1 "Iŵaga nkugapilikanichisya maloŵe gosepe ga Ambuje Akunnungu, Akunnungu ŵenu ni kugasunga mwakulupichika malajisyo gose gingumpa lelojino, Ambuje Akunnungu, Akunnungu ŵenu tachintenda mme chilambo chachikulungwa kupunda ŵandu ŵa ilambo yose ya pachilambo. 2 Mwampilikanichisyaga Ambuje Akunnungu, Akunnungu ŵenu upile wose wu tiuchiŵa wenu."

3 "Ambuje tachimpa upile mu yose ichinchipanganya mwaŵaga mu misi jenu ni tachimpa upile mwaŵaga mmigunda jenu."

4 "Ambuje Akunnungu tachimpa upile wakola ŵanache achajinji, ni magungulo gamajinji ni kola ng'ombe ni ngondolo syejinji."

5 "Ambuje Akunnungu tachimpa upile kwa kumpa magungulo gamajinji ni mu yakulya itinkolosye kutyochela ni magungulo go."

6 "Ambuje Akunnungu tachimpa upile mu kila chindu chinkuchipanganya."

7 "Ambuje Akunnungu tachinkamuchisya kuti mwapunde pa ngondo ŵammagongo ŵenu paakungunguluchila. Aikaga kukungunguluchila kwa litala limo tachimmutuka kwa matala saba."

8 "Ambuje Akunnungu tachipeleka upile pa ikuti yenu ya yakulya ni pa kila chindu chinkuchipanganya. Ambuje Akunnungu takampe upile ŵanyamwe mu chilambo chakumpanga cho."

9 "Iŵaga chinkaapikanile Ambuje Akunnungu, Akunnungu ŵenu, ni kuipanganya indu yose yakunlamulila, takantende ŵanyamwe kuŵa ŵandu ŵakwe nsyene mpela muŵalanjile. 10 Sooni ŵandu wose ŵa pachilambo tachilola kuti Ambuje Akunnungu, ansagwile ŵanyamwe kuŵa ŵandu ŵakwe, ni tachiŵa ali nkunjogopa. 11 Ambuje Akunnungu tachimpa upile wejinji, tachimpa ŵanache ŵajinji, ni ilango ni yakulya yejinji mu chilambo chiŵatesile chilanga ni achambuje ŵenu kuti tachimpa ŵanyamwe. 12 Ambuje Akunnungu tachintumichisya ula kutyochela kumalo kwakujigosa kwinani pa katema kakwe, sooni tachimpa upile pa masengo genu gose gatinkagapanganye. Tinchakongosya ŵandu ŵa ilambo ine nambo ŵanyamwe ngankongola kukwawo. 13 Ambuje Akunnungu tachintenda mme ŵakwalongosya ŵandu ŵa ilambo ni ngaŵa kunlongosya. Iŵaga nkugapilikanichisya mwakulupichika malajisyo ga Ambuje Akunnungu, Akunnungu ŵenu, gingumpanga lelojino, moŵa gose chimme ŵandu ŵa paujo, ni ngamma kunyuma. 14 Nambo nkaleka ng'o kugapilikanichisya malajisyo ni makanyo ga pane nkajipopelela ni kujitumichila minungu jine."

15 "Nambo iŵaga ngankumpilikanichisya Ambuje Akunnungu, Akunnungu ŵenu, ni kuleka kugakamulisya malajisyo gakwe gose ni makanyo gakwe gingunlajisya lelo jino, malweso gose ga tigannyichilile."

16 "Ambuje Akunnungu tachinlwesya mu indu inkuipanganya mmisi jenu ni mmigunda jenu."

17 "Ambuje Akunnungu tachisilwesya mbeju syenu ni sooni tachichilwesya chakulya chachikutyochela ni mbeju syo."

18 "Ambuje Akunnungu tachinlwesya pakumpa ŵanache ŵangatupa, ni magungulo gangatupa ni ng'ombe ni ngondolo syenu ngasitupa."

19 "Ambuje Akunnungu tachigalwesya masengo genu gose gatinchigapanganya."

20 "Iŵaga nkutenda indu yakusakala ni kwakana Ambuje Akunnungu, Akunnungu ŵenu, tachinnyichisya malweso, ni limbulunga ni utindiganyo ni masausyo mu kila chindu chinkuchipanganya mpaka mmale kuwa wose mwakwanguya. 21 Ambuje Akunnungu tachinnyichisya ilwele yakupisyangana mpaka wosepe tinkamale kuwa pa chilambo chinkwaula kuchitenda chenu cho. 22 Ambuje Akunnungu tachinnyichisya ilwele yakwambuchisyana ni yakwimbila ni kolela mooto pachilu ni ula ngajinya ni ntukuta ni ukulyungu. Yele indu yo tiinkuye mpaka patimmale kuwa. 23 Kwinani kutijumule mpela shaba jepiliu, pangali ula ni litaka tilijumule mpela chisyano. 24 Ambuje Akunnungu talitende luundu ni nsanga kuŵa ula jenu, luundu tilunnyelele mpaka wosepe patimmale kuwa."

25 "Ambuje Akunnungu tachatenda ŵammagongo ŵenu ampunde ŵanyamwe pangondo. Chinchaula kukuputana ngondo kwa litala limo, nambo timwautuche ŵammagongo ŵenu wo kwa matala saba, nomwe tinchiŵa chindu cha uchimwa kwa ŵandu wose pachilambo. 26 Mitembo jenu tijiŵe chakulya cha ijuni ni inyama yamwitinji, ni ngapagwa mundu jwalijose jutaiŵinje. 27 Ambuje Akunnungu tachimputa ni yakuimbila mpela iŵaaputile ŵandu ŵa ku Misili. Iilu yenu tiichikola ilonda ni upele ni kunyanya pachilu, yosepe yi ngankombola kulama. 28 Ambuje Akunnungu tachimputanga ni masoka, ni ungalola ni kumpungwanisya muntwe. 29 Tinjende nli nkupapasyapapasya lyuŵa lili nkuŵala mpela mundu jwangalola. Masengo galigose gatinchipanganya ngagampa mboka. Ŵandu tachimmonelanga ni kunsumula indu yenu kaŵilikaŵili, ngaapagwa mundu jwalijose jutachinkamuchisya."

30 "Tinchitomela jwankongwe, nambo tachilombekwa ni mundu jwine. Tinchitaŵa nyuumba nambo ngangona. Tinchipanda misabibu mu ngunda nambo nganlya isogosi yakwe. 31 Ng'ombe syenu tisisinjikwe nli nkulola nambo nganlya nyama jakwe. Tinchisumulwa mbunda syenu kwa machili ni ngaammusya. Ngondolo syenu tisipelekwe kwa ŵammagongo ŵenu ni ngapagwa mundu jwalijose jutankamuchisye. 32 Ŵanache ŵenu ŵachilume ni ŵachikongwe tajigalikwe ku ukapolo ni ŵandu ŵachilendo ŵanyamwe nli nkulola, tinnolele lyuŵa ni lyuŵa kuti panepa chauje mpaka chinnepele kuunukula meeso, nambo ngamwawona sooni. 33 Isogosi ya mchilambo chenu ni magowolo, yose inlasileje kulima chalye ŵandu ŵa ilambo ine ŵangankwamanyilila, ni ŵanyamwe tachimmonela ni kunlagasya pa moŵa genu gose. 34 Pachiinsimane indu yo tichintesya mme ŵamasoka. 35 Ambuje Akunnungu tachimputa mmalungo genu ni makongolo genu pakumpa yakuimba yakupweteka kwannope ni yangalamika, sooni tichikopoka pachiilu chose, kutandilila kusajo mpaka peuwo."

36 "Ambuje Akunnungu tachinjausya ŵanyamwe ni mwenye jwenu juchimunsagule ku chilambo changanintameje ŵanyamwe pamo ni achinangolo ŵenu kalakala. Kweleko tinkajitumichile minungu jine jakupanganyikwa ni itela ni maganga. 37 Ŵandu ŵa yele ilambo itakanjausye Ambuje Akunnungu takatojime pakuiwona isausyo yenu yekulngwa yi, ni takanseche ni kuntendela chipongwe."

38 "Tinchipanda mbeju syejinji mmigunda mwenu nambo tinchigungula indu kanandi pe, ligongo sombe tisilye mimela jenu. 39 Timpande misabibu ni kujilimila ni kujilolalola nambo isogosi yakwe ngankaŵa, namose kung'wa divai jakwe ligongo maungu tigamale kulya misabibu jo. 40 Tinchikola itela ya miseituni palipose mu chilambo chenu, nambo ngampata mauta gakwe ligongo isogosi yakwe tiichilakatichila paasi nganiikomale. 41 Tinchiŵeleka ŵananche ŵachilume ni ŵachikongwe, nambo ngaaŵa ŵenu ligongo takajigalikwe mateeka. 42 Itela yenu yose ya isogosi ni magungulo ga mmigunda mwenu tiiligwe ni sombe."

43 "Achalendo ŵakutama pachilambo penu tachiŵa ŵandu ŵakusichila ni ŵamachili, nambo ŵanyamwe tinchiŵa ŵandu ŵakulaga ni ŵakulopotoka. 44 Ŵanyawo tachikola mbiya syakunkongosya ŵanyamwe, nambo ŵanyamwe ngankola mbiya syakwakongosya ŵanyawo. Mbesi jakwe ŵanyawo tachintawala."

45 "Malweso gose ga tigannyichilile ŵanyamwe, tigankuye ni kumpata mpaka patinjonasiche, ligongo nganimwapilikanichisya Ambuje Akunnungu, Akunnungu ŵenu ni kugakamulisya makanyo gakwe ni malajisyo gakwe giŵampele. 46 Isausyo yose yo tiichiŵa umboni wankati ulamusi wa Ambuje Akunnungu kukwenu ni kwa iŵelesi yenu moŵa gose pangali mbesi. 47 Ambuje Akunnungu, Akunnungu ŵenu, ŵampele upile pa indu yosepe, nambo ŵanyamwe nganimwatumichila kwa kusengwa ni kwa mitima jenu jose. 48 Kwayele tinkaatumichile ŵammagongo ŵenu ŵatakantumichisye Ambuje Akunnungu ŵanyamwe. Tijinkole sala ni njota ni usauchi ni kusoŵekwa ni indu yose. Tachintendekasya masengo gakulimba mpaka patimmale kuwa. 49 Ambuje Akunnungu tannyichisye ŵandu kutyochela ku chilambo chakutalika kuti angungumuchile mpela kapungu yakuti kutuluchila yakulupata, ŵandu ŵangankuchimanyilila chiŵecheto chao, 50 ŵele ŵandu ŵa chilambo cho tachiloleka ŵakogoya, ŵangaikosya nkati achachekulu atamuno kwakolela chanasa achachanda. 51 Ŵanyawo tachilya ilango yenu ni magungulo genu, mpaka sala jimmulaje. Ŵanyawo ngasanlechelela yakulya, ni divai namose mauta pane ng'ombe pane ngondolo mpaka patimmale kuwa. 52 Ŵandu wo tachinsyungula mmisi jose ja mu chilambo chenu, palipose mu chilambo chitakampe Ambuje Akunnungu, Akunnungu ŵenu, ni makumba gantaŵile gamaleu gele gankugakulupilila go tagagwisye paasi."

53 "Katema patachinsyungula mmisi jenu ni kulagaswa ni ŵammagongo ŵenu, tiikansoŵe yakulya mpaka tinchalya ŵanache ŵenu ŵele ŵampele Ambuje Akunnungu, Akunnungu ŵenu. 54 Namose mundu jwambone ntima nnope ni jwalelitwe yambone tachinjima yakulya nlongo njakwe, ŵankwakwe ŵakunnonyela ni achiŵanagwe ŵasigalile, 55 ngisangaŵila mundu jwalijose nyama ja ŵanache ŵakwe ŵatiŵalye. Ngansigalilwa ni chachilichose pa kele katema kakunsyungula ni kulagaswa ni ŵammagongo ŵenu mmisi jenu jose. 56 Atamuno jwankongwe jwakusichila jwalelitwe mwa mboka, jwanganaliŵete paasi kwakulikose, nombe najo tachitenda iyoyopeyo, tachajima namose ŵankwakwe ŵakunnonyela ni nchanda jwakwe ni mwali jwakwe, 57 pa kele katema kakunsyungula ko tachilya nyama ja mwanache jwakwe jwa napagwa pe pamo ni likondo lya panyuma, pangamanyilila ŵankwakwe atamuno jumo mwa achiŵanagwe."

58 "Iŵaga nganlilolechesya pakugapanganya maloŵe gose ga malajisyo gagalembekwe mu chitabu chi, ni sooni iŵaga nganlichimbichisya ni kulikusya liina lyekulu lyakogoya lya Ambuje Akunnungu, Akunnungu ŵenu, 59 Ambuje Akunnungu tannyichisye ŵanyamwe mwachinsyene ni iŵelesi yenu, iputiko yakogoya ni imbulunga yekulungwa ni yangamala, ni ilwele yakogoya yangapikana ntela. 60 Tannyichisye sooni ilwele yakogoya imwaijogopaga ku Misili, nombeyo ngaimala kukwenu. 61 Sooni Ambuje Akunnungu tannyichisye ilwele yakulekanganalekangana ni malagasyo gane ganganagalembe mu chitabu chi cha malajisyo mpaka pachimmale kuwa. 62 Nachiŵamuno nli ŵandu ŵantupile mpela ndondwa sya kwinani, tinsigalile kanandi pe pakuŵa nganimwapilikanichisya Ambuje Akunnungu, Akunnungu ŵenu. 63 Mpela muyannonyele Ambuje Akunnungu kumpa upile ni kunchuluya kuti mme ŵandu ŵajinji, iyoyo peyo tiyanonyele kunnyichisya imbulunga ni kunjonanga ni kuntyosya mu chilambo chinkwaula kuchijigala ni kuchitenda chenu."

64 "Ambuje Akunnungu tachimpwilinganya pasikati jwa ilambo yose kutandilila upande umo wa chilambo mpaka upande wine, ni kweleko tinjitumichile minungu jakupanganyikwa ni itela ni maganga, jele janganamanyilila achachekulu ŵenu, namose ŵanyamwe chitandilile. 65 Ngankola chitendewele palipose patinjaule, namose ngankola malo gatinjile kuti gali genu mwachinsyene. Nambo Ambuje Akunnungu tachintesya mme ŵandu ŵaali ni lipamba ni meeso gagakupela kulola ni kupwa ntima. 66 Moŵa gose tinjogope kuti ŵammagongo ŵenu tachimmulaga. Tinjogope kwannope chilo ni musi. 67 Mitima jenu tijigumbale woga wa kila chichinchiwone. Kwaikaga kundaŵi tinchisala kuti, ‘Mmbaya ikaliji chilo,’ ni kwaikaga chilo tinchisala kuti ‘Mmbaya ikaliji kundaŵi.’ 68 Ambuje Akunnungu tachimmusya sooni ku Misili ni meli, ulendo walanjile kuti ngammujila sooni. Kweleko chinkalinje kulisumisya mwasyene kwa ŵammagongo ŵenu mme achikapolo, nambo ngapagwa mundu jutakasache kunsuma."