Compaixão
A compaixão é o coração de Deus em ação. Ele é compassivo e misericordioso, tardio em irar-se e grande em amor. Somos chamados a refletir essa compaixão no mundo.
ज़िहअ बाब आपणैं शोहरू लै झणैल़ू हअ,
तिहअ झणैल़ू आसा बिधाता तिन्नां लै ज़ुंण तेऊओ अदर करा।
पर हे मेरै मालक, तूह आसा हाम्हां लै जश दैणैं आल़अ अर झणैल़ू परमेशर,
तूह निं छ़ेक्कै रोश्श करदअ अर एतो सका हाम्हैं निहंचअ डाही कि तूह झ़ूरा हाम्हां लै खास्सअ।
तेरी झींण आसा मुल्है मेरी ज़िन्दगी का बी पैरी,
मुंह करनी तेरी ई बड़ैई।
बिधाते झींण निं कधि खतम हंदी!
ज़ै सह झणैल़ू निं हंदअ,
तै गऐ तै हाम्हैं कधू खतम हई।
हर धैल़ै दोत्ती सका हाम्हैं बिधातो भरोस्सअ करी,
तेऊओ सत्त आसा महान।
"बिधाता दैनअ तिन्नां लै ज़बाब,
‘इहअ निं हई सकदअ कि माआ आपणैं दुधा झुटदै शोहरू बिस्सरी पाऐ अर
आपणैं ओदरा का हुऐ दै शोहरू लै झींण निं करे!
माआ ज़ै आपणैं शोहरू बिस्सरी बी पाए,
पर हुंह निं तम्हां कधि बिस्सरदअ आथी।
एरुशलेम, हुंह निं ताह कधि बिस्सरदअ!
मंऐं आसा तेरअ नाअं आपणैं हाथे नथअई दी डाहअ द लिखी।
तैबी रहा बिधाता न्हैल़अ लागी कि तम्हां लै तेऊओ जश होए। सह च़ाहा तम्हां लै झींण करनी, सह करा भलअ ई। सह हआ तिन्नां लै खुश ज़ुंण बिधाता दी भरोस्सअ डाहा।
म्हारै परमेशर, ताह ज़िहअ निं कोह आथी! तंऐं छ़ांटै हाम्हैं कि हाम्हैं तेरी खास परज़ा होए। तंऐं किऐ म्हारै पाप-दोश माफ। तूह निं सदा लै रोश्श करदअ। तूह हआ झींण करना लै खुश।
बिधाता बोला इहअ,
"मुंह बणाणैं यहूदे आद-लुआद बलबान,
मुंह बच़ाऊंणै युसुफे आद-लुआद,
मुंह करनी तिन्नां लै झींण अर तिंयां आणनैं मुंह घअरा लै बापस।
तेखअ रहणैं तिंयां इहै ज़िहै कि मंऐं निं तिंयां कधि डाहै शोटी।
हुंह आसा तिन्नों परमेशर बिधाता अर
तिन्नें अरज़ हेरनी मुंह शूणीं।
स्वर्गे सारी सैने मालक बिधाता बोलअ इहअ, "हर मणछ करै आपणैं भाई-बंधो शुचै-पाक्कै रही नसाफ, अर तेऊ संघै करै झींण अर झ़ूरी डाही बभार। बिधबा, छ़ुटै-मुक्कै दै, परदेसी अर गरीब मणछा लै निं ज़ुल्म करी। तम्हां मांझ़ै निं कोही आपणैं भाई-बंधा धख बी बूरअ लोल़ी सोठअ।"
तै आसा परमेशरै तम्हैं आपणैं पबित्र लोग हणां लै छ़ांटै दै अर सह करा तम्हां लै झ़ूरी, बडी झींण, भलाई, शरीफ, मानदार, झ़ूरी अर सबर करनै आल़ै।
एकी-दुजै लै हआ झणैल़ू अर झ़ूरनै आल़ै। ज़िहअ परमेशरै मसीहा ईशू दी थारै ज़ुल्म माफ किऐ, तिहै ई करा तम्हैं एकी-दुजै माफ।
खिरी बोला हुंह तम्हां सोभी लै इहअ कि तम्हैं सोभै रहा आप्पू मांझ़ै एक मन्न हई। एकी-दुजैओ डाहणअ धैन-खैल। एकी-दुजै संघै करा भाई अर बैहणी समझ़ी झ़ूरी, होरी लै हणअ झणैल़ू अर घमंड निं कधि करनअ।
पर ज़ै कहा का संसारे ज़ैदात होए अर आपणैं भाई नांगअ भुखअ भाल़ी तेऊ लै झींण नांईं करे, तेऊ दी किहअ करै सका परमेशरे झ़ूरी बस्सी।
म्हारै परमेशरो अर प्रभू ईशू मसीहे बाबो शूकर, ज़ुंण हाम्हां लै झींण करनै आल़अ अर सोभी रंगे शांती दैणैं आल़अ परमेशर आसा। सह दैआ म्हारी सोभी खरी दी हाम्हां लै शांती ताकि हाम्हैं बी तिहै ई होरी लै शांती दैई सके। ज़ेभै तिंयां खरी दी होए पल़ै दै तेभै लोल़ी हाम्हैं बी तिन्नां लै शांती दैणैं आल़ै हुऐ ज़ेही परमेशर हाम्हां लै शांती दैआ।
किल्हैकि म्हारअ माहा प्रोहत ईशू मसीहा रहा म्हारै दाह-दुखा दी हाम्हां संघै, सह परखअ सोभी गल्ला लै हाम्हां ज़िहअ, पर तैबी निं तेऊ दी एक पाप बी निखल़अ।
नंद करनै आल़ै संघै करा नंद अर लेरनै आल़ै संघै लाआ लेरा।
ऐबै ए मेरै भाईओ, नंद रहा, अर सिध्द रहा हंदै लागी, एकी-दुजै लै दैआ हैअ अर आप्पू मांझ़ै डाहा एक मन्न अर मेल़-ज़ोल़। झ़ूरी अर शांती दैणैं आल़अ परमेशर हणअ तम्हां संघै।