1 "Kumbesi kwa kila chaka cha saba mwalechelesye ŵammagambo ŵenu wose. 2 Chintende chanchiti nyi: Jwalijose jwakukongosya, talechelesye chankongwesye Mwisilaeli njakwe. Akalinga kwadai pakuŵa Ambuje Akunnungu asyene alamwile kuti ligambo lyo lilechelelwe. 3 Nkukombola kwadai achalendo nambo magambo ga Mwisilaeli njenu chinchigalechelela."

4 "Ngaapagwa jwakulaga pasikati jenu pakuŵa mu chilambo chaakumpa Ambuje Akunnungu, Akunnungu ŵenu kuti chiŵe chenu chaachimpa upile kwannope. 5 Chimpochele upile wo iŵaga chimunjitichisye Ambuje Akunnungu, Akunnungu ŵenu, kusyene ni kugakuya malajisyo gingumpa lelo jino. 6 Pakuŵa Ambuje Akunnungu, Akunnungu ŵenu chachimpa upile mpela iŵatite kunlanjila ŵanyamwe, ni ŵanyamwe chinchaakongosya ŵandu ŵa ilambo yejinji nambo mwachinsyene ngankongola kwa mundu jwalijose. Chintawale ilambo yejinji nambo mmwe ngaaika kukuntawala."

7 "Apagwaga jwakulaga pasikati ja Ŵaisilaeli achinjenu mmusi wauliwose wa chilambo chati Ambuje Akunnungu, Akunnungu ŵenu, akumpa nkautenda mtima wenu kuŵa wakulimba ni kulepela kunkamuchisya Mwisilaeli njenu jwaali jwakulaga. 8 Nambo mmeje ni mitima jambone, mwakongosye kwa usache wenu chindu chilichose yaikwasoŵa. 9 Nlilolechesye nkakana kwakongosya Ŵaisilaeli achinjenu kwa kuganichisya mumtima mwenu kuti, chaka cha kulechelela magambo chikuŵandichila. Nkalechela nganisyo sya chigongomalo go ganjinjile. Pakuŵa iŵaga nkunkana kunkongosya nombejo andililaga Ambuje Akunnungu nkati mmwe, chinchiŵa ni sambi. 10 Mwape kwa mitima jambone pangali ligogo, pakuŵa kwakutenda yeleyo Ambuje Akunnungu, Akunnungu ŵenu champe upile mmwe mmasengo genu gose ni kwa indu yose ichimpanganye kwa nkono wenu. 11 Ŵakulaga chaaŵe moŵa gose mu chilambo chi. Ngunlajisya mwapeje yaikwasoŵa, ŵakulaga ni achalongo ŵenu kwa mtima wambone."

12 "Iŵaga Mwisilaeli njenu jwannume pane jwankongwe alisumisye kukwenu ni kuntumichila yaka sita, pachaka cha saba ikusachilwa munneche ajaule ali alechelelwe. 13 Nombe mmwe mwalechelelaga nkanleka atyoche makonope. 14 Mwape kwa mtima wambone achila champele Ambuje Akunnungu, Akunnungu ŵenu kwa upile, mpela ila ngondolo ni magowolo ni divai. 15 Nkumbuchileje kuti ŵanyamwe mwaliji achikapolo ku chilambo cha ku Misili, ni Ambuje Akunnungu, Akunnungu ŵenu ŵammwombwele. Lyelelyo ni ligongo ngunlajisya indu yi lelo jino."

16 "Nambo kapolo jwenu ajilaga kuti ngaakusaka kunneka akunnonyela mmwe ni ŵapannango wenu ni akulipikana yambone kutama ni ŵanyamwe, 17 nipele munjigale kapolo jo mpaka pannango, chinjigale nsomelo ni kwatoga liwiwi mpaka nsomelo wo chiujinjile mu chibao cha pannango, nombejo chaŵe kapolo jwenu mu umi wakwe wose. Muntendele iyoyo ni kapolo jwenu jwankongwe. 18 Nkaganisya kuti ikulema kunnechelela kapolo jwenu, pakuŵa antumichile yaka sita, kwa nusu ja malipilo, akaliji jwakutumichila jwakwapa malipilo, ni Ambuje Akunnungu, Akunnungu ŵenu champe upile mmwe mu yose ichinyitende."

19 "Mumpelechele Ambuje Akunnungu, Akunnungu ŵenu iŵeleko yaandanda yose yaili mikambaku ya mipingo ja ng'ombe ni ngondolo. Nkasitendekasya masengo ng'ombe syo, ni nkasikata manyunya ngondolo syo. 20 Kila chaka chinchilya inyama yo paujo pa Ambuje Akunnungu, Akunnungu ŵenu peuto patansagulile Ambuje Akunnungu, mmwe ni ŵamunyuumba jenu. 21 Iŵaga chinyama china chilema pane alemele pane ngakulola pane kulemala kwakwe kupundile, nkachityosya chisikitwe kuŵa mbopesi kwa Ambuje Akunnungu, Akunnungu ŵenu. 22 Nkukombola kulya inyama yanti yeleyo mmisi jenu jinkutama. Ŵandu ŵanawose pasikati jenu, ŵangakundikwa ni ŵakundikwe paujo pa Ambuje Akunnungu, nkukombola kulya mpela munkulila ndandala pane mbaŵala. 23 Nambo nkanlya myasi jakwe, njijitile myasi jo paasi nti meesi."