1 Mwenye che Hesekia paŵapikene ngani syo, ŵapapwile yakuwala yakwe ni kuwala ligunia, ŵajinjile pa Nyuumba ja Akunnungu. 2 Ŵantumile che Eliyakimu, jwakwimilila nyuumba ja chimwenye, ni che Shebina jwakulemba, ni ŵambopesi achakulu, ŵanawose ali aŵete magunia ajaulanje kwa jwakulondola che Isaya mwana ju che Amosi. 3 Ŵanyawo ŵansalile che Isaya kuti, "Yeleyi ni yaakuti che Hesekia: ‘Lyeleli lili lyuŵa lya kusupuka, ni kwamukwa ni kwaluka. Chilambo chetu chili mpela achikulu ŵakwete chilungusi chakuligopola mwanache, nambo nganakola machili ga kuligopola. 4 Komboleka Ambuje Akunnungu, Akunnungu ŵenu ŵagapikene maloŵe ga jwankulu jwa ŵangondo jwatumikwe ni mwenye jwa ku Ashulu, ambujegwe kuti ŵatukane Ambuje Akunnungu ŵajumi. Nombe Ambuje Akunnungu, Akunnungu ŵenu chiŵaajamuche kwa maloŵe gapikene. Kwa yele mpopele kwa ligongo lya ŵandu ŵasigele ŵajumi.’"

5 Nipele, ŵakutumichila ŵa mwenye che Hesekia paŵaiche ku che Isaya, 6 ŵaasalile, "Mwasalile ambuje ŵenu kuti Ambuje Akunnungu akuti, ‘Nkajogopa kwa ligongo lwa maloŵe gampikene, gaŵechete ŵakutumichila ŵa mwenye jwa ku Ashulu gakuunyosya une. 7 Mpilikane, chimiche mbumu nkati mwakwe japi patapikane ngani jimpepe tauje ku chilambo chakwe, ni kweleko tinantende aulajikwe ni lipanga.’"

8 Nipele ajula jwankulu jwa ŵangondo paŵapikene kuti mwenye jwa ku Ashulu ŵaliji atyosile ku Lakishi, ŵatyosile ku Yelusalemu ni kunsimana mwenye jwa ku Ashulu ali nkuugungumuchila musi wa ku Libina. 9 Kanyuma mwenye paŵapikene ngani jakuti che Tilihaka mwenye jwa ku Kushi akwika kuti aputane nao, ŵaatumile sooni ŵantenga ku che Hesekia achitiji, 10 "Mwasalile che Hesekia mwenye jwa ku Yuda, ‘Nkakunda kuti nnungu jwenu junkunkulupilila annambusye kuti musi wa ku Yelusalemu ngaujigalikwa ni mwenye jwa ku Ashulu. 11 Mmwe mmasile kupikana mamwenye ŵa ku Ashulu iŵaitesile ilambo yose ni kuijonanga kusyene. Nkuganisya kuti mmwe chinkulupuche? 12 Uli, minungu ja ilambo yejonasikwe ni achambuje ŵangu jakombwele kwakulupusya, yaani minungu ja ŵandu ŵa ku Gosani ni ku Halani ni ku Lesefu, ni ja ŵandu ŵa ku Edeni ŵaŵatamaga ku Telasali? 13 Ali kwapi mwenye jwa ku Hamati, ni mwenye ja ku Alipadi, ni mwenye jwa ku Sefalifaimu, pane jwa ku Hena pane jwa ku Iva?’"

14 Mwenye che Hesekia ŵapochele chikalata kutyoka kwa ŵantenga ni kuchisyoma. Nipele ŵakwesisye ni kwaula pa Nyuumba ja Ambuje Akunnungu, ŵachitambasukwile ni kuchiŵisile paujo pa Ambuje Akunnungu. 15 Nombe che Hesekia ŵapopelele Ambuje Akunnungu achitiji, "Alakwe Ambuje Akunnungu, Akunnungu jwa ku Isilaeli junkutama pa chitengu cha umwenye pasikati ja yepanganyikwe yaili ni mapapiko, mmwemwe pe nli Akunnungu junkutawala mwenye syose sya pachilambo. Mmwe ni ŵangumbile kwinani ni chilambo. 16 Alakwe Ambuje Akunnungu, nnole yaikutusimana uweji, ngapikane maloŵe gose ga che Senakelibu gati atupelechele kuntukana mmwe Akunnungu jundi jwanjumi. 17 Alakwe Ambuje Akunnungu, isyene kuti mamwenye ŵa ku Ashulu ŵaajonasile ŵandu ŵa ilambo ine ni ilambo yao. 18 Ŵajichomile mooto minungu jao pakuŵa nganijiŵa minungu ja usyene, nambo yaliji itela ni maganga gagasepekwe ni makono ga ŵandu. 19 Sambano, alakwe Ambuje Akunnungu, Akunnungu ŵetu, choonde ntukulupusye mmakono mwa che Senakelibu mwenye jwa ku Ashulu, kuti mwenye syose sya pachilambo sikombole kwimanyilile kuti mmwe jikape ni ŵanli Ambuje Akunnungu."

20 Nipele che Isaya mwana ju che Amosi ŵatumile utenga ku che Hesekia, achitiji, "Yele ni yakuti Ambuje Akunnungu, Akunnungu jwa ku Isilaeli, ‘Mbikene mapopelo genu nkati che Senakelibu mwenye jwa ku Ashulu. 21 Ali lili liloŵe lya Ambuje Akunnungu liŵalisasile kungamba che Senakelibu, Aŵa ŵandu ŵa Kuyelusalemu ŵaakwakwakulupilila Ambuje Akunnungu ngaakunchimbichisya namose kunjogopa. Akupukunya mitwe jao kwa kunchembulusya. 22 Ana ŵani umuntukene ni kunjalusya? Ana ŵani umwaakopochesyaga liloŵe ni kwakolondolela meeso kwa chibuli? Ali Akunnungu ŵaswela ŵati ŵandu ŵa ku Isilaeli akumpopelela!’" 23 Kwalitala lya utenga wenu mwantukane Ambuje Akunnungu, yele ni imwatite kuligamba "Kwa mutuka syangu sya ngondo, ngwesile ku songa sya matumbi mpaka ku lusonga nnope kwa chikwesya cha Lebanoni. Ngatile mielesi jakwe jeleu, ni misonobali jakwe jambone. Nyinjile mpaka ku matinji gao gagali kwakutalika nnope mmalikonde mwamukakaŵene." 24 Nkulilapa kuti sosile isima ku chilambo chachilendo ni ngung'wa meesi kweleko, kwa sajo syagangu nyumwisye sulo sya ku Misili.

25 "Uli nganimpikana kuti kalakala nalamwile yeleyo? Kutandilila kuundanda naliŵisile chile kutenda yelei; sambano nachitesile kuti chityochele. Njigalawisye misi jesyunguchisye mapupa kuŵa liunjili lya maganga. 26 Ŵandu ŵa mmisi jo amalilwe machili, apwele mitima ni kwaluka. Aŵele mpela mimela jajili mmigunda, mpela masipuka gakutepetala ga chisamba. Mpela manyasi gagakumela pachanya chipagala gagakuumula gakanaŵe kukula.

27 "Nambo napamanyi pamalo panli, ngumanyilila katemachi kankutyoka ni katemachi kankwinjila kwenu, ni yantite kuŵa ni chisongolo kukwangu. 28 Kwaligongo lya kukunguluka ni uneji kwa chisongolo ni pakuŵa mbilikene yankuti kulikweya, timiche ndoana mu mbula jenu, ni chipaande cha chisyano pakang'wa penu, tinjintenda mmuje ku chilambo chenu nli nkusupuka."

29 Nipele che Isaya ŵansalile mwenye che Hesekia, "Achi chichiŵe chimanyisyo kukwenu che Hesekia: Achi chaka chi chindye mauuka ni chaaka chaaŵili chinlye makoloŵele. Nambo chaka chaatatu chimpande ni kugungula, mpandeje misabibu ni kulya isogosi yakwe. 30 Aŵala watasigalile ku chilambo cha ku Yuda tachitupa ni kuŵa achajinji pachilambo mpela chitela chichili ni michiga jakwendesya paasi ni kusogola isogosi pachanya. 31 Pakuŵa kutyochela ku Yelusalemu taaiche ŵatasigalile, ni kutyochela ku chitumbi cha Sayuni mpingo wa ŵatakulupuche. Pakuŵa Ambuje Akunnungu ŵaali ni machili gose asachile kuitindimisya yeleyo.

32 "Kwayele, Ambuje Akunnungu akuti nnyi nkati mwenye jwa ku Ashulu ‘Ngaajinjila mu musi wu atamuno kuputa chimaje apano, ngaika paujo pakwe ali ni chakulisiŵila pa ntima atamuno kuunjika litaka kuti akwele pa mapupa gakwe kuti augungumuchile. 33 Taujile litala lilalila liŵaiche nalya namose ngajinjila mu musi wu, yeleyo ni yakuti Ambuje Akunnungu. 34 Elo, kwa ligongo lya luchimbichimbi lwangu une ni kwa ligongo lya jwakutumichila jwangu che Daudi, tinaulindilile ni kuukulupusya musi wu.’"

35 Nipele, chilo cho katumetume jwa kwinani jwa Ambuje Akunnungu ŵajinjile pachigono cha Ŵaashulu ni kwaulaga ŵangondo laki moja ni elufu semanini na tano. Ŵandu paŵajimwiche kundaŵi ŵaasimene malilo gajenele papali pose! 36 Nipele che Senakelibu mwenye jwa ku Ashulu ŵatyosile ni ŵangondo ŵakwe, ŵausile ku chilambo chao kwele ku Ninawi ni kutama kweleko. 37 Lyuŵa limo katema che Senakelibu paŵaliji ali nkupopelela mu nyuumba ja Nisiloki nnungu jwakwe, achiŵanagwe ŵaŵili che Adilameleki ni che Shaleseli ŵammuleje kwa lipanga, ni kuutuchila chilambo cha ku Alalati. Nombe che Esali Hadoni mwanagwe ŵaliji mwenye pamalo pakwe.