1 Pa katema ko kwaliji ni jwankulu jwa ŵangondo ŵa mwenye jwa ku Alamu liina lyakwe che Naamani. Mundu ju ŵakundikwe ni kuchimbichikwa kwannope ni mwenye jwa ku Alamu liji jwankulu paujo pa ambujegwe ni kuchimbichikwa kwannope, pakuŵa kwa litala lya mundu ju Ambuje Akunnungu, ŵaatesile ŵandu ŵa ku Alamu apunde. Mundu ju ŵaliji jwangondo jwangali woga nambo ŵaliji ni matana. 2 Pa ngondo jiŵaputanaga ni ŵandu ŵa ku Isilaeli, Ŵaalamu ŵanjigele mateka mwali jumo jwa ku Isilaeli, nombejo ŵatendekwe kuŵa jwakutumichila jwa ŵankwakwe che Naamani. 3 Lyuŵa limo mwali jula ŵansalile ŵankwakwe che Naamani, "Ngulajila Ambuje ŵangu akawonegene ni jwakulondola jwaali ku Samalia! Komboleka akannamisye matana." 4 Che Naamani paŵapikene ngani jo ŵapite kwa mwenye kukunsalila yakuti mwali jwatyosile ku Isilaeli. 5 Mwenye jwa Alamu ŵatite, "Njigale chikalata chi munjauchisye mwenye jwa ku Isilaeli."

Pele che Naamani ŵatyosile ali ajigele ipande elufu selasini ya feza ni ipande elufu sita ya sahabu ni minjilo jakusalala likumi. 6 Chikalata chiŵachijigele chalembekwe yele, "Chikalata chi chili chakummanyisya kuti nguntuma jwakutumichila jwangu che Naamani kukwenu, kuti nkombole kunnamya matana gakwete."

7 Mwenye jwa ku Isilaeli namala pe kuchisyoma chikalata chila ŵapapwile yakuwala yakwe achitiji, "Ligongo chi mwenye jwa ku Alamu anembele kuti nanlamye mundu ju matana gakwete? Akupela une ndili nnungu jwaali ni ukombole wa kuulaga pane kunsyusya mundu? Nguimanyilila kuti mundu ju akusosa ligongo lyakutenda umagongo ni une."

8 Nambo che Elisha jwakulondola jwa Akunnungu, paŵapikene kuti mwenye jwa ku Isilaeli apapulenye yakuwala yakwe, ŵatumile utenga wu kwa mwenye, "Ligongo chichi mpapwile yakuwala yenu? Munnyichisye mundu jo kukwangu, kuti aimanyilile yakuti apali jwakulondola pa Isilaeli."

9 Che Naamani ŵapite ni falasi jwakwe ni mutuka syakwe mpaka pa nnango wa nyuumba ji che Elisha. 10 Che Elisha ŵantumile jwakutumichila jwakwe akansalile che Naamani, "Njaule nkajoje mala saba ku lusulo lwa Yolodani, pele chiilu chenu chichiswejele." 11 Nambo che Naamani ŵatyosile ali atumbile kwannope, ŵatite, "Kusyene napelaga kuti takopochele paasa ni kumpopelela Ambuje Akunnungu jwakwe ni kuŵika makono gao papali chilwele ni kunamya! 12 Uli, Abana ni Falipali, sulo sya ku Damesiki nganisiŵa syambone nnope kupunda sulo syose sya ku Isilaeli? Ngangakombole koga mwelemo ni kuswejela? Nipele che Naamani ŵatyosile kuuja kumangwao ali atumbile kwannope."

13 Ŵakutumichila ŵa che Naamani ŵanjaulile ni kunsalila, "Atati jwetu, naga jwakulondola ju akansalile ntende chindu chachikulungwa, uli, ngankatende? Sambano ansalile chindu chamwana, kuti njaule nkajoje kuti nswejele!" 14 Kwayele che Naamani ŵatuluchile ku Yolodani ni kulitiŵisya mala saba mpela muŵaŵechetele che Elisha mundu jwa Akunnungu. Papopo ŵalamile, lipende lyakwe lyaliji mpela lipende lya mwanache jwannondi. 15 Nipele che Naamani ni ŵakutumichila ŵakwe ŵausile kwa mundu jwa Akunnungu, che Naamani ŵajimi paujo pa che Elisha, ŵatite, "Sambano naimanyi kuti nganapagwa nnungu pachilambo pose, ikaŵe Akunnungu jwa Isilaeli. Kwayele choonde, mpochele ntuuka wa jwakutumichila jwenu."

16 Che Elisha ŵatite, "Kusyene mpela yatite kuŵa ŵajumi Ambuje Akunnungu ŵangwatumichila, ngambochela ntuuka wauli wose."

Che Naamani ŵanchondelele kwannope apochele, nambo che Elisha ŵakanile. 17 Che Naamani ŵatite, "Naga nkukana kupochela ntuuka wangu, choonde ngummenda mungunde nyigale litaka lya kunokuno lyakomboleka kujigalikwa ni mbunda siŵili. Pakuŵa kutandilila lelo une jwakutumichila jwenu ngaandyosya mbopesi sya kutinisya namose mbopesi jilijose kwa minungu jine ikaŵe kwa Ambuje Akunnungu ŵa ku Isilaeli pe. 18 Nambo Ambuje Akunnungu anechelele uneji katumetume jwenu kwaligongo lya chindu chimo: Pangulongana ni mwenye jwangu kwaula ku nyuumba ja Limoni nnungu jwa Alamu kukupopela, Ambuje Akunnungu anechelele!" 19 Che Elisha ŵaasalile, "Njaule kwa chitendewele." Che Naamani ŵatyosile ni kwaula.

Akanaŵe kwika kwakutalika, 20 che Gehasi jwakutumichila jwa che Elisha mundu jwa Akunnungu, ŵalisalile nsyene, "Ambuje ŵangu ngakankundile che Naamani jwa ku Alamu kutyoka kwanti yeleyo, akaapochele ntuuka uŵaiche nao. Mpela Ambuje Akunnungu yatite kuŵa ŵajumi, tinammutuchile kuti ngapochele chindu chachilichose kwa jwelejo." 21 Kwayele che Gehasi ŵankuiye che Naamani kwakwanguya. Che Naamani paŵalolite ŵamweni mundu alinkwautuchila, ŵatulwiche mu mutuka jakwe ni kwaula kukwachingamila. Ŵammusisye, "Uli, indu yose ili chenene?" 22 Che Gehasi ŵajanjile, "Elo ili chenene. Nambo ambuje ŵangu andumile nansalile alakwe kuti, ‘natyoka pe, ŵandu ŵaŵili ŵaali mu mpingo wa ŵakulondola kutyochela ku chilambo cha matumbi cha Efulaimu anyichilile. Choonde, mumbe ipande elufu tatu ya madini ga feza ni miinjilo jiŵili jakusalala.’"

23 Che Naamani ŵatite, "Choonde njigale ipande elufu sita ya madini ga feza." Che Naamani ŵaachondelele kwannope che Gehasi apochele, nipele che Naamani ŵasitaŵilile mmisaku jiŵili ni kwapa miinjilo jiŵili jakusalala, ŵapele ŵakutumichila ŵakwe ŵaŵili kuti atwichile ni kulongolela ali atwichile paujo pa che Gehasi. 24 Paŵaiche ku chitumbi chiŵatamaga che Elisha, che Gehasi ŵajipochele misigo jila ni kwinjisya mu nyuumba ji che Elisha. Nipele ŵaalanjile ŵakutumichila ŵa che Naamani kuti ajaule.

25 Kanyuma che Gehasi ŵajinjile ni kwima paujo pa che Elisha ambujegwe. Che Elisha ŵausisye, "Mmwe mwaliji kwapi?" Che Gehasi ŵajanjile, "Nganinyaula kulikose." 26 Nambo che Elisha ŵansalile, "Ana nkuganisya kuti une nganinammona katema kaŵatulwiche che Naamani mmutuka jakwe kukunchingamila mmwe? Uli kele ni katema ka kupochela madini ga feza pane yakuwala pane migunda ja miseituni ni misabibu ni ngondolo pamo ni ng'ombe pane ŵakutumichila ŵachilume pane ŵachikongwe? 27 Ligongo lya intesile yo matana ga che Naamani chigaŵe pa chiilu chenu mmwe ni kwa uŵelesi wenu moŵa gose pangali mbesi." Nipele che Gehasi ŵatyosile paujo pa che Elisha ali ni matana ni chiilu chakwe chaliji cheswela mbee.