1 बिधाता बोलअ इहअ,

"यहूदा मुल्खे मणछो, थारै पाप डाहै हीरे दाणैं लाऐ दै लोहे कलमा करै शिला दी खेल़ी करै लिखी,

तिंयां डाहै थारै दिलै अर थारी बेदीए शींगा दी

हीरे छ़िणीं करै खेल़ी।

2 थारी आद-लुआदै बी किऐ तिन्‍नां बेदी दी होरी देअआ लै बल़ीदान,

तिन्‍नैं पूज़ै तिंयां काठै डौंड ज़ुंण अशेरा देबीए नाओंऐं आसा बणाऐं दै।

तिंयां रहै हरै डाल़ा-बूटा अर उछ़टी धारा पाखलै देअआ पूज़दै लागी।

3 मुंह दैणअ आपणीं पबित्र सियोन धार बाबेल देशा लै।

थारै दुशमणा निंणीं थारी ज़ैदात अर धन-माया आप्पू संघै।

थारी पूज़ा-गाज़ा करने उछ़टी ज़ैगा बी दैणीं मुंह छ़ाडी।

ईंयां गल्‍ला हणीं थारै पापा पिछ़ू ज़ुंण तम्हैं सारै देशै किऐ।

4 ज़ुंण ज़ैगा मंऐं तम्हां लै दैनी, सह पल़णीं तम्हां छ़ाडणीं,

अर सह हणअ थारअ आपणअ कशूर अर तम्हैं बणाणैं मुंह थारै दुशमणे गलाम।

तम्हैं डेऊणैं एही ज़ैगा तिन्‍नें बेठी खटदै ज़ुंण तम्हैं पैहलै ज़ाणीं नां भाल़ी आथी।

किल्हैकि तम्हैं ठैऊऐ मुल्है आगी ज़िहै रोश्श अर अह आग निं ऐबै हिठदी।"

5 बिधाता बोला इहअ,

"ज़ुंण मुंह छ़ाडी मणछे आसरै रहा, तिन्‍नां लागणअ मेरअ फिटक।

तिंयां आसा मणछे ज़ोरे भरोस्सै अर

तिन्‍नों दिल आसा मुखा कबाता पेठअ द।

6 सह मणछ आसा उज़र रेगीस्तानै मछैंऐं दै बूटा ज़िहअ,

अर सह आसा एही खारी ज़ैगा लागअ द ज़ेथ किछ़ निं पज़दअ।

तेऊ मणछा लै निं किछ़ै भलअ हणअ।

7 पर तिन्‍नां मणछा लै दैणीं मुंह बर्गत ज़ुंण मेरै आसरै रहा।

मुंह दी भरोस्सै डाहणैं आल़ै मणछा लै दैणीं मुंह सोभ भली गल्‍ला।

8 सह मणछ आसा इहै बूटा ज़िहअ ज़ुंण गाडे बाढै आसा लागअ द,

तेऊ बूटे ज़लैल़ै हआ गाडा पाणीं जैंदरी पुजै दै।

तेऊ निं शुक्‍कै अर गरमींए धैल़ै फिकर हंदअ अर

सह रहअ सदा हरअ ई हरअ।

तेऊ निं तेभै बी किछ़ फिकर हंदअ ज़ेभै सरग निं हुअ,

तेथ लागा तेभै बी राम्बल़ै फल़।✝

9 मणछे मन्‍न आसा सोभी च़िज़ा का खास्सअ छ़ल़-कपट करनै आल़अ।

तेथ आसा एही बमारी ज़ुंण बिज़री निं सकदी।

तेता निं कोहै समझ़ी सकदअ!

10 मणछे मना परखा हुंह बिधाता, तेथ लोल़ा हुंह।

हुंह दैआ मणछा लै तेऊ साबै फल ज़ेऊ साबै तिन्‍नैं आपणीं ज़िन्दगी ज़िऊई।

हुंह दैआ तिन्‍नां लै तेही बर्गत ज़िहै तिन्‍नैं कर्म किऐ।"✝

11 ज़ुंण ठगी करै धन-माया झाल़ी सेठ हआ,

सह आसा एही तित्तरी ज़िहअ ज़ुंण होरी च़ेल्‍लूए आंडै जाऊंदी रहा बेशी।

तिन्‍नें आधी अमरा जाआ तिन्‍नें धन-माया खतम हई।

खिरी निं तिंयां ऐडै का सुआई किछ़ हंदै।

12 म्हारअ भबन आसा सह ज़ेथ बिधाते महान राज़गाद्दी आसा।

अह आसा पैहलै ओर्ही बडअ महान अर प्रतप्पी।

13 बिधाता, इज़राईले आशा अर आथरी आसा तूह ई,

ज़ुंणीं तूह छ़ाडअ, तिन्‍नां पल़णअ शर्मिंदै हणअ।

तिंयां ढुशणै माट्टै दी लिखै दै नाओंआं ज़िहै पोर्ही, किल्हैकि

तिन्‍नैं छ़ाडअ तूह बिधाता ज़ुंण ज़िऊंदै डाहणैं आल़ी पाणींए सोबल़ आसा।

14 बिधाता, तूह कर मुंह नरोगै, तै जाणअ पठी बिज़री, तूह बच़ाऊ मुंह तै जाणअ हुंह बच़ी। सह आसा तूह ज़सरी हुंह स्तोती करा।

15 लोगा बोल़णअ मुल्है इहअ, "तिन्‍नां चतैनगीए समादो किज़ै हुअ ज़ुंण बिधाता हाम्हां लै दैनै तै? तै लोल़ी हाम्हां तिंयां गल्‍ला एभी ज़ेही बोली निभी!"

16 पर बिधाता, मंऐं निं तेरी परज़े हेर-सभाल़ करनी छ़ाडी, नां मंऐं एही अरज़ किई आथी कि तिन्‍नां लै लोल़ी आफ़त पल़ी, मंऐं निं तिन्‍नां लै इहअ सोठअ कि तिंयां लोल़ी बरैबाद हुऐ। बिधाता, ताखा आसा सोभी गल्‍लो थोघ, तूह ज़ाणा आप्पै कि मंऐं किज़ै बोलअ। 17 तूह निं मुल्है डरैअ पाई, खरीए पलका आसा मेरी शरण लणें ज़ैगा तूह ई। 18 तिंयां लोल़ी शर्मिंदै हुऐ ज़ुंण मेरै पिछ़ै आसा पल़ै दै, बिधाता, पर मुंह डाहै तूह बच़ाऊई। तिंयां डरै झ़ील़ै-काम्बै पर मुल्है निं तूह डरैअ पाई। तिन्‍नां लै पाऐ तूह एही आफ़त कि तिन्‍नें लोल़ी ठोर-ठोर हुऐ।

19 बिधाता बोलअ मुल्है इहअ, "जेरमयाह, डेऊ संघा खोज़ एरुशलेम नगरीए तैहा प्रऊल़ी सेटा खल़्हुई सोभी लोगा का मेरअ समाद ज़ेसी बाती यहूदा मुल्खे राज़ै अर नगरी बस्सै दै लोग बागै-भितरी डेओआ। 20 राज़ै अर सोभी यहूदी अर एरुशलेम नगरी बस्सै दै सोभ लोग ज़ुंण तैहा प्रऊल़ी बाती नगरी भितरा लै डेओआ, तिन्‍नां लै बोल कि बिधातो समाद शूणां। 21 ✝तिन्‍नां का खोज़ इहअ कि बिधाता बोला इहअ, ‘बशैघे धैल़ी निं तम्हैं बोझ़ै बगार च़कदै लागी, एरुशलेम नगरीए कोही प्रऊल़ी बाती निं किछ़ भितरा लै आणी,✝ 22 नां बशैघे धैल़ी आपणैं घअरा का किज़ै बागा लै निंईं। बशैघे धैल़ी निं किछ़ काम करी, तैहा धैल़ी मनै पबित्र ज़िहअ मंऐं थारै दादा-बाबा लै हुकम आसा किअ द।✝ 23 थारै दादै-बाबै निं मेरअ शूणअ नां मेरी गल्‍ला दी धैन दैनअ। तिंयां थिऐ हठू, हुंह रहअ तिन्‍नां नैरदअ पर तिन्‍नैं निं मुखा किछ़ शिखल़अ अर नां ज़िहअ मंऐं बोलअ तिहअ किअ।’

24 "जेरमयाह, इना लोगा लै बोल कि हुंह बोला इहअ, ‘ज़िहअ हुंह बोला तिहै मनै मेरै सोभ हुकम, तम्हैं निं बशैघे धैल़ी नगरीए प्रऊल़ी बागै-भितरी किछ़ बोझ़अ बगार आणदै निंदै लागी। बशैघे धैल़ी मनै पबित्र अर तैहा धैल़ी निं होर किछ़ काम करी।’ 25 तै रहणैं तिंयां राज़ै अर कार-करिंदै रथा-घोल़ै दी बेशी ऐहा नगरीए प्रऊल़ी भितरी एछदै लागी ज़ुंण राज़ै दाबेदे राज़गाद्दी दी आसा बेठै दै। तिन्‍नां संघै यहूदा मुल्ख अर राज़धानी एरुशलेम नगरीए लोग बी रहणैं तिहै ई एछदै लागी अर तै रहणीं अह नगरी सदा बस्सी। 26 यहूदा मुल्खे नगरी-नगरी अर राज़धानी एरुशलेम ओरी पोरी बस्सै दै गराऊंआं का एछणैं लोग। होर एछणैं बिन्यामीन मुल्खै, पछ़मा बाखा धारा अर दखण रेगीस्ताना बाखा। तिन्‍नां सोभी आणनीं मेरै भबना लै भैंट अर हूम अर मेल़-ज़ोल़े बल़ीदान अर नाज़ बल़ीदान, धूप अर मेरअ शूकर करना लै बल़ीदान।

27 "पर ज़ै तम्हैं ज़िहअ मंऐं हुकम किअ तिहअ नांईं मने, ज़ै तम्हैं बशैघे धैल़ी पबित्र नांईं मने, ज़ै तैहा धैल़ी तम्हैं एरुशलेम नगरीए प्रऊल़ी बागा-भितरा लै बोझ़अ बगार आणदै निंदै रहे, तै शाचणी एरुशलेम नगरी हर ज़ैगा एही आग ज़ेता कुंण शेऊई निं सकदअ। तेता करै हणैं बडै-बडै मैहलै बी दझ़ी खतम।"