1 Pa chaka cha tisa cha utawala wa mwenye che Sedekia, pa lyuŵa lya kumi lya mwesi wa kumi, Nebukadineza mwenye jwa ku Babeli ŵapite kuugungumuchila musi wa ku Yelusalemu. Ŵaŵisile chigono paasa musi ni ŵaunjiche litaka kuti akolosye paakwelela mmapupa mbande syose kuti ŵaagungumuchile ŵandu ŵa musi wo. 2 Musi ŵajendelechele kusyungulwa mpaka pa chaka cha kumi na moja cha utawala wa mwenye wa che Sedekia. 3 Lyuwa lya tisa lya mwesi wa ncheche, kwaliji ni sala jakunuunga pa musi, nganichipagwa chakulya chilichose kwa ligongo lya ŵandu ŵa musi wo. 4 Nipele lipupa lya musi wo lyagumulikwe, nombe ŵangondo wose ŵautwiche katema ka chilo, ŵapitile pannango uwaliji pasikati mapupa gaŵili chiŵandi ni ngunda wamwana wa mwenye, nachiŵamuno ŵangondo ŵa ku Babeli ŵaliji ausyungwile musi, ŵautwiche achipitaga ku chipululu cha ku Alaba kwaula ku chiŵata ch lusulo lwa Yolodani. 5 Nambo ŵangondo ŵa ku Babeli ŵankuiye mwenye ni kunsimana ku iŵata ya ku Yeliko. Ŵangondo ŵakwe wose ŵannesile ni kupwilingana, 6 ni ŵakamulikwe. Nipele, ŵanjawisye kwa mwenye jwa ku Babeli ku musi wa ku Libila ko pamalo pati ŵanlamwile. 7 Ŵauleje achiŵanagwe che Sedekia nsyene ali nkulola, nipele ŵagakusile meeso gakwe, ŵantaŵile kwa magwedegwede ga shaba ni ŵanjawisye ku Babeli.

8 Pa lyuŵa lya saba pa mwesi wa tano pa chaka cha kumi na tisa cha utawala wa Nebukadineza mwenye jwa ku Babeli, che Nebusaladani jwankulu jwa ŵakulindilila ŵa mwenye, ni nkamusi jwa mwenye jwa ku Babeli, ŵajinjile ku Yelusalemu. 9 Ŵachomile Nyuumba ja Ambuje Akunnungu, ni nyuumba ja chimwenye ni nyuumba syose sya ku Yelusalemu, kila nyuumba ja mundu jwakumanyika jachomekwe mooto. 10 Nombe ŵangondo wose ŵa ku Babeli ŵaŵaliji pamo ni jwankulu jwa ŵakulindilila ŵa mwenye ŵagumwile mapupa gagasyungwile musi wa Yelusalemu. 11 Che Nebusaladani juŵaliji wankulu jwa ŵakulindilila ŵa mwenye, ŵaapeleche ku usami ŵandu wose ŵaŵasigalile ku musi ni aŵala wose ŵaŵasigalile pamo ni ŵangondo wose ŵaŵalipeleche achinsyene kwa mwenye jwa ku Babeli. 12 Nambo ŵaalesile ŵandu ŵane ŵaŵaliji ŵakulaga nnope ŵa mmusi. Ŵalesile agose migunda ja misabibu ni migunda jine. 13 Ŵangondo ŵa ku Babeli wakasenye ipandeipande imila ya shaba iyaliji pa Nyuumba ja Ambuje Akunnungu, pamo ni itamichilo yakwe, ntawala wekulungwa wa shaba uwaliji pa Nyuumba ja Ambuje Akunnungu, ŵajijigele shaba mpaka ku Babeli. 14 Iyoyopeyo ŵajigele iŵiga, masepetu, mikasi jakukatila utambi ni yoombo ya lilongo ni yombo yose ya shaba iyatumikaga pa Nyuumba. 15 Jwankulu jwa ŵakulindilila ŵa mwenye ŵajigele iteso ni mabakuli ga kunyuluchisya miasi ni kila choombo cha sahabu jakusalala ni choombo cha madini ga feza. 16 Shaba jose jiŵatumie mwenye che Selemani kukolochesya imila iŵili ni ntala wekulungwa ula ni itamichilo kwa ligongo lya pa Nyuumba ja Ambuje Akunnungu nganilikomboleka kulipima chisilo chakwe. 17 Kila chimila chaliji ni uleu wa mita nane, pachanya pakwe paliji ni ntwe wa shaba, uleu wa kila ntwe waliji mita moja na lobo. Kila ntwe ŵasyunguchiswe ni yakusalalisya ya isogosi ya chitela chachikuŵilanjikwa makomamanga, yose ya shaba.

18 Nipele che Nebuzaladani jwankulu jwa ŵakulindilila ŵa mwenye ŵaakamwile che Selaya jwambopesi jwankulu, ni che Sefania jwambopesi nkamusi pamo ni achakulu ŵakulindilila pa minango jitatu. 19 Kutyochela kwa aŵala ŵaŵaliji chiŵela pa musi, ŵanjigele jwankulu jumpepe juŵaajimililaga ŵangondo ŵamachili pamo ni ŵandu nsano ŵaŵaliji ŵashauli ŵa mwenye. Iyoyo ŵanjigele jwakulemba juŵaliji jwankulu juŵajimililaga kwajandika ŵangondo, pamo ni ŵandu ŵakwe sitini, ŵaŵasimanikwe pa musi wa Yelusalemu. 20 Che Nebusaladani jwankulu jwa ŵakulindilila ŵaajigele ŵandu wo, ŵaapeleche kwa mwenye jwa ku Babeli ako ku Libila. 21 Kwele ku Libila ko, ku chilambo cha Hamati, mwenye jwa ku Babeli ŵalamwile kuti ŵandu wo ataŵililwe. Kwayele ŵandu ŵane wose ŵa ku Yuda ŵajigalikwe migole kwatalika ni chilambo chao.

22 Che Nebukadineza mwenye jwa ku Babeli ŵansagwile che Gedalia mwana jwa che Ahikamu, chisukulu cha che Shafani, aŵe jwakwajimilila ŵandu wose ŵaŵaalesile ku Yuda. 23 Achakulu ŵa ŵangondo wose pamo ni ŵandu ŵao paŵapikene yakuti mwenye jwa ku Babeli ansagwile che Gedalia aŵe jwankulu, ŵanjaulile che Gedali ako ku Misipa. Ŵandu wo ŵaliji che Ishumaeli mwana jwa che Netania ni che Yohanani mwana jwa che Kalea ni che Selaya mwana ja che Tanihumeti Mnetofati ni che Yesania mwana jwa che Maaka pamo ni ŵandu ŵaŵaliji pamo nawo. 24 Nombe che Gedalia ŵalumbilile paujo pao ni ŵandu ŵakwe, achitiji, "Nkajogopa ligongo lya achakulu ŵa ku Babeli. Ntame pachilambo pa muntumichile mwenye jwa ku Babeli ni indu yose tiinjendele yambone." 25 Pa mwesi wa saba, che Ishumaeli mwana jwa che Netania, chisukulu cha che Elishama juŵaliji jwa ntundu wa chimwenye, ŵaiche kwa che Gedalia achilonganaga ni ŵandu kumi, ŵangungumuchile che Gedalia, ŵammuleje. Iyoyopeyo, ŵauleje Ŵayahudi ni ŵandu ŵa ku Babeli ŵaŵaliji pamo nao ku Misipa ko. 26 Pelepo ŵandu wose, ŵaangamanyika ni ŵakumanyika pamo ni ilongola ŵa ŵangondo ŵao, ŵatyosile, ŵatilile ku Misili, ligongo ŵajogopaga Ŵakalidayo.

27 Pa chaka cha selasini na mbili, che Evili Melodaki mwenye jwa ku Babeli, paŵatandite kutawala, chaka chichocho ŵanlechelele che Yehoyakini mwenye jwa ku Yuda, ŵantyosisye mu nyuumba ja kutaŵilwa. Lyele lyaliji lyuŵa lya ishilini na saba ja mwesi wa kumi na mbili, chaka cha selasini na saba kutandilila che Yehoyakini paŵajigalikwe migoli. 28 Mwenye ŵa ku Babeli Ŵakungulwiche yambone ni Che Yehoyakini mwenye jwa ku Yuda ni kwaluchimbichimbi kupunda iŵatesile mamwenye ŵane ŵa ku Babeli ŵaŵannongolele. 29 Nipele, che Yehoyakini ŵausile yakuwala yakwe ya mu nyuumba ja kutaŵilwa ni kutandilila katema ko ŵaliji nkulya pamo ni mwenye mu atame wakwe wose. 30 Sooni kila lyuŵa, mwenye jwa ku Babeli ŵaliji nkwapa mwenye che Yehoyakini indu iyaasoŵaga mu utame wakwe wose.