1 ✝ज़धू जोशियो शोहरू जेहोकीम यहूदा मुल्खो राज़अ थिअ, तेऊए राज़ा दी च़ौथी साला मुक्‍कअ त नेरीओ शोहरू बारूक बिधाते इना गल्‍ला जंतरी दी लिखी डाही। मंऐं बिधाते गूर जेरमयाह बोलअ तेऊ लै इहअ, 2 "इज़राईलो परमेशर बिधाता बोला ताल्है इहअ, ‘बारूक, 3 तूह बोला इहअ, "मुखा छ़ुटी छ़ाड़! बिधाता पाई मुल्है दुख अर आफ़त। हुंह थक्‍कअ दाह ज़िरी-ज़िरी, मुंह निस्सअ केही राम हई।"

4 "‘पर ज़ुंण मंऐं बिधाता च़िणअ, सह लाअ मंऐं आप्पै ढोल़ी, अर ज़ुंण मंऐं रोही डाहअ सह लाअ मंऐं आप्पै गोधी का पेच़ी। 5 तूह कै आप्पू लै बडी खास गल्‍ला लोल़अ आसा लागअ द? तेता लोल़अ निं तूह लागै नां हैअ चोल़ी। मुंह पाणीं तिन्‍नां सोभी मणछा लै घोर आफ़त, पर तूह ज़िधी बी होए, तूह डाहणअ मुंह तिधी ज़िऊंदअ बच़ाऊई। अह गल्‍ल डाही मंऐं बिधाता बोली।’"