जेरमयाह 42

लोग लागै जेरमयाह सेटा अरज़ करदै

1 तेखअ आऐ सैने सोभ प्रधान अर सैणैं मुंह सेटा लै, तिंयां थिऐ कोराहे शोहरू जोहनान अर अजर्याह, होशायो शोहरू जजानी अर आम लोगा उझै खास मणछा तैणीं सोभ। तिंयां लागै मुंह सेटा एही अरज़ करदै, 2 "जेरमयाह, तूह आसा बिधातो गूर, ज़ीबाण, तूह कर ज़िहअ हाम्हैं बोला तिहअ! तूह कर म्हारै परमेशर बिधाता सेटा हाम्हां लै अरज़ ज़ुंण हाम्हैं बच़ै दै आसा। तूह आसा आपणीं आछी भाल़अ लागअ द कि हाम्हैं तै खास्सै अर ऐबै रहै हाम्हैं धख ज़िहै। 3 तूह पुछ़ म्हारै परमेशर बिधाता कि सह हाम्हां का खोज़े कि केस्सी डेऊणअ अर किज़ै करनअ?"

4 मंऐं बिधाते गूर जेरमयाह बोलअ, "मंऐं हेरअ शूणीं, तै करूं हुंह थारै परमेशर बिधाता सेटा ज़िहअ तम्हैं बोलअ तेही ई अरज़। तेखअ ज़िहअ बी बिधाता बोले, तेता खोज़ूं हुंह तम्हां का। मुंह निं तम्हां का धख ज़ेही गल्‍लो छ़पाअ डाहणअ।"

5 तेखअ लागै तिंयां मुल्है इहअ बोल्दै, "जेरमयाह, हाम्हां करनअ ज़ाथी तिहअ ई ज़िहअ ताखा तेरअ बिधाता खोज़े कि इहअ करा। ज़ै हाम्हैं तिहअ नांईं करे, तै लोल़ी बिधाता ई म्हारअ भरोस्सैमंद अर शुचअ शाजत निखल़अ। 6 तिन्‍नां गल्‍ला करै च़ाऐ हाम्हैं खुश होए च़ाऐ नां होए, हाम्हां मनणी तिंयां तेही ई ज़िहअ म्हारअ परमेशर बिधाता बोले, ज़हा का हाम्हैं ताल्है पुछ़णा लै बोलअ। हाम्हां लै जाणीं सोभ गल्‍ला भली हई ज़ै हाम्हैं तेऊओ हुकम मने।"

7 इना गल्‍ले दसा धैल़ी बाद दैनअ बिधाता मुंह जेरमयाह लै समाद। 8 तेखअ शादै मंऐं कोराहो शोहरू जोहनान, सैने सोभ प्रधान अर सैनापति अर आम मणछा पोर्ही खास तैणीं सोभ। 9 संघा खोज़अ मंऐं तिन्‍नां का, "हाम्हां इज़राईलीओ परमेशर बिधाता ज़हा सेटा तम्हैं हुंह पुछ़दअ छ़ाडअ, सह बोला इहअ, 10 ‘ज़ै तम्हैं ऐहा ई ज़ैगा बस्सी रहे, तै बढेरनै मुंह तम्हैं उझै, हुंह निं तम्हां उंधै हणैं दैंदअ। तम्हैं डाहणैं मुंह रोही अर हुंह निं तम्हां गोधी का पोर्ही पेच़दअ आथी। ज़ुंण मंऐं तम्हां लै आफ़त पाई, तेते च़ेती मंऐं खास्सी माल़ी अर ऐबै निं मुंह आजू थारी हान्‍नी करनी। 11 ऐबै निं तम्हैं बाबेल देशे राज़ै का डरदै लागा। हुंह आसा तम्हां संघै अर मुंह हेरनै तम्हैं आपणैं ज़ोरै बच़ाऊई। 12 हुंह आसा आप्पू खास्सअ झणैल़ू, मुंह करनअ इहअ कि सह बी तम्हां लै झींण करे अर तम्हां थारै देशै घअरा लै बापस फिरनैं दैए अह गल्‍ल डाही मंऐं बिधाता बोली।’

13-15 "पर ज़ुंण तम्हैं यहूदा मुल्खै बच़ै दै आसा, तम्हैं निं हेरे आपणैं परमेशर बिधाते गल्‍ला मनणा लै अर ऐहा ज़ैगा बस्सी रहणा लै हुधूई आथी! तम्हैं निं इहअ बोल्दै लागी, ‘हाम्हां निं एऊ यहूदा मुल्खै रहणअ, हाम्हां डेऊणअ मिसर देशा लै, तेथ निं हाम्हां जुध अर नकाल़ भाल़णअ भेटणअ।’ ज़ै तम्हैं इहअ बोले, तै बोला स्वर्गे सारी सैनो मालक बिधाता, इज़राईलो परमेशर इहअ, ‘ज़ै तम्हैं मिसर देशा लै डेऊणेओ बच़ार करे अर तेथ बस्से, 16 तै पल़णै तम्हां लै तेथ बी जुध, नकाल़ ज़ेता का तम्हैं डरा। तिन्‍नां निं मिसर देशै बी थारअ पिछ़अ छ़ाडणअ अर खिरी मरनै तम्हैं तेथै। 17 ज़ुंण बी मिसर देशा बाखा फिरे अर तिधी बस्सणैओ बच़ार करे, तिंयां मरनै तेथ जुधे तलबार, नकाल़ अर नबिज़री बमारी करै। तिन्‍नां मांझ़ै निं एक बी मणछ ज़िऊंदअ बच़णअ, नां तैहा आफ़ता का बच़णअ ज़ुंण मुंह तिन्‍नां लै पाणीं।’

18 "स्वर्गे सारी सैनो मालक, इज़राईलो परमेशर बिधाता बोला इहअ, ‘ज़िहअ मेरअ रोश्श अर कोप एरुशलेम नगरीए लोगा लै पल़अ, तिहअ ई हणअ तम्हां लै बी ज़ै तम्हैं मिसर देशा लै डेओए। तम्हैं हणैं लोगा लै डरैअ अर ज़हा भाल़ी झशकिआ। लोगा करनअ थारअ सुहांग अर थारै नाओंऐं दैणअ लोगा फिटक। तेखअ निं तम्हां अह थारी ज़ैगा भिई कधि भाल़णीं भेटणीं।’"

19 आजू बोलअ मंऐं जेरमयाह इहअ, "ज़ुंण तम्हैं यहूदा मुल्खै बच़ै दै आसा, बिधाता बोला तम्हां लै इहअ, ‘तम्हैं निं मिसर देशा लै डेऊई।’ ऐहा गल्‍ला समझ़ा तम्हैं पाक्‍की कि मंऐं हेरी आझ़ तम्हां लै चतैनगी दैई कि 20 सह हणीं बेघै बडी गलती। तम्हैं बोलअ मुल्है आप्पै, ‘तूह पुछ़ हाम्हां बाखा म्हारै परमेशर बिधाता, ज़िहअ सह बोले, तेता खोज़ै हाम्हां का अर हाम्हां करनअ तिहअ ई ज़िहअ सह बोले।’ 21 मंऐं खोज़ी आझ़ तम्हां का तिंयां सोभ गल्‍ला ज़ुंण बिधाता च़ाहा कि तम्हैं करे। पर तम्हैं निं तिहअ आथी करदै लागै दै ज़ेता खोज़दअ म्हारै परमेशर बिधाता हुंह तम्हां सेटा लै छ़ाडअ। 22 ऐबै डाहै इना गल्‍ला आद कि तम्हैं मरनै तेऊ मिसर देशै जुधे तलबारा, नकाल़अ अर नबिज़री बमारी करै ज़हा ज़ैगा लै तम्हैं डेऊई आसा च़ाल्‍लै दै।"