1 "Nkajisikita ng'ombe pane ngondolo jajili ni chilema pane dosali, ni kuntyochesya Ambuje Akunnungu, Akunnungu ŵenu kuŵa mbopesi pakuŵa ili uchimwa kwa Ambuje Akunnungu, Akunnungu ŵenu."

2 "Iŵaga jwannume pane jwankongwe jwakutama pasikati ja misi jenu jakumpa Ambuje Akunnungu awoneche ali nkutenda chigongomalo paujo pa Ambuje Akunnungu, Akunnungu ŵenu, kwa ungajitichisya Lilangano lyakwe, 3 nombejo ajawile kukutumichila minungu jine ni kupopelela iŵeje lyuŵa ni mwesi pane indu ine ya kwinani yanganinajisya nnyipopelele, 4 mundu ansalilaga nkati ngani jo, pelepo mmuchilichisye chenene. Iŵaga kusyene chindu chauchimwa cho chitendekwe pasikati ja ŵandu ŵa ku Isilaeli, 5 pelepo munjigale jwannume jo pane jwankongwe jwatesile chigongomalo cho, munjausye paasa musi, kweleko nkaaponyele maganga mpaka awe. 6 Nambo mundu jo taulajikwe kwa umboni wa ŵandu ŵaŵili pane ŵatatu, ngapagwa mundu jutaulajikwe kwa umboni wa mundu jumo pe. 7 Ŵandu ŵatyosisye umboni aŵe ŵaandanda kumputa kwa maganga mundu jo, pelepo ni akuyeje ŵane. Kwanti yele chimuutyosye ugongomalo pasikati jenu."

8 "Gakopochelaga magambo mu misi jenu, ni gaŵaga gakulimba nnope mpaka nkulepela kugalamula, mpela ila magambo gakuulagana kwa mele pane ngaŵa kwa mele, pane magambo gankati indu yaikusachilwa kupegwa ŵandu pane kuulasyana. Yakopochelaga yeleyo, mpelecheje peuto patapasagule Ambuje Akunnungu, Akunnungu ŵenu. 9 Njaule kwa Ŵambopesi yaani Ŵalawi, ni kwa jwakulamula jutachiwa mmasengo kele katema ko, nombe ŵanyawo chagalamule magambo genu. 10 Ntendeje malinga ni itansalile kwele kwiuto kwasagwile Ambuje Akunnungu. Npanganye yose mpela ichinnajiswe. 11 Ntendeje malinga ni malajisyo gatanjiganye ni malamulo gatansalile. Nkalinga kugalausya malamusi go kwa litala lyalililyose. 12 Mundu jwalijose jwangakunjitichisya jwambopesi jwaali mmasengo gakwatumichila Ambuje Akunnungu, Akunnungu ŵenu pane jwakulamula, mundu jo taulajikwe, ni kwanti yele chimuutyosye ugongomalo pasikati ja Ŵaisilaeli. 13 Ŵandu wose taipikane ni kogopa, nombe ngapagwa mundu jutalinje kuitendekanya yanti yeleyo sooni."

14 Che Musa ŵajendelechele kwasalila Ŵaisilaeli kuti, "Pachinjinjile mu chilambo chaakumpa Ambuje Akunnungu, Akunnungu ŵenu, kuti chiŵe chenu, ni kutama mwelemo, mwatiji; tukusaka tukole mwenye nti ŵandu ŵa ilambo ine yaikutusyungula, 15 nlilolechesye kuti jwele mundu jutimunsagule aŵe mwenye jwenu aŵeje jwasagulikwe ni Ambuje Akunnungu, Akunnungu ŵenu. Mundu jo aŵeje akutyochela mu ngosyo syenu. Nkansagula jwannendo jwanganaŵa Mwisilaeli aŵe mwenye jwenu. 16 Mwenye jo akakola falasi syesijinji kwaligongo lyakwe nsyene, namose kwausya ŵandu ku Misili kuti akole falasi syesijinji, pakuŵa Ambuje Akunnungu ŵatite kuti ŵandu ŵakwe ngasaujila kweleko sooni. 17 Akalombela achakongwe ŵajinji kuti ntima wakwe ukalyungasika ni kwaleka Ambuje Akunnungu, namose akalisalachisya madini ga feza ni sahabu syesijinji. 18 Pele patachiŵa mwenye, alilembele chitabu chine kwaligongo lyakwe nsyene chachikutyochela ni achila chitabu cha malajisyo chachikugosekwa ni ŵambopesi waali Ŵalawi. 19 Chitabu cho chichiŵe chiŵandi nao, achisyome moŵa gose mu umi ŵakwe, kuti akombole kulijiganya yakuti kwachimbichisya Ambuje Akunnungu, Akunnungu ŵakwe, ni kugajitichisya maloŵe gose ga malajisyo ni makanyo gakwe. 20 Malajisyo go chigaakamusye kuti akalikwesya kwa Ŵaisilaeli achinjakwe ni kugalyungasya. Pelepo jwelejo ni uŵelesi wakwe tajendelechele kuŵa mamwenye kwa Ŵaisilaeli moŵa gose."