1 Pakaiche katema kati Ambuje Akunnungu ŵasakaga kunjigala che Elia kwinani kwa litala lya chimbunga, che Elia ni che Elisha ŵaliji mwitala kutyochela ku Giligali. 2 Kanyuma ali mwitala che Elia ŵansalile che Elisha, "Choonde mmwe ntame apano, Ambuje Akunnungu andumile nyaule ku Beseli."

Nambo che Elisha ŵatite, "Kusyene, mpela Ambuje Akunnungu yakuti kuŵa ŵajumi ni mmwe intite kuŵa ŵajumi, ngangunneka." Nipele, ŵajesile pamo mpaka ku Beseli. 3 Mpingo wa ŵakulondola ŵaŵatamaga kweleko ŵanjaulile che Elisha, ŵausisye, "Ana nkwimanyilila kuti lelo Ambuje Akunnungu tanjigale ambuje ŵenu?" Che Elisha ŵaajanjile, "Elo! Ngwimanyilila, ntamanje nuu."

4 Nipele che Elia ŵansalile che Elisha, "Choonde nsigalile apano, Ambuje Akunnungu andumile nyaule ku Yeliko." Nambo che Elisha ŵakanile achitiji, "Kusyene mpela Ambuje Akunnungu yatite kuŵa ŵajumi ni mpela mmwejo yantite kuŵa ŵajumi ngangunneka." Kwayele ŵapite wose mpaka ku Yeliko.

5 Mpingo wa ŵakulondola ŵaŵatamaga ku Yeliko ŵanjaulile che Elisha ni kwausya, "Ana nnyimanyi yakuti lelo jino Ambuje Akunnungu tanjigale ambuje ŵenu?" Che Elisha ŵaajanjile, "Elo naimanyi ntamanje nuu."

6 Nipele che Elia ŵansalile che Elisha, "Choonde alakwe ntame apano, Ambuje Akunnungu andumile nyaule kulusulo lwa Yolodani." Nambo che Elisha ŵanjanjile achitiji, "Mpela Ambuje Akunnungu yatite kuŵa ŵajumi ni mpela mmwe yantite kuŵa ŵajumi, ngangunneka." Nipele, wose ŵapite pamo. 7 Mpingo wa ŵakulondola hansini ŵala ŵapite kwima chiŵandi ni lusulo lwa Yolodani kulolegana ni malo gaŵajimi che Elia ni che Elisha. 8 Che Elia ŵausile mwinjilo wakwe, ŵaupindikenye, ŵagaputile meesi nombe meesi gagaŵanyiche aku na akuno, nombewo ŵapitile papajumu kwaula peesi. 9 Ni yaliji paŵajombweche, che Elia ŵansalile che Elisha, "Musalile nantendele ichichi nganime kujigalikwa kutyochela kukwenu?"

Che Elisha ŵaasalile, "Nguŵenda mbate kaŵili ka machili ga chimbumu ganli nago."

10 Che Elia ŵajanjile, "Mmendile chindu chakulimba, nambo chimpochele yaŵaga chimumone katema kachinyigalikwe kutyochela kukwenu, nambo iŵaga ngamumona, ngampata."

11 Paŵaliji alinkwenda ni kukunguluka, chisisimuchile mutuka jakukwekwelemya jesyungulile mooto jakopochele jili nkukwekwelemwa ni falasi ŵaŵasyungulikwe ni mooto, jaalekangenye ŵaŵili wo, nombe che Elia ŵajigalikwe kwinani kwa litala lya chimbunga. 12 Che Elisha paŵaiweni chindu cho ŵalisile, "Atati ŵangu, atati ŵangu! Ulinda ni machili ga Isilaeli njawile!" Nombe che Elisha nganiŵaona sooni che Elia.

Nipele che Elisha ŵakamwile yakuwala yakwe ni kuipapulanya ipande iŵili. 13 Nipele che Elisha, ŵaulokwete mwinjilo u che Elia uwaagwilile, ŵausile ni kwima mungulugulu mwa lusulo lwa Yolodani. 14 Ŵagaputile meesi kwa mwinjilo u che Elia ula achitiji, "Alikwapi Ambuje Akunnungu, Akunnungu ŵa che Elia?" Paŵagaputile meesi gagaŵanyiche aku na ako, nombejo ŵapitile papajumu kwaula peesi.

15 Aŵula mpingo wa ŵakulondola hansini ŵa ku Yeliko ŵaŵalolaga, ŵatite, "Mbumu ji che Elia jili ni che Elisha." Nipele ŵapite kukwachingamila ni kwakotamila mpaka paasi. 16 Ŵaasalile, "Nnole uŵeji ŵakutumichila ŵenu tukwete ŵandu ŵanganakola woga hansini. Choonde mwalajisye ajaule kukunsosa ambuje ŵenu. Pane mbumu ja Ambuje Akunnungu jaajigele ni kunjasila pa chitumbi chimpepe pane ku lichemba."

Che Elisha ŵajanjile, "Ngwamba ngasimwalajisya."

17 Nambo ŵakanganichile mpaka jakwete soni kwakanila. Nipele ŵatite, "Mwalajisye." Kwayele ŵaalajisye ŵandu hansini kukunsosa kwa moŵa gatatu, nambo nganiŵawona. 18 Paŵausile ku che Elisha juŵaliji ku Yeliko, ŵaasalile, "Ana, nganinansalila nkajaula?"

19 Kanyuma ŵandu ŵa ku Yeliko ŵanjaulile che Elisha, ŵansalile, "Achimwene nnole yaitite kusalala musi wu, utaŵikwe pambone mpela yakuti kwiwona alakwejo, nambo meesi gakwe ngagakufai lyele ni ligongo mimela ngajikusogola."

20 Che Elisha ŵaasalile, "Ntaje njete mu choombo chasambano, nipele nnyiche nacho apano." Kwayele ŵampelechele choombo. 21 Che Elisha ŵatyosile ni kwaula ku chiliŵa ni kujiponyela njete jila mwelemo, achitiji, "Ambuje Akunnungu akuti, nagalamisye meesi ga. Sambano ngagaichisya sooni iwa ni chilambo chichisogosye yakulya yambone pa katema kose." 22 Nipele meesi gala galamile, gakufai mpaka lelo, mpela iŵasasile che Elisha. 23 Che Elisha ŵatyosile ku Yeliko, ŵapite ku Beseli. Ali mwitala achachanda ŵampepe ŵatyosile ku musi ni kwajamila, ŵatite "Nguluche mmwe alulasi! Nguluche mmwe alulasi!" 24 Che Elisha ŵagalawiche ni kwalolechesya, ni ŵapopesile kwa Ambuje Akunnungu kuti ŵalwesye. Jakopochele mikolo jiŵili ja inyama yaikuŵilanjikwa dubu, kutyochela mwitinji, jaaŵalwile achachanda alobaini ni ŵaŵili pasikati jao.

25 Che Elisha ŵajendelechele ni ulendo wakwe mpaka ku chitumbi cha Kalimeli ni kutyochela kweleko ŵausile sooni ku Samalia.