1 "Nipele twausile, ni kwaula ulendo wa kulipululu kwalitala lya bahali ja Shamu mpela Ambuje Akunnungu iŵatite kuunajisya. Kwa moŵa gamajinji twasyungulagasyungulaga ku chilambo cha matumbi ga Seili."

2 "Nipele Ambuje Akunnungu ŵasalile kuti, 3 tusyungwilesyungwile mu chilambo cha matumbi chi kwa moŵa gamajinji, sano tugalauche, tujaule chakumpoto. 4 Ŵaasalile kuti nansalile ŵanyamwe malajisyo ga: ‘Mmaandichile kupita pasikati ja chilambo cha matumbi ga Seili, chilambo cha achalongo achinjenu uŵelesi wa che Esau. Ŵanyawo chanjogope, nambo nlilolechesye. 5 Nkaputana nawo ligongo ngasinampa malo gagaligose nkati chilambo cho. Ngasinampa atamuno malo jenandi ja pakuliŵata. Chilambo cha matumbi ga Seili cho napele uŵelesi wa che Esau kuti chiŵe chao. 6 Pachinkasache chakulya pane meesi kutyochela kukwao, nipele nkasume.’"

7 "Nipele nkumbuchile Ambuje Akunnungu, Akunnungu ŵenu yatite pakumpa upile mu yose yantesile. Ŵangosile ŵanyamwe pamwaliji mu ulendo wenu mu ali lipululu lyekulungwa. Ŵaliji pamo ni ŵanyamwe yaka yose alobaini ni nganichinsoŵa chindu chachilichose."

8 "Nipele twajendelechele ni ulendo, twapite kwa achalongo ŵetu uŵelesi wa che Esau ŵaŵatamaga ku Seili. Twalilesile panyuma litala lya ku Alaba, sooni ni misi ja Elati ni Esioni Gebeli. Ni twagalawiche ni kulikuya litala lyakupitila ku lipululu lya Moabu. 9 Ambuje Akunnungu ŵasalile ‘Nkaasausya atamuno nkaputana ni ŵandu ŵa ku Moabu ŵali uŵelesi u che Lutu, pakuŵa naapele ŵanyawo musi wa ku Ali uŵe wao. Ni ŵanyamwe ngangumpa malo gagaligose mu musi wo.’" 10 Kalakala ko musi wa ku Ali ŵatamaga Ŵaemi, makammandu ni achajinji ni ŵa machili ŵaŵaliji achaleu mpela Ŵaanaki. 11 Mpela yatite kuŵa Ŵaanaki, ŵanyawo nombe ŵaŵilanjikwe Ŵalefai, nambo Ŵamoabu ŵaaŵilasile Ŵaemi. 12 Kuundanda ko Ŵaholi nombe ŵatemi ku Seili, nambo uŵelesi wa che Esau ŵaatopwele ni kwajonanga, nipele ŵanyawo ŵatemi pamalo po. Ŵaislaeli nombe ŵatesile iyoyo peyo paŵajinjilaga ku chilambo chiŵapele Ambuje Akunnungu kuti chiŵe chao.

13 "Ambuje Akunnungu ŵatusalile, ‘Ntyokangane sano, njomboche kasulo Seledi.’ Nipele, twajombweche kasulo ko. 14 Pakumala kutyoka ku Kadeshi Balinea mpaka komboka kasulo ka Seledi yapitile yaka salasini na nane. Kele katema ko, uŵelesi wose wa ŵandu uŵaliji ni lisusa lya kukwanila kwaula kuputana ngondo ŵamasile kuwa mpela iŵatite Ambuje Akunnungu pakwalumbilila. 15 Ambuje Akunnungu asyene ŵajendelechele kwaputa mpaka paŵajonasile pasikati ja Ŵaisilaeli, ni wose ŵamasile."

16 "Nipele, ŵandu ŵaŵaliji ni lisusa lya kukwanila kwaula kungondo paŵamasile kuwa, 17 Ambuje Akunnungu ŵasalile, 18 ‘Lelo jino chijomboche mpika wa ku Moabu pakupitila litala lya musi wa ku Ali. 19 Chinnyiche chilambo cha Ŵaamoni ŵaali isukulu i che Lutu. Ngasimwasausya atamuno ngasimputana nawo pakuŵa ngasinampa malo gagaligose ga chilambo chao kuti gaŵe genu.’ "

20 "Chilambo cho chikumanyika kuti chili cha Ŵalefai. Kalakala Ŵalefai ŵatemi kweleko, ni Ŵaamoni ŵaaŵilasile ŵanyawo Ŵazanzumi. 21 Ŵazanzumi wo ŵatupile, ni ŵamachili, ŵaliji makammandu ni achaleu mpela Ŵaanaki. Nambo Ambuje Akunnungu ŵaajonasile katema kaŵaiche Ŵaamoni ŵaŵachijigele chilambo cho ni kutama mwelemo pamalo pao. 22 Ambuje Akunnungu ŵatesile mpela iŵatite kwatendela Ŵaedomu ŵaŵaliji uŵelesi wa che Esau, ŵaŵatamaga ku chilambo cha Seili. Ŵajonasile Ŵaholi katema Ŵaedomu paŵaiche kweleko, ŵachitesile chilambo kuŵa chao ni kutama mwelemo mpaka lelo jino. 23 Chitandilile cho Ŵaaŵi ŵatamaga mmisinda jajili mungulugulu bahali ja Meditelania mpaka ku Gasa. Ŵakafitoli yaani ŵandu ŵakutyochela ku chilumba cha ku Kilete ŵaajonasile, ni kutama mwelemo pamalo pao."

24 "Patwapite chilambo cha ku Moabu, Ambuje Akunnungu ŵatusalile: ‘Sambano ntande ulendo ni komboka lichemba lya Alinoni. Une nampele machili ga kwaputa che Sihoni, mwenye jwa Ŵaamoli jwa ku Heshiboni ni chilambo chakwe. Mwagungumuchile ni kutanda kuchijigala chilambo cho chiŵe chenu. 25 Kutandilila lelo chinjatenda ŵandu anjogope ni kukola lipamba kwa ligongo lyenu; Ŵandu ŵa pachilambo pose uchapilikane ngani syenu chatetemele ni kusupuka.’"

26 "Nipele nalajisye ŵandu kutyochela ku lipululu lya Kedemoti ajaule kwa mwenye che Sihoni jwa ku Heshiboni ni utenga wa chitendewele waukuti, 27 ‘Choonde ntulechelele tupite mu chilambo chenu. Chitujende mwitala pe sokotaa. 28 Chitusume chakulya tulye ni mesi ga kung'wa. Choonde ntulechelele tupite mu chilambo chenu wamakongolo, 29 mpela iŵatulechelele uŵelesi u che Esau ŵakutama ku Seili, ni Ŵamoabu ŵakutama ku Ali. Mpaka tujomboche lusulo lwa Yolodani ni kwinjila mu chilambo chakutupa Ambuje Akunnungu, Akunnungu ŵetu.’"

30 "Nambo che Sihoni, mwenye jwa ku Heshiboni, nganatulechelela tupite mu chilambo chao. Pakuŵa Ambuje Akunnungu, Akunnungu ŵenu ŵaatesile aŵe ni ntima wakulimba ni wa makani kuti twapunde ni kuchijigala chilambo chao chiŵe chetu, mwatukutama mpaka lelo jino."

31 "Nipele Ambuje Akunnungu ŵasalile, ‘Nnole nguntendekasya mumpunde mwenye che Sihoni pamo ni chilambo chao. Nipele ntande kuchijigala chilambo chao kuti chiŵe chenu.’ 32 Nipele che Sihoni ŵajawile pamo ni ŵandu ŵakwe wose kukuputana nowe ku musi wa ku Yahasa. 33 Nombe Ambuje Akunnungu, Akunnungu ŵetu ŵatukombolechesye uwe kwakamula, nombe uwe twammuleje pamo ni achiŵanagwe ni ŵangondo ŵakwe wose. 34 Twajisumwile misi jao ni kujijonanga, twauleje achalume ni achakongwe ni ŵanache; nganitunsigasya mundu jwalijose ali jwanjumi. 35 Twajigele ilango yao ni ipanje yose itwaisimene mmisi jao. 36 Kutandilila ku Aloeli, musi wauli mungulugulu lichemba lya ku Alinoni ni musi wauli nkati mwa lichemba lyo mpaka ku Gileadi, ngapagwa musi wauli wose uwalimbangene uwatulemile kwasumula. Ambuje Akunnungu, Akunnungu ŵetu ŵatukombolechesye kujijigala misi jose. 37 Nambo nganituŵandichila chilambo cha Ŵaamoni atamuno mungulugu lusulo lwa Yaboki, atamuno misi jajili mu chilambo cha matumbi, atamuno malo gagali gose gaŵatukanyisye Ambuje Akunnungu, Akunnungu ŵetu kwinjila."