1 "Jwannume jwalijose jwankasile mbujuju, pane jwankatile kuyalo kwakwe akajinjila pa nsongangano wa ŵandu ŵa Ambuje Akunnungu."

2 "Mundu jwalijose jwapagwile mmaukutu namose iŵelesi yakwe mpaka mpago wa likumi, akajinjila pa nsongangano wa ŵandu ŵa Ambuje Akunnungu."

3 "Mundu jwalijose jwa lukosyo lwa Ŵaamoni pane Ŵamoabu ni iŵelesi yao yose mpaka mpago wa likumi akakundikwa kwinjila mu nsongangano wa ŵandu ŵa Ambuje Akunnungu. 4 Ligongo ŵele ŵandu wo ŵanjiimile yakulya ni meesi pamwaliji mwitala kutyoka ku Misili, sooni pakuŵa ŵampele mbiya che Balaamu mwanagwe che Beoli jwa ku Petoli jajili ku Mesopotamia kuti annwesye ŵanyamwe. 5 Namose yeleyo Ambuje Akunnungu, Akunnungu ŵenu, nganampilikanila che Balaamu nambo ŵagagalawisye malweso gakwe kuŵa upile kwa ŵanyamwe, pakuŵa Ambuje Akunnungu, Akunnungu ŵenu, ŵannonyelanga. 6 Kwayele nkatenda chindu chachilichose chakwakamuchisya ŵandu ŵa ngosyo si kwakuti ŵandu ŵa, apate chitendewele namose kutama utame wa kusichila."

7 "Nkaachima Ŵaedomu pakuŵa ŵele ŵanyawo ali achalongo achinjenu. Sooni nkaachima Ŵamisili pakuŵa mwatemi ku chilambo chao mpela achalendo. 8 Uŵelesi wa ngosyo si kutandilila mpago waatatu akukomboleka kwinjila mu nsongangano wa Ambuje Akunnungu."

9 "Pankwaula kuputana ngondo ni ŵammagongo ŵenu, mwaŵikaga chigono, nlilolechesye, nkatenda chindu chachilichose chachichintesye ŵanyamwe nkakundikwa ni Ambuje Akunnungu. 10 Iŵaga jwannume jwalijose pasikati penu ngakukundikwa ni Akunnungu ligongo lyakuti asagamile chilo ni waakopweche usyungo, akopoche ni kwaula kutama paasa pa chigono. 11 Nambo jaikaga ligulo ajoje, ni lyuŵa lyatiŵilaga aujile ku chigono."

12 "Nkakolosye malo paasa pa chigono kuchinjaule kukusyetelela. 13 Mu yakumenyanilana yenu nkoleje chakusolela chakuti pachinjaule kukusyetelela nsoleje lisimbo, nli mmasile nsilile manyi mwisimbo mo. 14 Chigono chenu chiŵeje chesalele chenene, pakuŵa Ambuje Akunnungu, Akunnungu ŵenu akwendajenda pachigono penu kuti anlindilile ni kunkamuchisya kuti mwapunde ŵammagongo ŵenu pangondo. Kwayele chigono chenu chiŵe malo gakusalala kuti Ambuje Akunnungu akaona chindu chilichose pasikati jenu chachili chakusakala, akagalauka ni kunneka jikape."

15 Iŵaga kapolo autuchile kukwenu nkammusya kwa ambujegwe. 16 Munneche atame pasikati jenu palipose pachasache ni pa musi wauliwose uchasagule. Nkammonela.

17 Pasikati ja Ŵaisilaeli pakasimanikwa mundu jwalijose aŵeje jwankongwe pane jwannume jwali jwakulaŵalaŵa ku nyuumba jaakujipopelela minungu jao. 18 Mbiya jajilijose jajipatikene kwa kulaŵalaŵa ko nkajijausya ku nyuumba ja Ambuje Akunnungu, Akunnungu ŵenu, kwaligongo lya kutindimisya nasili jilijose pakuŵa jwannume pane jwankongwe jwakutenda yeleyo akuchimikwa Ambuje Akunnungu, Akunnungu ŵenu.

19 "Mwankongosyaga nlongo njenu Mwisilaeli nkansalila ammuchisye ni mapwati gakwe, iŵeje mbiya pane chakulya pane chindu chine chilichose chati ŵandu akukongosya ni kusaka mapwati gakwe. 20 Jwannendo nkukombola kunkongosya ni kunsalila ammuchisye ni mapwati gakwe, nambo ngaŵa nlongo njenu Mwisilaeli, nombe Ambuje Akunnungu, Akunnungu ŵenu, champe upile mu indu yose itinkaitende mu chilambo chinkwaula kuchitenda kuŵa chenu."

21 "Iŵaga nkuŵika nasili kwa Ambuje Akunnungu, Akunnungu ŵenu, nkakaaŵa kuchitenda chimmisile nasili cho, pakuŵa Ambuje Akunnungu, Akunnungu ŵenu chachindai, nomwe chinkole ni sambi. 22 Iŵaga ngankuŵika nasili kwa Ambuje Akunnungu ngaŵa sambi. 23 Nlilolechesye kujitendekanya nasili jinsasile pakang'wa penu, pakuŵa nlanjile mwasyene kwa Ambuje Akunnungu, Akunnungu ŵenu."

24 "Mwajinjilaga mu ngunda wa misabibu wa nlongo njenu Mwisilaeli, nkukomboleka kulya isogosi ya sabibu nli mu ngunda pemo inkuti kusaka, nambo nkakaŵa ni kujigala isogosi yo mu chitundu chenu."

25 "Mwapitaga mungunda wa nlongo njenu Mwisilaeli wauli ni magungulo nkukombola kukwanyula ni makono genu ni kulya, nambo nkajigala chikwakwa kukata."