1 Pa chaka chaaŵili cha utawala wa che Yehoashi mwana jwa che Yehoahasi mwenye jwa ku Isilaeli, che Amasia mwana jwa che Yoashi mwenye jwa ku Yuda nombe ŵatandite kutawala. 2 Paŵatandite kutawala ŵaliji ni yaka ishilini na tano, nombejo jwatawele ku Yuda kwa yaka ishilini na tisa achitamaga ku Yelusalemu. Achikulugwe ŵaliji che Yehoadani jwa ku Yelusalemu. 3 Che Amasia ŵatesile yaikwanonyelesya Ambuje Akunnungu, nganaŵa mpela ambujegwe che Daudi. Jwele jwatesile indu yose mpela che Yoashi atatigwe. 4 Namose yeleyo che Amasia nganapajonanga malo syati ŵandu ŵapopelaga kumatumbi ni ŵandu ŵajendelechele kutyosya mbopesi jakutinisya ni kutinisya ubani ku malo syo.

5 Mwenye che Amasia paŵalilimbisye mu umwenye wakwe, ŵaauleje aŵala ŵakamusi ŵaŵammuleje mwenye che Yoashi atatigwe. 6 Nambo nganiŵaulaga ŵanache ŵa ŵandu wo, mpela yaitite pakulembekwa mu chitabu cha Malajisyo ga che Musa, Ambuje Akunnungu paŵalamwile achitiji, "Achinangolo ngaaulajikwa kwa ligongo lya maleŵa ga ŵanache ŵao, nombe ŵanache ngaaulajikwa kwa ligongo lya maleŵa ga achinangolo ŵao, nambo kila mundu taulajikwe kwa sambi syakwe nsyene."

7 Che Amasia ŵauleje ŵandu ŵa ku Edomu elufu kumi ku Lichemba lya Njete, ŵausumwile musi wa ku Sela ni kuuŵilanga Yokiteeli, ni musi wo ukuŵilanjikwa Yokiteeli mpaka lelo jino.

8 Nipele che Amasia ŵaatumile ŵantenga ku che Yehoashi mwana jwa che Yehoahasi, juŵaliji chisukulu chi che Yehu mwenye jwa ku Isilaeli ŵa kwachisya aputane. 9 Nambo che Yehoashi mwenye jwa ku Isilaeli ŵampelechele utenga che Amasia mwenye jwa ku Isilaeli wakuti, "Lyuŵa limo chitela cha mbaluti cha ku Lebanoni ŵachisalile chitela cha mwelesi cha ku Lebanoni, ‘Munnombekasye mwali jwenu kwa mwanangu.’ Nambo chinyama cha mwitinji chapitile pelepo ni kuchiliŵataliŵata chitela cha mbaluti cho. 10 Kusyene mmwe mwapundile ŵandu ŵa ku Edomu, sano ligongo chichi nkwete chibuli. Nlilapeje kwa kupunda pa ngondo jo, nambo ntame kumangwenu. Kwa chichi kulisosela limbulunga lichilinjonanje mmwe mwasyene pamo ni ŵandu ŵenu ŵa ku Yuda?"

11 Nambo che Amasia nganaikosya yeleyo. Kwa yele mwenye che Yehoashi jwa ku Isilaeli ŵatyosile kukumenyana ni mwenye che Amasia kwele ku Beti Shemeshi, ku chilambo cha ku Yuda. 12 Ŵandu ŵa ku Yuda ŵalepele pangondo ni kila mundu ŵautuchile kumangwakwe. 13 Che Yehoashi mwenye jwa ku Isilaeli ŵankamwile kwele ku Beti Shemeshi ko mwenye jwa ku Yuda jwakuŵilanjikwa che Amasia mwana jwa che Yohashi mwana jwa che Ahasia. Nipele che Yehoashi ŵapite ku Yelusalemu ni kugumula lipupa lyakwe kutyochela ku Nnango wa Efulaimu mpaka ku Nnango wa Palutumba, malo ja uleu wa mita mia mbili. 14 Ŵajigele sahabu syose ni feza pamo ni indu yose iyaliji pa Nyuumba ja Ambuje Akunnungu ni mbiko ja munyuumba ja chimwenye, nombe ŵaakamwile ŵandu ni kuuja ku Samalia. 15 Indu ine iyatendekwe pa katema ka utawala wa che Yehoashi ni indu iŵaitesile ni indu iyaajendele chenene, pamo ni ngondo jiŵaputene ni che Amasia mwenye jwa ku Yuda, yose ilembekwe mu chitabu cha chikumbuchisyo cha mamwenye ŵa ku Isilaeli. 16 Che Yehoashi ŵawile ni kunsika mmalembe ga chimwenye ga achambujegwe gagali ku Samalia. Che Yeloboamu mwana ju che Yehoashi ŵatawele pamalo pakwe.

17 Che Amasia mwana jwa Yoashi mwenye jwa ku Yuda, ŵatemi yaka kumi na tano pakumala kuwa kwa che Yehoashi mwana jwa Yehoahasi mwenye jwa ku Isilaeli. 18 Indu ine iyatendekwe pa katema ka utawala wa che Amasia ilembekwe mu chitabu cha chikumbuchisyo cha Mamwenye wa ku Yuda.

19 Ŵandu ŵampepe ŵatesile malindi ga kwaulaga che Amasia kwele Yelusalemu ko, nombejo ŵautuchile ku Lakishi, nambo ŵammagongo ŵaatumile ŵandu ŵammuleje kukoko. 20 Chiilu chakwe ŵachijigalile pa falasi ni kuchijausya ku Yelusalemu, ni ŵansichile ku malembe ga chimwenye ga achambujegwe ku musi wa che Daudi. 21 Nipele ŵandu wose ŵa ku Yuda ŵanjigele che Asalia ali ni yaka kumi na sita, ŵantesile mwenye pamalo pa che Amasia atatigwe. 22 Che Asalia ŵautaŵile sooni musi wa Elati ni kuusya kwa ŵandu ŵa ku Yuda katema atatigwe ali amasile kuwa.

23 Pa chaka cha kumi na tano cha utawala wa che Amasia mwana jwa che Yoashi mwenye jwa ku Yuda, che Yeloboamu mwana jwa che Yehoashi mwenye jwa ku Isilaeli ŵatandite kutawala ku Isilaeli kwa yaka alobaini na moja achitamaga ku Samalia. 24 Ŵatesile indi yachigongomalo paujo pa Ambuje Akunnungu ni kwasyasya che Yeloboamu mwana jwa che Nebati juŵaleŵekasisye ŵandu ŵa ku Isilaeli alyungasiche. 25 Ŵachiusisye chilambo chose chichaliji cha Ŵaisilaeli, kutandilila ku Lebo Hamati mpaka ku Bahali ja Alaba. Yeleyo ni iŵatite kusala Ambuje Akunnungu kwa litala lya jwakutumichila jwakwe che Yona mwana jwa che Amitai, jwakulondola kutyochela ku Gati Hefeli. 26 Ambuje Akunnungu ŵagaweni masausyo gamakulungwa gaŵapatile ŵandu ŵa ku Isilaeli, aŵeje kapolo pane mundu jwanganaŵa kapolo, ŵanawose ŵalasile. Nganapagwa mundu jwalijose jwa kwakamusya. 27 Nambo Ambuje Akunnungu nganasala yakuti chiŵaajonanje ŵandu ŵa ku Isilaeli, kwayele ŵaakulupwisye kwa litala lya mwenye che Yeloboamu mwana jwa Yehoashi.

28 Indu ine iyatendekwe pa katema ka utawala wa che Yeloboamu mwana ju che Yoashi ni indu iŵaitesile ni iŵatite kupunda ku ngondo, pamo ni iyatite kujiusya misi ja ku Damesiki ni ku Hamati jijaliji paasi pa umwenye wa ku Yuda, yose ilembekwe mu chitabu cha chikumbuchisyo cha mamwenye ŵa ku Isilaeli. 29 Che Yeloboamu ŵawile ni kusikwa mu malembe ga chimwenye wa Isilaeli. Ni che Sakalia mwanagwe ŵaliji mwenye pamalo pakwe.