1 Nipele che Musa pamo ni achakulu ŵa Ŵaisilaeli ŵaalamulile ŵandu kuti, "Ngakamulisye malajisyo gose gingumpanga lelojino. 2 Palyuŵa litinjomboche lusulo lwa Yolodani ni kwinjila mu chilambo chakumpanga Ambuje Akunnungu, Akunnungu ŵenu, chinjimiche maganga gamakulungwa ni nkagasyasyajile. 3 Pachanya pakwe nkalembe malajisyo gose ga, pachinkajinjile mu chilambo chachili ni chajila chachikufai kwa kulima ni kulanga ilango yejinji mpela Ambuje Akunnungu, Akunnungu ŵa achambuje ŵenu iŵanlanjile. 4 Patinkamale komboka lusulo lwa Yolodani nkagajimiche maganga ga pa chitumbi cha Ebali mpela inguti kunlajisya lelojino, ni nkagasyasyajile. 5 Kweleko nkaataŵile Ambuje Akunnungu, Akunnungu ŵenu, chilisa chakutyochesya mbopesi, nambo nkakolosye ni maganga gangasepekwa. 6 Elo, chilisa chilichose chinkwataŵila Ambuje Akunnungu, Akunnungu ŵenu chikusachilwa kutaŵikwa ni maganga gangasepekwa. Nkapelecheje mbopesi syakutinisya kwa Ambuje Akunnungu, Akunnungu ŵenu pa chilisa po. 7 Mpelecheje mbopesi sya chitendeŵele ni kulila papopo ni kusengwa paujo pa Ambuje Akunnungu, Akunnungu ŵenu. 8 Nkagalembe maloŵe gosepe ga malajisyo ga mwakuwoneka chenene pa maganga po."

9 Nipele che Musa ni ŵambopesi ŵaali Ŵalawi ŵaasalile Ŵaisilaeli wose, "Ntame jii Ŵaisilaeli wose, mpikanile, lelojino mmele ŵandu ŵakwe Ambuje Akunnungu, Akunnungu ŵenu. 10 Kwayeleyo mpilikanichisye chaakusala Ambuje Akunnungu, Akunnungu ŵenu nchikuyaga makanyo gakwe ni malajisyo gakwe gingumpanga lelojino."

11 Palyuŵa lilalila che Musa ŵaalajisye ŵandu achitiji, 12 "Pachinjomboche lusulo lwa Yolodani, ngosyo si tisijime pa litumbi lya Gelisimu kupikanila katema Ambuje Akunnungu patachapa upile ŵandu: Lukosyo lwa Simeoni ni Lawi ni Yuda ni Isakali ni Yusufu ni Benjamini. 13 Ngosyo sya Lubeni ni Gadi ni Asheli ni Sabuloni ni Dani ni Nafutali tisijime pa chitumbi cha Ebali kupikanila katema Ambuje Akunnungu pakwalwesya ŵandu. 14 Nombe Ŵalawi chiŵasalile ŵandu wose ŵa ku Isilaeli kwaliloŵe lyakunyanyisya."

15 " ‘Alweseche mundu jwalijose jwakupanganya chinyago chakusepa pane chakusyana ni kuchipopelela mwakusisika, chindu chekolosye ni makono ga ŵakolosya ni sooni chachili uchimwa kwa Ambuje Akunnungu, Akunnungu ŵenu.’ "

"Ni ŵandu wose tachijanga kuti, ‘Eloo!’ "

16 " ‘Alweseche mundu jwalijose jwanganchimbichisya atatigwe pane achikulugwe.’ "

"Ni ŵandu wose tachijanga kuti, ‘Eloo!’ "

17 " ‘Alweseche mundu jwalijose jwakusejechesya mipika ja jwaŵandikene nawo.’ "

"Ni ŵandu wose tachijanga kuti, ‘Eloo!’ "

18 " ‘Alweseche mundu jwalijose jwakunsoyasya litala mundu jwangalola.’ "

"Ni ŵandu wose tachijanga ‘Eloo!’ "

19 " ‘Alweseche mundu jwalijose jwakummonela jwannendo ni ŵamalekwa ni achakongwe ŵawililwe ni achiŵankwawo, kuti akapata yakusachilwa kupata.’ "

"Ni ŵandu wose tajitichisye kuti, ‘Eloo!’ "

20 " ‘Alweseche jwannume jwalijose jwakugona ni ŵakongwe ŵa atatigwe pakuŵa ŵatesisye soni atatigwe.’ "

"Ni ŵandu wose tachijanga ‘Eloo!’ "

21 " ‘Alweseche mundu jwalijose jwakugona ni chinyama chachilichose.’ "

"Ni ŵandu wose tachijanga ‘Eloo.’ "

22 " ‘Alweseche mundu jwalijose jwakugona ni alumbugwe, aŵeje alumbugwe jwakulekangana achikulu pane alumbugwe jwakulekangana atati.’ "

"Ni ŵandu wose tachijanga ‘Eloo.’ "

23 " ‘Alweseche mundu jwalijose jwakugona ni akwegwawo ŵakongwe.’ "

"Ni ŵandu wose tachijanga ‘Eloo!’ "

24 " ‘Alweseche mundu jwalijose jwakummulaga njakwe kwa chisyepela.’ "

"Ni ŵandu wose tachijanga ‘Eloo!’ "

25 " ‘Alweseche mundu jwalijose jwakupochela hongo kuti ammulaje njakwe jwangali ni chileŵo.’ "

"Ni ŵandu wose tachijanga ‘Eloo!’ "

26 " ‘Alweseche mundu jwalijose jwakukana kugajitichisya ni kugapilikanila aga maloŵe ga malajisyo ga.’ "

"Ni ŵandu wose tachijijanga ‘Eloo!’ "