जेरमयाह 39

राज़धानी एरुशलेम हुई बरैबाद

1 ज़धू सिदकिया यहूदा मुल्खै राज़अ थिअ, तेऊए राज़ा दी नहुई साला पोशै आअ बाबेल देशो राज़अ नबूकदनेसर आपणीं सारी सैना लई संघा छ़ेल़अ राज़धानी एरुशलेम जुध। 2 सिदकिया राज़ेए राज़ा दी गैर्हूई साला नौआ शाल़्है पाई राज़धानी एरुशलेम नगरी फेर गहल़े दुआल ढोल़ी। 3 ज़ांऊं राज़धानी एरुशलेम बाबेल देशे सैना कबज़अ करी हेरअ, बाबेल देशे कार-करिंदै अर अफसर आऐ सोभ संघा बेठै मांझ़ली प्रऊल़ीए ज़ैगा। शमगारो नर्गल़-सरेसर थिअ तिधी, नेबो बज़ीर सर्सकीम बी त तिधी। सोभी का बडअ बज़ीर नर्गल़-सरेसर अर बाबेल देशे होर कार करिंदै बी थिऐ तिधी।

4 यहूदे राज़ै सिदकिया अर तेऊए सोभी शूरबीरै हेरै तिंयां तिधी भाल़ी। तिंयां ठुर्है राचो-राच। तिंयां ठुर्है राज़ेए बागा बातीए बाता संघा निखल़ै दूई दुआली मांझ़ली प्रऊल़ी बाती नगरी बागै। तिंयां ठुर्है जरदण खागा बाखा अराबा डेऊणे बाता।

5 पर बाबेल देशे सैना किअ तिन्‍नों पिछ़अ। तिन्‍नैं हेरअ राज़अ सिदकिया अराबा सरलै रेगीस्तानै पुजी जेरिहो नगरी नेल़ ठिमकी संघा ढाकअ सह। तिन्‍नैं पजैल़अ सह बान्हीं हमात मुल्खै रिबला नगरी बाबेल देशे राज़ै नबूकदनेसरा सेटा। तिधी दैनअ नबूकदनेसरै हुकम कि राज़ै सिदकिया लै केही सज़ा दैणीं। 6 सिदकिया राज़ेए सोभ शोहरू बझ़ैल़ै रिबला नगरी मारनै कि सह आपणीं आछी भाल़े। यहूदा मुल्खे सोभ कार-करिंदै बी बझ़ैल़ै तेऊ तिधी मारी। 7 तेखअ काढै तेऊ राज़ै सिदकिये आछिए छैरै पोर्ही संघा निंयं पितल़े शांघल़ी करै बान्हीं बाबेल देशा लै।

8 पिछ़ू चैल़ी बाबेल देशे सैना राज़धानी एरुशलेम राज़ेए मैहलै अर सारी नगरी सोभी लोगे घअरै आग अर नगरी फेर-फिरदै गहल़े दुआली पाई ढोल़ी। 9 नबूज़रदान थिअ राज़ेए फाज़त करनै आल़ै सपाही प्रैंदै दलपति। अज़ी बी थिऐ कई लोग नगरी दी बच़ै दै। ज़ेतरै तेऊ सेटा लै यहूदा मुल्खे राज़ै छ़ाडी पैहलै ई तै ठुर्ही आऐ दै, अर ज़ुंण नगरी बाकी थिऐ बच़ै दै, तेऊ निंयैं तिंयां सोभ कैद करी बाबेल देशा लै। 10 यहूदा मुल्खै डाहै नबूज़रदानै थोल़ै ई लोग ज़ुंण बाख गरीब थिऐ अर ज़हा का ज़िम्मीं-ज़ैगा किछ़ निं आथी ती, तेऊ दैनै तिन्‍नां लै खेच अर दाखे बाग।

जेरमयाह किअ आज़ाद

11 बाबेल देशे राज़ै नबूकदनेसरै किअ आपणीं फाज़त करनै आल़ै सपाहीए दलपति नबूज़रदाना लै मेरै बारै इहअ हुकम, 12 "तूह डेऊ संघा लोल़ कि जेरमयाह किधी आसा, तेऊए करै राम्बल़ै करै हेर-सभाल़। तेऊ लै निं धख बी हान्‍नी करदै लागी। तेऊ लै करै ज़िहअ सह बोले तिहअ।" 13 नबूज़रदान आअ अर तेऊ संघै आअ बडअ बज़ीर नबूज़बान, नर्गल़-सरेसर अर बाबेल देशे होर कार-करिंदै। 14 तिन्‍नैं निंयं हुंह पहरीए खोल़ै कैद खानै का पोर्ही। तेखअ सभाल़अ हुंह तिन्‍नैं आहीकामे शोहरू शापाने पोचै गदाली का। तिन्‍नैं बोलअ गदाली लै कि जेरमयाह दै एऊए घअरै पजैल़ी। तेखअ लागअ हुंह आपणैं लोगा जैंदरी रहंदअ।

एबेद-मोलका लै आशा

15 ज़धू हुंह राज़ेए मैहलै पहरीए खोल़ै कैद थिअ किअ द, तधू बोलअ बिधाता मुल्है इहअ, "जेरमयाह, 16 तूह डेऊ संघा बोल कूश देशे एबेद-मोलका लै इहअ कि स्वर्गे सारी सैनो मालक बिधाता, इज़राईलो परमेशर बोला इहअ, ‘ज़ुंण मंऐं ऐहा नगरीओ बनाश हणअ बोलअ थिअ, तिंयां गल्‍ला च़ाल्‍ली ऐबै तेही ई निभी। मंऐं बोलअ त कि मुंह पाणीं ऐहा नगरी लै घोर आफ़त अर बरैबादी। ताह भाल़णीं ईंयां गल्‍ला पूरी हंदी आपणीं आछी। 17 पर मुंह बिधाता डाहणअ तूह बच़ाऊई अर तूह निं तिन्‍नें लोगे हाथै पल़णअ ज़हा का तूह डरा। 18 तूह डाहणअ मुंह ज़िऊंदअ, ताह निं हुंह एऊ जुधा दी तलबारा करै मरनै दैंदअ। तेरी ज़िन्दगी जाणी बच़ी किल्हैकि तूह आसा मेरै आसरै रहअ द। अह गल्‍ल डाही मंऐं बिधाता बोली।’"