जेरमयाह 7

जेरमयाह खोज़अ बिधाते भबनै डेऊई समाद

1 बिधाता दैनअ मुंह जेरमयाह लै इहअ समाद, 2 "मेरै भबने प्रऊल़ी आजू खल़्हुई खोज़ तिधी लोगा का मेरअ समाद। तूह बोलै इहअ, ‘यहूदा मुल्खे लोगो, बिधातो समाद शूणां! तम्हैं सोभ शूणां ज़ुंण इधी बिधाता सेटा माथै टेक्‍कदै आसा आऐ दै। 3 स्वर्गे सारी सैनो मालक बिधाता ज़ुंण इज़राईलो परमेशर आसा, सह बोला इहअ, "ज़ै अज़ी बी तम्हैं आपणैं कदुष्ट काम करनै छ़ाडे, तै दैणअ मुंह तम्हां थारी ऐहा ज़ैगा बस्सणै।"

4 "‘झ़ुठी गल्‍ले आसरै निं रहा। इहअ बोल्दै निं लागा, "अह आसा बिधातो भबन! अह आसा बिधातो भबन, अह आसा बिधातो भबन!" 5 पर मुंह करनी तम्हां लै तै झींण ज़ै तम्हैं बूरी सोठ अर कदुष्ट काम छ़ाडे अर एकी-दुजै लै शुचै-पाक्‍कै रहे, 6 ऐहा ज़ैगा निं परदेसी अर छ़ुटै-मुक्‍कै दै लान्हैं माठै ठगदै लुटदै लागा। नर्दोश मणछे हत्या करने पाआ छ़ाड़। नां ऐहा ज़ैगा होरी देअआ पूज़दै लागा, तेता करै हणैं तम्हैं बरैबाद ई। 7 ज़ै तम्हैं ज़िहअ हुंह बोले तिहअ ई करे, तै दैणअ मुंह तम्हां ऐहा ज़ैगा बस्सणै। अह आसा सह ज़ैगा ज़ुंण मंऐं पैहलकै ज़मानै थारै दादा-बाबा लै दैनी ती। मंऐं त तिन्‍नां लै इहअ बोलअ द कि अह ज़ैगा हणीं सदा थारी।

8 "‘पर भाल़ा! तम्हैं आसा झ़ुठी गल्‍ले आसरै! 9 तम्हैं आसा च़ोर, हत्या करनै आल़ै, कंज़रैई करनै आल़ै। तम्हैं बोलअ सोह खाई झ़ुठअ। तम्हैं ज़ाल़ा बाल देअआ सेटा धूप अर तम्हैं करा तिन्‍नां देअआ-देबीए पूज़ा ज़हा तम्हैं पैहलै ज़ाणदै ई निं आथी तै। 10 तम्हैं करा इना गल्‍ला ज़ेता का हुंह नफरत करा, तेखअ एछा तम्हैं मेरै भबनै मुंह सेटा! संघा फिरा इहअ बोल्दै, "हाम्हैं आसा राज्ज़ी-राम्बल़ै!" 11 तम्हैं मेरअ भबन किज़ै आसा समझ़ी डाहअ द कि सह च़ोरा-डाकू लुक्‍की रहणैंओ डुआर आसा? मंऐं भाल़ै तम्हैं कि तम्हैं किज़ै करा!✝7:11 मोत्त. 21:13; मार्क. 11:17; लूक. 19:46

12 ✝ 7:12 ज़ैह. 18:1; भज. 78:60; जेर. 26:6 "‘ऐबै डेओआ शिलोह नगरी तैहा ज़ैगा लै ज़ुंण ज़ैगा मंऐं पैहली बारी छ़ांटी ती कि तिधी मेरी पूज़ा-गाज़ा होए। तिधी दैआ भाल़णीं कि मंऐं इज़राईलीए पाप करनै पिछ़ू तैहा ज़ैगा लै किज़ै किअ। 13 तम्हैं किऐ ईंयां सोभै पाप, हुंह रहअ तम्हां भिई-भिई नैरदअ लागी पर तम्हैं किई मेरी गल्‍ला शूणीं नां शूणीं। हुंह रहअ तम्हां शाददअ लागी पर तम्हैं निं ज़बाब ई दैनअ। 14 ज़िहअ मंऐं बिधाता शिलोह ज़ैगा लै किअ, ऐबै करनअ मुंह आपणैं एऊ भबना लै बी तिहअ ई ज़ेते आसरै तम्हैं हआ रहै दै। ज़ुंण ज़ैगा मंऐं थारै दाद-बाब अर तम्हां लै आसा दैनी दी, एते दशा बी करनी मुंह शिलोहा ज़ेही। 15 तम्हैं शोटणै मुंह मेरी ज़ैगा का दूर ज़िहै मंऐं थारै भाई-बंध एप्रैमी आप्पू सेटा का दूर किऐ तै। अह गल्‍ल डाही मंऐं बिधाता बोली।’"

ज़िहअ बिधाता हुकम किअ तिहअ निं परज़ा किअ

16 बिधाता बोलअ इहअ, "जेरमयाह, इना लोगा लै निं तूह मुंह सेटा प्राथणां करदअ लागै। इना लोगा बाखा निं तूह मुंह सेटा लेर-पकार पाई नां मुंह सेटा ज़ीबाण इने अरज़ आणी, इने गल्‍ला निं तूह मुंह सेटा करी, मुंह निं इने बारै तेरी गल्‍ला शुणनी। 17 ताखा शुझदअ निं आसा लागअ द कि यहूदा मुल्खे हर नगरी अर राज़धानी एरुशलेम हर गल़ी-गल़ी दी किज़ै आसा हंदअ लागअ द! 18 लान्हैं-सुन्हैं झाल़ा झ़ुका अर बाब ज़ाल़ा घअरै आग अर बेटल़ी हआ पिठै मुछ़दी लागी दी कि तिंयां तैहा देबी लै भोज़न बणांए ज़हा लै तिंयां स्वर्गे राणीं बोला। तिंयां दैआ होरी देअआ-देबीए मुहुर्ती लै दाखो अर्घअ बी, ज़ेता करै मुंह रोश्श उझ़िए!✝7:18 जेर. 44:17-19 19 पर असली दी कै तिंयां मुंह दुखी करदै लागै दै? तिंयां कै मुल्है आसा रोश्श ठैऊंदै लागै दै? तिंयां आसा असली दी आपणीं हान्‍नी करदै लागै दै, तिन्‍नां पल़णअ आप्पू शर्मिंदै हणअ।

20 "तैही बोला हुंह तेरअ मालक बिधाता इहअ, ‘मुंह तरैल़णअ आपणअ भकी दी आगी ज़िहअ रोश्श एऊ भबना प्रैंदै, तेता करै हणैं ऐहा ज़ैगे मणछ, पशू, खेच-खहल़, साल-फसल अर डाल़-बूट पठी खतम। सह आग रहणीं ज़ल़दी लागी अर तेता निं कोहै शेऊई सकदअ।’

21 "स्वर्गे सारी सैनो मालक बिधाता ज़ुंण इज़राईलो परमेशर आसा, सह बोला इहअ, ‘मेरै लोगो, तम्हैं लागा आपणैं पशू काटी मुल्है बेदी दी हूम अर होर बल़ीदान करदै, संघा लागा आप्पू शिखा खांदै! 22 ज़धू मंऐं थारै दाद-बाब मिसर देशा का काढी आणै तै, तधू किई ती मंऐं तिन्‍नां संघै गल्‍ला, मंऐं निं तिन्‍नां लै तधू सिधअ बोलअ त कि तम्हैं रहै मुल्है हूम अर होर बल़ीदान करदै लागी! 23 पर मंऐं किअ त तिन्‍नां लै इहअ हुकम कि तिंयां ज़िहअ हुंह बोले तिहअ ई करे। तै हणअ हुंह थारअ परमेशर अर तै हणीं तम्हैं मेरी परज़ा। तेही ज़िन्दगी ज़िऊआ ज़िहअ हुंह तम्हां लै बोला। तै हणअ थारअ भलअ।’

24 "पर तिन्‍नैं किई मेरी गल्‍ला शूणीं नां शूणीं! तिन्‍नैं निं मेरी गल्‍ला दी धैन ई दैनअ! उंबल़ै रहै तिंयां तिहअ करदै लागी ज़िहअ तिन्‍नें कदुष्ट अर हठू दिलै बोलअ। तिंयां निं आजू हांढै; तिंयां हटै पिछ़ू। 25 ज़हा धैल़ी थारै दाद-बाब मिसर देशा का निखल़ै, तधा ओर्ही आझ़ तैणीं रहअ हुंह आपणैं दास अर गूरा तम्हां सेटा लै छ़ाडदअ लागी, 26 तम्हां मांझ़ै निं ज़ाती कोही बी मेरी गल्‍ला शूणीं नां धैन दैनअ। उंबल़ै हुऐ तम्हैं होर बी हठू अर द्रोही ज़िहै थारै दाद-बाब तै।

27 "जेरमयाह, तूह खोज़ मेरी इना सोभी गल्‍ला भाल़ै तिन्‍नां का पठी, पर तिन्‍नां निं तेरी गल्‍ला शुणनी ई आथी! तूह लाऐ तिन्‍नां लै हाक्‍का बी, पर तिन्‍नां निं भाल़ै होह बी करनअ। 28 तूह लऐ तिन्‍नां लै बोली, ‘तम्हैं आसा सह देश ज़ुंणीं आपणैं परमेशर बिधातो हुकम निं मनअ। ज़ेभै तम्हां नैरदै लागै तेभै निं तम्हैं धैन ई दैनअ। सत्त हुअ पठी खतम! तम्हैं निं आपणीं खाखा का शुची गल्‍ला करदै ई आथी!’

29 "बिधाता बोला एरुशलेम नगरीए परज़ा लै इहअ,

‘एरुशलेम नगरीए लोगो, शोग करा,

आपणैं मुंडे शराल़ तुंबी शोटा पोर्ही।

उझै निखल़ी धारा डेऊई पाआ मखाण,

मुंह आसा तम्हां लै खास्सी रोश्शै आई दी

मंऐं आसा तम्हां बाखा पिठ फरेऊई दी अर मंऐं हेरै तम्हैं छ़ाडी।’✝7:29 आयू. 1:20; मिक. 1:16; बधा. 14:1

हिनोम खागै कदुष्ट काम

30 "यहूदा मुल्खे परज़ा किऐ तिंयां कदुष्ट काम ज़ुंण मुखा बूरै शुझिआ। तिन्‍नैं डाही ऐबै मेरै भबनै आपणैं देअए मुहुर्ती, ज़ेता हुंह नांईं च़ाहंदअ, इहअ करै लाई तिन्‍नैं मेरै भबनै छ़ोत। 31 बेन-हिनोम खागै बणाईं तिन्‍नैं तोपेत नाओंए बेदी कि तिंयां आपणैं शोहरू-शोहरी काटी तेते आगी दी हूम बल़ीदान करे! इहअ करने ज़ाज़त निं मंऐं तिन्‍नां लै आथी दैनी दी! एही गल्‍ल निं हुंह कधू सोठी बी सकदअ।✝7:31 2 राज़. 23:10; जेर. 32:35; लेब. 18:21 32 हुंह बिधाता आसा भाल़अ लागअ द, एक बगत एछणअ इहअ कि एऊ खागा नाअं नां आजू हिनोम रहणअ अर नां तोपेत, एता लै बोल़णअ आजू खुंनी खाग, इने पल़णीं इधी एतरी ल्हासा कि तोपेत निं दाबणा लै ज़ैगा रहणीं अर होर्ती निं ज़ैगा भेटणीं। 33 ज़ुंण ल्हासा दाबणै का एही छ़ुटणीं तिंयां च़ोच़ल़णी च़ेल्‍लू-पखीरू अर बणें ज़ीबा, तिन्‍नां पंछ़ी अर बणें शकारी ज़ीबा दरल़ाऊंणै आल़अ बी निं पिछ़ू कोह बच़णअ। 34 अह सारी ज़ैगा हणीं उज़र रेगीस्तान। यहूदा मुल्खे सोभी नगरी अर राज़धानी एरुशलेम हणीं खुशीए गल्‍ला ई खतम तेखअ निं खुशी अर बैहे गिहा शुण्हनी।"✝7:34 होश. 2:11; जेर. 16:9