1 "Ŵanyamwe nli ŵanache ŵa Ambuje Akunnungu, Akunnungu ŵenu, nkalilembalemba pane kumyola lupala ligongo lya mundu jwawile. 2 Ŵanyamwe nli ŵandu ŵakwe Ambuje Akunnungu, Akunnungu ŵenu, ni Ambuje Akunnungu ansagwile ŵanyamwe pasikati ja ŵandu ŵane ŵa pachilambo kuti mme ŵandu ŵakwe."

3 "Ngasinlya chindu chachilichose changachikukundikwa pa kwapopelela Ambuje Akunnungu. 4 Inyama yi ni inchilye: Ngo'mbe, ngondolo ni mbusi, 5 ndope ni ngolombwe ni mbaŵala ni ndogolo ni mbaŵe. 6 Chinyama chachili ni ikotwa yeŵaluche kaŵili ni chachikuchukula nkukombola kulya. 7 Nambo ngasinlya chinyama chachilichose chati ikotwa yakwe yanganiŵaluka kaŵili ni sooni ngaikuchukula, ngasinlya ngamia, ni kalunga ni njechele. Inyama yo ikuchukula nambo ikotwa yakwe nganiiŵaluka, yeleyo ngaikukundikwa pa kwapopelela Ambuje Akunnungu. 8 Nombe liguluŵe pakuŵa atamuno lili ni ikotwa yeŵalwiche nambo ngalikuchukula, yeleyo ngaikukundikwa pa kwapopelela Ambuje Akunnungu. Ngasinlya nyama jakwe namose kujikwaya mitembo jao."

9 "Yepanganyikwe yaikutama mmeesi nkukombola kulya chachili ni ipyepye ni makalaŵesya. 10 Nambo yanganiikola ipyepye ni makalaŵesya ngasinlya ikanyichikwe kukwenu."

11 "Nkukombola kulya ijuni yanganiikanichikwa kulya kukwenu. 12 Nambo nkalya, litumbusi ni lisonombela ni kapungu, 13 nakanje ni itotola ya uŵele wose 14 makungulu ga uŵele wose, 15 mbuni ni nalumbapala ni litipitipi ni kasinga ya uŵele wose, 16 liundi lyamwana ni chisyantima ni liititi, 17 maloya ni lipupilambugu ni mnandi, 18 katilili ni chankoma kwa uŵele wao wose ni chipupupu ni lichinji.

19 "Idudu yose yaikukwaŵa yaili ni mapapiko ngaikukundikwa pa kwapopelela Ambuje Akunnungu, ngasinlya. 20 Nambo yepanganyikwe yose yaili ni mapapiko yanganiikaanyichikwa nkukombola kulya.

21 "Nkalya ibudu, nkukombola kumpa jwannendo jwakutama pasikati jenu pane kunsumichisya mundu jwa chilambo chine, pakuŵa mmwe ndi ŵandu ŵa Ambuje Akunnungu ŵenu."

"Nkakateleka kambusi kwa maŵele ga nangolo jwakwe."

22 "Mmiche pambali liunjli lyakakumi kutyochela mmagoŵolo gose ga mmigunda mwenu pa kila chaka. 23 Nipele njaulanje peuto patapasagule Ambuje Akunnungu, Akunnungu ŵenu, kuti nkaapopelele, pachimme paujo pakwe chinlyanje liunjili lyakakumi lya magowolo genu ni ja divai jasambano ni ja mbeju sya seituni ni ja ipago yandanda ya ng'ombe ni ngondolo syenu. Ntendeje yeleyo kuti nlijiganye kwachimbichisya Ambuje Akunnungu, Akunnungu ŵenu moŵa gose. 24 Iŵaga liuto lyasagwile Ambuje Akunnungu, Akunnungu ŵenu kuti nkaapopelele lili kwatalichila ni ŵanyamwe, ni nkulepela kujigala liunjili lyakakumi lya magungulo genu, pakuŵa Ambuje Akunnungu ampele yejinji nnope, pelepo ntende nyi: 25 Nsumisye liunjili lyakakumi lyo ni mbiya syakwe njaule nasyo peuto patapasagule Ambuje Akunnungu, Akunnungu ŵenu kwapopelela. 26 Mbiya syo nsumile chilichose chachikulajila ntima, pane ng'ombe pane ngondolo pane divai pane nkologo pane inkuisaka mu ntima wenu. Nomwe chinlye paujo pa Ambuje Akunnungu, Akunnungu ŵenu, nsangalale mmwe ni ŵamunyuumba jenu."

27 "Nkaaliŵalila Ŵalawi ŵaali pasikati ja misi jenu pakuŵa ŵanyawo nganakola lisi lyao achinsyene. 28 Kumbesi kwa kila chaka chaatatu mmiche pambali liunjili lyakakumi lya magowolo ga chaka cho ni kujigosa mu misi jenu. 29 Yele chiiŵe kwaligongo lya Ŵalawi pakuŵa nganakola lisi lyao achinsyene, ni achalendo ni ŵamalekwa ni achakongwe ŵawililwe ni achiŵankwawo ŵaakutama mmisi jenu, alyeje ni kwikuta. Ntendeje yeleyo nomwe chinkole upile kwa Ambuje Akunnungu, Akunnungu ŵenu, kwa masengo ginkugapanganya kwa makono genu."