jaliji misi sitini, yaani misi jose ja Aligobu jati mwenye che Ogu jwa ku Bashani ŵatawele. 5 Misi jose ji jaliji ni makome gagali ni makumba gamaleu, gagali ni milango ni njinjili sya chisyano. Nombe kwaliji ni misinda jejinji jangasunguchisya makumba. 6 Twajijonasile misi jose ni kwaulaga achalume, achakongwe, ni ŵanache mpela itwatite pakumpanganyichisya che Sihoni mwenye jwa ku Heshiboni. 7 Nambo ilango yose pamo ni ipanje twajigele ni kuitenda yetu."

8 "Katema kala twasumwile chilambo mamwenye ŵaŵili ŵa Ŵaamoli ŵaŵatemi pesi lusulo lwa Yolodani, pasikati ja lusulo lwa Alinoni ni chitumbi cha Helimoni. 9 Chitumbi cha Helimoni Ŵasidoni akuchiŵilanga Silioni, nombe Ŵaamoli akuchiŵilanga Senili. 10 Twasumwile misi jao jajili ku chiŵata, sooni ni malo jose ja ku Gileadi ni ku Bashani mpaka ku Saleka ni ku Edilei, misi ja mwenye che Ogu jajili ku Bashani."

11 "Mwenye che Ogu ni juŵasigele jika munkutule wa Ŵalefai. Chindanda chao chaliji chekolosye ni chisyano, chaliji ni uleu wa mita ncheche ni chanchijipi mita siŵili, malinga ni ipimo isyoŵelechekwe. Chindanda cho chili chiŵela mu musi wa Ŵaamoli kwele ku Laba ko."

12 "Pakumala kuchijigala chilambo chila, naapele ngosyo sya Lubeni ni Gadi liuto lyalili kumpoto kwa musi wa ku Aloeli chiŵandi ni lusulo lwa Alinoni malo ga chilambo cha matumbi ga Gileadi, pamo ni misi jakwe. 13 Nipele mbindikati ja ŵandu ŵa lukosyo lwa Manase naapele liuto lilyasigele muchilambo cha Gileadi pamo ni ku Bashani kose kuŵatawele che Ogu."

"Liuto lyose lya Aligobu mu chilambo cha Bashani lyamanyiche kuti chilambo cha Walefai. 14 Mundu jumo jwa lukosyo lwa Manase juŵaŵilanjikwe che Yaili, ŵajigele liuto lyose lya chilambo cha Aligobu yaani Bashani kuichila mumpika wauli pasikati ja Geshuli ni Maaka. Misinda jose ŵajipele lina lyakwe, ni lelojino jikuŵilanjikwa Hawoti Yaili yaani misinda ja che Yaili."

15 "Ŵandu ŵa nnango wa che Makili ŵa lukosyo lwa Manase napele chilambo cha Gileadi. 16 Ni ŵandu ŵa ngosyo sya Lubeni ni Gadi naapele chilambo chose kutandilila ku Gileadi mpaka ku lusulo lwa Alinoni. Mpika wao cha kulujenda waliji pasikati pa lusulo nombe cha kumpoto waliji kulusulo lwa Yaboki uwapakene ni chilambo cha Ŵaamoni. 17 Mpika wao chakumaswelelo lyuŵa waiche ku lusulo lwa Yolodani, chakumpoto wajendelechele mpaka ku litanda lya Galilaya, chakulujenda wajendelechele mpaka kujili bahali ja njete, ni chakungopochelo lyuŵa mpaka wao waiche ku chitumbi cha Pisiga."

18 "Katema kakoko nansalile, ‘Ambuje Akunnungu, Akunnungu ŵenu ampele chilambo chi chakungombochelo lyuŵa mwa lusulo lwa Yolodani kuti chiŵe chenu. Sambano ŵanyamwe ŵangondo ŵanli ni yakumenyanilana, njomboche lusulo lwa Yolodani kwakamuchisya ŵandu ŵa ngosyo sine sya ku Isilaeli kwigala ilambo yao. 19 Nambo achiŵankwenu ni ŵanache ŵenu ni inyama yenu, pakuŵa ngumanyilila kuti nkwete ilango yejinji, chaasigale ku misi jinampele. 20 Mwakamusye achalongo achinjenu Ŵaisilaeli mpaka pele pachajigale chilambo chati Ambuje Akunnungu chiŵape kumaswelelo lyuŵa kwa lusulo lwa Yolodani ni mpaka pele Ambuje Akunnungu pachiŵatende atame kweleko mu chitendewele mpela yatite kupanganya ku ŵanyamwe. Pakumala yele ni pachinkombole kuuja ku ilambo yenu mwachinsyene.’"

21 "Nipele nansalile che Yoshua, ‘Mmwe mwasyene nnyiweni indu yose yati Ambuje Akunnungu, Akunnungu ŵenu iŵaatesile ŵele mamwenye ŵaŵili wo, yaani che Sihoni ni che Ogu. Kwanti iyoyo ni itajile pakwapanganyichisya mamwenye ŵa ilambo yose ichinkasumule. 22 Nnaajogope pakuŵa Ambuje Akunnungu, Akunnungu ŵenu tamenyane nawo kwaligongo lyenu.’"

23 "Katema ko naachondelele Ambuje Akunnungu njitiji, 24 ‘Alakwe Ambuje Akunnungu, ntandite kuunosya une jwakutumichila jwenu ukulu wenu ni ukombole wenu. Pakuŵa nnungu chi jwali kwinani pane pachilambo jwakukombola kutenda indu yekulungwa ni yakusimonjeka mpela inkuitenda alakwe? 25 None ngunchondelela mungunde nyomboche, ngachione chilambo chambone chachili pesi lusulo lwa Yolodani, pamo ni chilambo chambone cha matumbi ga Lebanoni.’"

26 "Nambo Ambuje Akunnungu ŵandumbilile kwa ligongo lyenu, ŵakanile kumbikanila. Pamalo pakwe ŵasalile, ‘Ikwanile! Nkaŵecheta sooni liloŵe li. 27 Nkwele mpaka ku lusonga lwa litumbi lya Pisiga, nnole yambone mbande sya kulikuswelela lyuŵa ni kumpoto ni kulujenda ni kungombochelo lyuŵa, nchilole chilambocho; nambo mmwe nganjomboka alu lusulo lwa Yolodani. 28 Nambo mwalajisye che Yoshua, nkaatulasye ntima ni kwalimbikasya, pakuŵa ŵelewo ni uchiŵalongosye ŵandu ŵa, ajomboche lusulo mpaka pesi ni kuchijigala chilambo chachinchiwone ni kuchitenda chao.’"

29 "Nipele, twasigele palichemba palapala, chiŵandi ni musi wa Beti Peoli."