1 "Patinkajinjile mu achila chilambo chichakampe Ambuje Akunnungu, Akunnungu ŵenu kuti chiŵe chenu, ni kutama mwelemo, 2 nkajigale milimbu kutyochela mu chilambo chitakampe Ambuje Akunnungu, Akunnungu ŵenu, nkasiŵiche mu chitundu. Nkajausye pa malo gamo giŵagasagwile Ambuje Akunnungu, Akunnungu ŵenu kuti ŵaapopelele pelepo. 3 Munjaulileje jwambopesi jwaali pa masengo lyele lyuŵa lyo ni kunsalila, ‘Lelo ngusala nansyene paujo pa Ambuje Akunnungu, Akunnungu jwangu, kuti nyinjile mu chilambo chiŵaalanjile achambuje ŵetu kuti tachitupa uweji.’ "

4 "Jwambopesi chapochele chitundu cho mmakono mwenu ni tachitamiche paasi paujo pa chilisa cha Ambuje Akunnungu, Akunnungu ŵenu. 5 Nomwe chinkasale aga maloŵe ga paujo pa Ambuje Akunnungu, Akunnungu ŵenu ‘Atati ŵangu ŵaliji Mwalamu juŵajendajendaga akuno ni akunokuno, nipele ŵatulwiche kwaula ku Misili ni kutama kweleko nti jwannendo. Pakwaula kweleko ŵelewo ni achalongo ŵakwe ŵaliji ŵandu kanandipe, nambo kanyuma ŵatupile ni ŵaliji ŵandu ŵa machili ni chilambo chachili ni machili. 6 Nambo Ŵamisili ŵatupanganyichisye yangalumbana, ni ŵatulagasisye ni kutukanganyichisya kupanganya masengo gakulimba mpela achikapolo. 7 Nipele, uweji twalisile kwa Ambuje Akunnungu, Akunnungu jwa achambuje ŵetu, nombe Ambuje Akunnungu, ŵakupilikene kulila kwetu, sooni ŵakuweni kulaga kwetu, ni kugawona masengo gamakulungwa gaŵatukanganichisyaga gala ni masauko getu. 8 Kwayele Ambuje Akunnungu, Akunnungu ŵatukulupwisye kwele ku Misili ko kwa machili ni ukombole. Ŵatesile yakusimonjeka ni imanyisyo yejinji ikopochele. 9 Nombewo atujigele mpaka akuno ni kutupa chilambo chi, chilambo chachili ni chajila chachikufai kulanga ilango yejinji ni kulima. 10 Sambano une nyiiche kwa Ambuje Akunnungu, ni liunjili lya milimbu jangu ja mu chilambo chambele une.’ "

"Nipele nchitamiche chitundu cho paasi paujo pa Ambuje Akunnungu, Akunnungu ŵenu ni kukotama mpaka paasi paujo pakwe. 11 Nomwe nkajangalile indu yambone yampele Ambuje Akunnungu, Akunnungu ŵenu, mmwe ni ŵamunyuumba jenu. Nkasangalale pamo ni Ŵalawi ni achalendo ŵakutama pasikati jenu."

12 "Chaaka chaatatu chilichose mpelecheje liunjili lyakakumi lya magungulo genu kwa Ŵalawi ni kwa achalendo ni ŵamalekwa ni achakongwe ŵawililwe ni achiŵankwawo kuti ku misi jakutama ŵele ŵandu ŵa akoleje yakulya yakwanila. 13 Nipele chinsale yelei paujo pa Ambuje Akunnungu, Akunnungu ŵenu, ‘Ndyosisye mu nyuumba mwangu liunjili lyakakumi, mbeleche kwa Ŵalawi ni kwa achalendo ni kwa ŵamalekwa ni kwa achakongwe ŵawililwe ni achiŵankwawo mpela imwatite pakuulamulila mbanganye. Nganinagatema makanyo genu namose kugaliŵalila namose limo. 14 Une nganindye liunjili lyakakumi lyalililyose panaliji nkulila malilo, ni sooni nganindyosya liunjili lyakakumi mu nyuumba jangu panaliji ngangukundikwa paujo penu natamuno nganimbeleka liunjili lyakakumi lyo kwa ŵandu ŵawile. Uneji nampikanile mmwe Ambuje Akunnungu, Akunnungu ŵangu, ndesile kila chindu chinlamwile tutende. 15 Nnole paasi kutyochela kwinani malo genu gamaswela, mwape upile Ŵaisilaeli ŵaali ŵandu ŵenu ni chilambo chachajila chatupele chi, mpela imwatite pakwalanjila achinangolo ŵetu.’ "

16 "Lelo jino, Ambuje Akunnungu, Akunnungu ŵenu akunlamulila kuti ngakamulichisye makanyo gawo gose ni malajisyo ga. Nlilolechesye kugapanganya kwa ntima wose ni kwa mbumu jose. 17 Lelo jino nsasile ŵanyamwe mwachinsyene kuti Ambuje Akunnungu, ali Akunnungu ŵenu, ni kuti tingakuye matala gao gose ni kugakamulisya makanyo ni malajisyo gao ni mashalaiti gao ni kulijitichisya liloŵe lyao. 18 Nombe Ambuje Akunnungu, lelo jino ankundile mwanya kuti nli ŵandu ŵakwe nsyene mpela iŵatite pakunlanjila, ni kuti nkusachilwa kugakamulisya makanyo gao gose. 19 Tachintenda mwanya kuŵa ŵandu ŵa chilambo chekulungwa kupunda ŵandu ŵa ilambo ine ŵaŵaapanganyisye, ni ŵanyamwe tinlitesye liina lyakwe lilumbililwe ni kupegwa luchimbichimbi. Ŵanyamwe timme ŵandu ŵakwe mpela iŵatite pakulanga."