1 Pa chaka cha kumi na nane cha utawala wa mwenye che Yehoshafati jwa ku Yuda, che Yolamu mwana ju che Ahabu ŵatandite kutawala ku Isilaeli achitamaga ku Samalia. Ŵatawele kwa yaka kumi na mbili. 2 Che Yolamu ŵatesile yangalumbana paujo pa Ambuje Akunnungu, nambo nganiiŵa mpela iŵaitesile atatigwe ni achikulugwe. Ŵachikasenye chinyago cha maganga cha nnungu Baali chiŵachikolosisye atatigwe. 3 Namose yeleyo che Yolamu ŵajendelechele kutenda sambi mpela siŵasitesile mwenye che Yeloboamu mwana ju che Nebati, ni kwatendekasya Ŵaisilaeli atende sambi.

4 Sambano, pa katema ko che Mesha mwenye jwa ku Moabu ŵalangaga ngondolo, ni kila chaka ŵapelekaga nsongo kwa mwenye jwa ku Isilaeli, ngondolo syamwana laki moja ni manyunya ga ngondolo sya nkambaku laki moja. 5 Nambo pakumala kuwa mwenye che Ahabu jwa Isilaeli, mwenye che Mesha jwa ku Moabu ŵakanile kulipa nsongo kwa mwenye che Yolamu jwa ku Isilaeli. 6 Kwayele, mwenye che Yolamu ŵatyosile ku Samalia ŵasongangenye mpingo ŵa ŵangondo ŵa ku Isilaeli wose. 7 Nipele ŵatumile utenga kwa mwenye che Yehoshafati jwa ku Yuda, ŵaasalile "Mwenye ja ku Moabu ang'alawiche. Uli chinjaule pamo ni une tukaputane nao?"

Mwenye che Yehoshafati ŵajanjile, "Chinyaule ni mmwe. Uwe tuli chindu chimo, ŵandu ŵangu ali mpela ŵandu ŵenu, falasi syangu sili mpela syenu." 8 Mwenye che Yehoshafati ŵausisye, "Chitwagungumuchile kwa litala chi?"

Mwenye che Yolamu ŵajanjile, "Kwa litala lya ukweti wa ku Edomu."

9 Nipele, mwenye jwa ku Isilaeli ni mwenye jwa ku Yuda pamo ni mwenye jwa ku Edomu ŵatyosilenje. Paŵajesile kwa moŵa saba, mipingo ja ŵangondo jamalilwe meesi gakung'wa achinsyene wo pamo ni inyama yao. 10 Pelepo mwenye jwa ku Isilaeli ŵatite, "Ulaje kukwetu! Ana Ambuje Akunnungu atuŵilasile uweji mamwenye ŵatatu kuti atutende tukamulikwe ni mwenye jwa ku Moabu?"

11 Nambo che Yehoshafati ŵausisye, "Uli, apano nganapagwa jwakulondola jwa Ambuje Akunnungu jwati tukukombola kwausya Ambuje Akunnungu kwa litala lya jwelejo?"

Jwakutumichila jumo jwa mwenye jwa ku Isilaeli ŵajanjile, "Apali che Elisha mwana ju che Shafati. Jwelejo jwaliji nkamusi jwa jwakulondola ju che Elia."

12 Mwenye che Yehoshafati ŵatite, "Jwelejo akusala chaakusalilwa ni Akunnungu achisale." Kwayele mwenye jwa ku Isilaeli ni mwenye che Yehoshafani ni mwenye jwa ku Edomu ŵanjaulile che Elisha.

13 Nombe che Elisha ŵammusisye mwenye jwa ku Isilaeli, "Kwachichi nnyiche kwa uneji? Njaule kwa ŵakulondola ŵa atati ŵenu ni ŵakulondola ŵa achikulu ŵenu."

Mwenye jwa ku Isilaeli ŵajanjile, "Ngaŵa! Ambuje Akunnungu ni ŵatuŵilasile uweji mamwenye ŵatatu, kuti atutende tukamulikwe ni ŵandu ŵa ku Moabu."

14 Che Elisha ŵatite, "Kusyene, mpela yatite kuŵa ŵajumi Ambuje Akunnungu jwali ni machili gose junguntumichila, ikaŵe ngangwachimbichisya ambusanga ŵenu che Yehoshafati mwenye jwa ku Yuda ngangannole namose kunkamuchisya namose kanandi. 15 Nambo sambano munyichisye jwakugomba bango."

Jwakugomba bango paŵachigombaga, machili ga Ambuje Akunnungu gannyichilile che Elisha, 16 ni ŵatite, "Ambuje Akunnungu akuti, ‘Tinjichitenda chiŵata chejumu chi chigumbale isima ya meesi.’ 17 Pakuŵa Ambuje Akunnungu akuti ‘Nganjiona ula jilinkunya pane mbungo, nambo meesi tigagumbale mu chiŵata mose, ni ŵanyamwe tinching'wa pamo ni ng'ombe syenu ni ilangwa yenu.’" 18 Che Elisha ŵajendelechele kuŵecheta, "Chindu chi ngachikulema kwa Ambuje Akunnungu kuchitenda, sooni tachintenda mwapunde Ŵamoabu. 19 Tinchisumula kila musi wauli ni likome ni kila musi wekulungwa. Chinkatanye itela yao yambone, chinchisiŵila iliŵa yao yose ni migunda jao jajili ni chajila chinchijijonaga kwa kugagumbasya maganga."

20 Malaŵi jakwe kundaŵi, katema ka kutyosya mbopesi, ŵagaweni meesi gali nkwilima kutyochela upande wa ku Edomu, ni chiŵata chose chaliji chigumbele meesi.

21 Nipele Ŵamoabu wose ŵaliji apikene kuti aŵala mamwenye ŵatatu aikangene kukuputana nao, kwayele ŵandu wose ŵaali ni ukombole ŵakukamula yakumenyanilana kutandilila jwanchanda mpaka jwanchekulu ŵaŵilanjikwe ni ŵaŵichikwe mu mpika. 22 Paŵajimwiche kundaŵi ŵaliweni lyuŵa lili nkumelemenda pachanya meesi. Ŵamoabu ŵaŵaliji upaande ŵaaŵili, ŵagaweni meesi gali gamachejeu mpela miasi. 23 Ni ŵatite, "Ajila jili miasi! Kusyene mamwenye ŵatatu wo aputene achinyenepe ni kuulagana! Twende tukajigale indu yao!"

24 Nambo paŵaiche ku chigono cha Ŵaisilaeli, Ŵaisilaeli ŵajimwiche ni kwagungumuchila mpaka Ŵamoabu ŵautwiche. Nombe Ŵaisilaeli ŵachigungumuchile chilambo cha Ŵamoabu ni kwaulaga. 25 Ŵajigumulenye misi jao, kila mundu ŵaponyele maganga pa ngunda wauli ni chajila mpaka wagumbele maganga. Iyoyo ŵasiŵile iliŵa yose ni kukatanya kila chitela chachili chambone. Musi wa Kili Haleseti jikape ni uwasigalile uli ni mapupa gakwe ga maganga, nambo namose yeleyo ŵandu ŵaali ni manati ŵausyungwile ni kuuputa.

26 Mwenye jwa ku Moabu paŵaiweni kuti ngondo jikakawene kukwakwe, ŵaajigele ŵandu mia saba ŵaakumenyana ni mapanga achisakaga kuputa malo jiŵalindililaga mwenye jwa ku Edomu kuti apelete nambo ŵalepele. 27 Pelepo ŵanjigele jwakwitiwo jwakwe jwannume jwati chawe mwenye pamalo pakwe, ŵantyosisye mbopesi ja kutinisya pachanya lipupa lya musi. Ŵaisilaeli paŵaiweni yeleyo, lyaakamwile lipamba lyekulungwa. Ŵaulesile musi ula ni kuuja ku chilambo chao.