1 Che Elisha ŵatite, "Mpilikane liloŵe lya Ambuje Akunnungu: Ambuje Akunnungu akuti malaŵi katema mpela aka, ibaba nsano ya utandi wesyajiche yambone pane ibaba kumi ya shayili chisumichikwe kwa chipande chimo cha feza pa nnango wakwinjilila musi wa ku Samalia." 2 Jwakutumichila jwankulu jwa mwenye ŵansalile che Elisha, "Chele chindu chi ngachikomboleka, namose Ambuje Akunnungu nsyene akakuswile shayili syejinji kutyoche kwinani!"

Che Elisha ŵajanjile, "Mmwejo chinchiwone chele chindu chi chili mkukopochela nambo mmwe mwasyene ngandya chilichose."

3 Nipele kwaliji ni ŵandu ncheche ŵaŵaliji ni matana pannango wekulungwa wakwinjilila musi wa ku Samalia. Ni ŵasalilene kuti, "Kwa chichi tulindilile apano mpaka tuwe ni sala? 4 Twajinjilaga mu musi kweleko kwana sala, nowe chituwilile mwelemo, nambo twasigalilaga pelepa nombe chituwe pe. Kwayele tujaule ku chigono cha Ŵaalamu, iŵaga tatuleche tutuŵe ŵansima, nambo iŵaga tatuulaje, ayaga tuweje." 5 Katema ka ligulo, chipi pachatandite kwinjila, ŵapite ku chigono cha Ŵaalamu. Paŵaiche ku chigono nganansimana namose mundu jumo, 6 pakuŵa Ambuje Akunnungu ŵaatendekasisye Ŵaalamu apikane chisindo cha ŵangondo achajinji ŵaali ni mutuka syakukwekwelemwa, pamo ni chisindo cha falasi. Ŵaalamu ŵasalilene kuti mwenye jwa ku Isilaeli ŵakodisye ŵangondo ŵa Ŵahiti ni Ŵamisili kuti ŵaagungumuchila ŵanyawo. 7 Kwayele ŵautwiche chilo pecho, aukulupusye umi wao. Ŵagalesile masakasa gao ni falasi syao ni mbunda ni chigono chao ilaila mpela iyaliji.

8 Ŵandu ŵaali ni matana ŵala paŵaiche mumbali mwa chigono chila ŵajinjile mu lisakasa limo. Ŵalile ni kung'wa iŵaipatile mwemula ni kujigala feza ni sahabu ni yakuwala, ŵajawile kuisisa. Ŵausile ni kwinjila mu lisakasa line, ŵatesile iyoyo. 9 Pelepo ŵasalilene, "Itukuitenda ngaŵa yambone! Ngani jatulinajo jili jambone noweji tukujitenda jetu jika. Iŵaga tukulindilila kuche ni twasalile ŵane chitujamukwe kusyene. Tujaule sambano tukaasalile ŵakutumichila ŵa mwenye!" 10 Nipele ŵatyosile pachigono pala, ŵapite ku Samalia ni kwaŵilanga ŵakulindilila pannango wekulungwa ni kwasalila, "Twapite ku chigono cha Ŵaalamu, nganitunsimana atamuno kummona mundu jwalijose pane kupikana liloŵe lya mundu jwalijose, pane falasi ni mbunda syasitaŵikwe, masakasa gawo gali mpela yatite kuleka."

11 Ŵakulindilila pannango wekulungwa ŵala ŵatangesye ngani jila mpaka jaichilile mwenye. 12 Kwaliji nganikuche, nambo mwenye ŵajimwiche pachindanda ni kwasalila ŵakamusi ŵakwe, "Nlinde nansalile chaatesile Ŵaalamu! Akwimanyilila kuti kwana sala apano, kwayele achilesile chigono chao ni kwaulangana kukulisisa, Akuganisya kuti chituuleche musi ni kwaula kukusosa yakulya, pele ni pachatukamule wose tuli ŵajumi ni kuujigala musi."

13 Nkamusi jumo jwa mwenye ŵatite, "Mwalamule ŵandu ŵampepe ajaule ni falasi nsano ŵasigalile mmusi mu. Iŵaga tawe kweleko, ngatupunguwa nnope kulandanya ni mpingo wose wa Ŵaisilaeli ŵawile." 14 Nipele ŵasagwile ŵandu ŵampepe ni kwapa mutuka siŵili. Mwenye ŵaatumile ŵaakuichisye ŵangondo ŵa Chialamu, ŵaasalile "Njaulanje nkalole chiindu chachikopochele." 15 Ŵandu ŵala ŵaakuichisye mpaka ku Yolodani, mwitala ŵaiweni yakuwala ni yoombo iŵaponyaga Ŵaalamu paŵautukaga. Nipele ŵandu ŵala ŵausile kwaula kukwasalila mwenye yaiweni. 16 Ŵandu ŵaŵaliji mmusi wa Samalia ŵatyosile ni kwaula kuchijigala chigono cha Ŵaalamu. Ni yaliji mpela iŵasasile Ambuje Akunnungu kuti, ibaba nsano ya utandi wa ngano wesyajiche yambone pane ibaba kumi ya shayili syasumichikwe kwa chipande chimo cha madini ga feza.

17 Nipele mwenye ŵammisile ajula jwakutumichila jwankulu, jwati jwaliji nkamusi jwakwe, kuti ajimilile ŵandu paakwinjila pannango. Nambo jwakutumichila jwankulu jula jwaliŵatikwe ni ŵandu paŵapitaga pannango pala ni ŵawile, mpela iŵalondwele che Elisha katema mwenye paŵajawile kunyuumba ji che Elisha. 18 Ni yakopochele mpela che Elisha mundu jwa Akunnungu iŵatite kunsalila mwenye, paŵatite kuti, "Malaŵi katema mpela akano, ibaba nsano ya utandi wesyajiche yambone ni ibaba kumi ya shayili chiisumikwe kwa chipande chimo cha madini ga feza pannango wekulu wakwinjilila mmusi wa Samalia." 19 Jwakutumichila jwankulu jula ni juŵanjanjile che Elisha kuti, "Chele chindu chi ngachikomboleka, namose Ambuje Akunnungu nsyene akakuswile shayili syejinji kutyoche kwinani." Che Elisha ŵajanjile "Chinnyiwone kwa meeso genu mwasyene nambo mmwe ngandya chilichose mwa yakulya yo!" 20 Yaapatile ilaila. Ŵaliŵatikwe ni ŵandu pannango wekulungwa wa musi ni ŵawile.