1 Katema ko che Elisha ŵaliji ansalile jwankongwe jwa ku Shunami juŵansyusisye mwanagwe jula yakuti, Ambuje Akunnungu akusaka kujiichisya sala jakununga pachilambo, chijitamilisye kwa yaka saba. Kwayele atyoche ni ŵandu ŵamunyuumba jakwe ajaule kutama kwine. 2 Jwankongwe jula jwatesile mpela muŵasalilwe ni che Elisha mundu jwa Akunnungu, ŵajawile pamo ni ŵandu ŵakwe kukutama nti achalendo ku chilambo cha Ŵafilisiti kwa yaka saba.

3 Payapitile yaka saba, jwankongwe jula jwatyosile ku chilambo cha Ŵafilisiti ni kuuja ku Isilaeli ni kunjaulila mwenye kukummenda ŵaakamuchisye kupata nyuumba jakwe ni ngunda wakwe. 4 Ŵansimene mwenye alinkukunguluka ni che Gehasi, jwakutumichila ju che Elisha achisakaga kuti ŵaasalile yindu yaikulungwa yatesile che Elisha. 5 Che Gehasi paŵansalilaga mwenye nkati che Elisha iŵansyusisye mundu juŵawile, jwankongwe jula ŵaiche kuti ammende mwenye kuti ŵaakamuchisye kupata nyuumba jakwe ni ngunda ŵakwe. Che Gehasi ŵatite, "Alakwe mwenye, jweleju ni jwankongwe jwa ajula jwanchanda juŵasusikwe ni che Elisha." 6 Mwenye ŵammusisye jwankongwe jo, yankati indu yo nombejo ŵaasagamukulile. Pelepo mwenye ŵansagwile nkamusi jwakwe ni ŵansalile ammuchisye jwankongwe jula indu yakwe yose pamo ni yaipatikene mu ngunda wakwe kwa yaka saba kutyochela paŵatyosile mu Isilaeli.

7 Kanyuma che Elisha ŵajawile ku Damesiki ku chilambo cha ku Alamu, ni kele katema ko mwenye che Beni Hadadi ŵaliji nkulwala. Mwenye paŵasalilwe kuti mundu jwa Akunnungu che Elisha aiche apano, 8 ŵansalile che Hasaeli nkamusi jwakwe, "Mumpelechele mundu jwa Akunnungu awu ntuka wu, munsalile kuti ŵaausye akunnungu iŵaga ulwele wu tiname pane ngwamba." 9 Nipele che Hasaeli ŵajawile kusimana ni che Elisha ali ajigele kila chindu chambone chachikupatikanana mu Damesiki, indu yo yajigalikwe ni ngamia alobaini. Paŵaiche ku che Elisha ŵajinjile nkati ni kwimi paujo pakwe, ni ŵansalile, "Jwakutumichila jwenu, che Beni Hadadi, mwenye jwa ku Alamu, andumile kukwenu, nombejo akuusya, ‘Uli chalame ulwele wali nawo?’" 10 Nipele che Elisha ŵajanjile, "Njaule nkaasalile, ‘Kusyene talame chilwele chi’, nambo Ambuje Akunnungu anosisye kuti kusyene chaulajikwe." 11 Pelepo che Elisha ŵankolondolele meeso che Hasaeli mpaka che Hasaeli waliji josopaa. Papopo jwakulondola che Elisha ŵatandite kulila.

12 Che Hasaeli ŵausisye, "Ana alakwe," kwachichi nkulila? Che Elisha ŵajanjile, "Ligongo nguumanyilila ugongomalo utimwatendele ŵandu ŵa ku Isilaeli. Chinchome mooto makome gawo ni kwaulaga achachanda wao ni lipanga, ŵanache ŵao ŵanandi chimwatiliŵe ni kwatumbula achakongwe ŵaali ni itumbo."

13 Che Hasaeli ŵatite, "Ikukomboleka chinauli une jwakutumichila jwenu jungutumikwa mpela mbwa pe kuitendekanya indu yakogoya nti yeleyo?"

Che Elisha ŵajanjile, "Ambuje Akunnungu, anosisye kuti mmwe timme mwenye jwa ku Alamu."

14 Che Hasaeli ŵapite kwa ambujegwe mwenye che Beni Hadadi, nombe che Beni Hadadi ŵausisye, "Ana che Elisha ansalile ichichi?"

Che Hasaeli ŵajanjile, "Asalile kuti kusyene chinlame." 15 Nambo malaŵi jakwe che Hasaeli ŵalijigele libulangeti, ŵalinyoyisye mmesi ni kwaunichila kumeso mpaka ŵajasiche. Nipele che Hasaeli ŵatawele pamalo pakwe.

16 Pachaka cha nsano cha kutawala kwa che Yolamu mwana ju che Ahabu mwenye jwa ku Isilaeli, che Yeholamu mwana jwa che Yehoshafati ŵatandite kutawala ku chilambo cha ku Yuda. 17 Ŵatandite kutawala ali ni yaka selasini na mbili. Kwa yaka nane ŵachitawele chilambo cha Yuda ali nkutama ku Yelusalemu. 18 Mwenye che Yeholamu jwa ku Yuda ŵatesile indu ilaila yangalumbana iŵaitesile mamwenye ŵane ŵa ku Isilaeli nti iŵatesile ŵandu ŵapannango wa che Ahabu, pakuŵa ŵankwakwe ŵaliji mwali ju che Ahabu mwenye jwa ku Isilaeli, ni ŵatesile ugongomalo paujo pa Ambuje Akunnungu. 19 Nambo Ambuje Akunnungu nganasaka kuujonanga Yuda, kwaligongo lya che Daudi jwakutumichila jwakwe, pakuŵa ŵaalanjile kuti uŵelesi ŵakwe chiujendelechele kutawala moŵa gose pangali mbesi. 20 Katema ka che Yeholamu, ŵandu ŵa ku Edomu ŵaukanile umwenye wa ku Yuda, ŵammisile mwenye jwao.

21 Nipele che Yeholamu ŵatyosile ni mutuka syakwe sya ngondo syose ni kwaula kuugungumuchila musi wa ku Saili wauli ku chilambo cha ku Edomu. Ŵaedomu ŵansyungwile che Yeholamu pamo ni ilongola ŵa mutuka syakwe sya ŵangondo syakukwekwelemwa ni falasi, nambo chilo ŵakombwele kutila, ni ŵangondo ŵakwe ŵautwiche ni kuuja mmangwao. 22 Namose yeleyo ŵandu ŵa ku Edomu ŵakanile kutawalikwa ni mwenye jwa ku Yuda mpaka lelo jino. Ŵandu ŵa ku Libina nombe ŵakanile kutawalikwa ni mwenye jwa ku Yuda.

23 Indu ine yose iyatendekwe katema che Yeholamu paŵatawalaga ni indu iŵaitesile ilembekwe mu chitabu cha ikumbuchisyo ya mamwenye wa ku Yuda. 24 Che Yeholamu ŵajasiche ni kusichikwa mmalembe ga chimwenye mu musi u che Daudi, ni che Ahasi mwanagwe che Yeholamu ŵatawele pamalo pakwe.

25 Pachaka cha kumi na mbili cha umwenye wa che Yolamu mwana jwa che Ahabu mwenye jwa ku Isilaeli, che Ahasia mwana jwa che Yeholamu mwenye jwa ku Yuda jwatandite kutawala. 26 Che Ahasia ŵatandite kutawala ali ni yaka ishilini na mbili. Nombewo ŵatawele ku Chilambo cha ku Yuda kwa chaka chimo ali nkutyochela ku Yelusalemu. Achikulugwe ŵaŵilanjikwagwa che Atalia chisukulu chi che Omli mwenye jwa ku Isilaeli. 27 Che Ahasia ŵatesile ugongomalo paujo pa Ambuje Akunnungu mpela iŵatesile ŵandu ŵa pannango wa mwenye che Ahabu kuŵalombele, nombejo ŵakuiye majendelo ga ŵandu ŵapannango wa che Ahabu.

28 Mwenye che Ahasia ŵajilene ni che Yolamu mwana ju che Ahabu ajaule kukuputana ngondo ni che Hasaeli mwenye jwa ku Alamu akula ku Lamatoti Gileadi. Kweleko Ŵaalamu ŵammulesye che Yolamu. 29 Nipele mwenye che Yolamu ŵausile ku musi wa Yesileeli kuti akalilwasye ilonda iŵaipatile pakuŵa Ŵaalamu ŵaulesye kwele ku Lamoti paŵaputanaga ni che Hasaeli mwenye jwa ku Alamu. Nombe che Ahasia mwana ju che Yeholamu mwenye jwa ku Yuda ŵanjaulile che Yolamu mwana ju che Ahabu akula ku Yesileeli pakuŵa ŵaliji auleswe.