1 Che Tatalia achikulugwe che Ahasia napikana pe kuti mwenye che Ahasia ajasiche, ŵatyosile ni kwaulaga ŵanache wose wa mwenye. 2 Pasikati ja ŵandu ŵaŵasachilwe kuulajikwa ŵapali che Yoashi mwanache jwa mwenye che Ahasia, nambo che Yehosheba mwali jwa mwenye che Yeolamu nnumbugwe che Ahasia ŵanjigele kwa chisyepela che Yoashi, ŵansisile pamo ni yaya jwakwe ku chuumba chakwe chakugona. Kwayele che Atalia nganaulajikwa. 3 Che Yoashi ŵasigalile ali asisikwe pamo ni yaya jwakwe mu nyuumba ja Ambuje Akunnungu kwa yaka sita, katema che Atalia paŵatawalaga ku chilambo cha ku Yuda.

4 Nambo pa chaka cha saba, jwambopesi jwankulu che Yehoyada ŵalamwile kuti waiche achakulu ŵa mipingo ja ŵangondo mia moja mia moja pamo ni ŵakwimilila ŵa ŵakulindilila ŵa mwenye ni ŵakwimilila ŵa ŵakulindilila ŵa panyumba ji chimwenye, nombewo ŵaiche pa nyuumba ja Akunnungu, nombejo ŵatesile lilangano nawo ni kwalumbisya mu nyuumba ja Ambuje Akunnungu. Nipele ŵaalosisye che Yoashi mwana jwa mwenye che Ahasia. 5 Nipele ŵaalamwile achitiji, "Chintende nnyi: Mwanya ŵanli pa mipingo jitatu, pachinchiika kukukamula samu jenu ja ulinda pa Lyuŵa lya Kupumulila, mpingo umo chiujilindilile nyuumba ja chimwenye, 6 mpingo wine chiulindilile pa nnango waukuŵilanjikwa Suli ni mpingo wiine chiulindilile pa nnango chapanyuma kwa ŵakulindilila ŵaakujilindilila nyuumba ja Akunnungu kwa samu kuti nyuumba ja Akunnungu jikagumulikwa. 7 Ni wanyamwe wanli mipingo jine jiŵili jatijimalisye samu syawo pa Lyuŵa lya Kupumulila wanyamwe wose chikamule samu mu nyuumba ja Ambuje Akunnungu kunlindilila mwenye che Yoashi. 8 Chimwasyungule mwenye kila mundu ni chakumenyanilana chakwe mmakono. Mundu jwali jose juchalinje kwaŵandichila aulajikwe. Mmeje chiŵandi ni mwenye kila pakwinjila ni kukopoka."

9 Achakulu ŵa mipingo ja ŵangondo mia moja mia moja ŵala ŵatesile ilaila mpela iŵasalilwe ni jwambopesi che Yehoyada. Kila mundu jwaajigele ŵandu ŵakwe wose aŵala ŵaŵaliji amasile samu ni aŵala ŵaŵajinjilaga samu pa Lyuŵa lya Kupumulila, nipele ŵajaulile jwambopesi che Yehoyada. 10 Pelepo jwambopesi che Yehoyada ŵaapele achakulu ŵa ŵangondo mipamba ni yakusiŵila pa chidali iyaliji yao mwenye che Daudi, iyaliji iŵichikwe ku nyuumba ja Ambuje Akunnungu, 11 ŵakulindilila ŵala ŵajimi cha kulujenda kwa nyuumba ja mwenye mpaka cha kumpoto, ni kusyungula chilisa ni nyuumba kuti ŵaasyungule mwenye. Kila mundu ali akamulile yakumenyanilana mmakono mwakwe. 12 Nipele che Yehoyada ŵankopwesye paasa che Yoashi mwana jwa mwenye, ŵammwasisye taji pantwe ni kwapa chitabu cha lilangangano pasikati ja Akunnungu ni mwenye ni ŵanjitilile mauta che Yoashi ni kuntangasya kuti aŵele mwenye. Ŵandu wose ŵakwatile achitiji, "Mwenye akole umi weleu!"

13 Che Atalia paŵapikene masegwe ga ŵakulindilila pamo ni ga ŵandu ŵane, ŵajaulile ŵandu ŵaŵaliji pa nyuumba ja Ambuje Akunnungu. 14 Paŵalingulile ŵammweni mwenye jwasambano ajimi chiŵandi ni chimila pa nnango wa nyuumba ja Ambuje Akunnungu, mpela yaitite chisyoŵelo chao, akuno achakulu ŵa ŵandu ŵa ngondo ni ŵakugomba mapenenga ali pambali pa mwenye. Ŵandu wose ŵasangalalaga ni kugomba mapenenga. Nipele che Atalia ŵapapwile yakuwala yakwe ni kunyanyisya achitiji, "Akuno kung'alawuka! Akuno kuli kung'alawuka!"

15 Jwambopesi che Yehoyada ŵalamwile achakulu ŵa mipingo ja ŵangondo mia moja mia moja achitiji, "Muntyosye che Atalia munyichisye paasa pasikati ja ŵangondo ni mundu jwalijose jutachinkuya mummulaje," Pakuŵa jwambopesi jwatite, "Akaulajikwa mu nyuumba ja Ambuje Akunnungu." 16 Nipele ŵanjigele, ŵanjawisye ku nnango wakwinjilila Falasi ku nyuumba ja chimwenye, ŵammulajile kweleko.

17 Nipele jwambopesi che Yehoyada ŵatesile lilangano pasikati ja Ambuje Akunnungu ni mwenye na ŵandu, kuti taaŵe ŵandu ŵa Ambuje Akunnungu. Sooni ŵatesile lilangano pasikati ja mwenye ni ŵandu. 18 Nipele ŵandu wose ŵapite ku nyuumba ja nnungu Baali ni kujigumula, ŵakasenye chilisa pamo ni inyago yakwe, ŵammuleje che Matani jwambopesi jwa nnungu Baali paujo pa chilisa. Jwambopesi che Yehoyada ŵaaŵisile ŵakulindilila ku nyuumba ja Ambuje Akunnungu. 19 Ŵaajigele achakulu ŵa mipingo ja ŵangondo mia moja mia moja ni ŵakulindilila ŵa mwenye ni ŵakulindilila ŵa nyuumba ja chimwenye pamo ni ŵandu wose ŵaŵakamulene nao. Nombewo ŵampelechesye mwenye kutyochela pa nyuumba ja Ambuje Akunnungu ŵapitile ku nnango wa ŵakulindilila mpaka ku nyuumba ja chimwenye. Pelepo mwenye ŵatemi pa chitengu cha umwenye. 20 Kwayele ŵandu wose pachilambo cho ŵasangalele ni musi wose wa ku Yelusale watulele pakuŵa che Atalia ŵaliji aulajikwe kwa upanga ku nyuumba ja chimwenye.

21 Che Yoashi ŵatandite kutawala ku Yuda ali ni yaka saba.