जेरमयाह 52

एरुशलेम नगरीए बरैबादी

1 ज़धू सिदकिया यहूदा मुल्खो राज़अ बणअ, सह थिअ तधू इक्‍की सालो। तेऊ किअ एरुशलेम नगरी का गैरा साला तैणीं राज़। तेऊए ईजा नाअं त हेमातल अर सह थिई लिब्ना नगरीए जेरमयाह गूरे शोहरी। 2 राज़ै सिदकिया बी किअ राज़ै जेहोकीमा ज़िहअ ई पाप ज़ेता बिधाता नांईं च़ाहंदअ त कि सह करे। 3 बिधाता आई यहूदा अर एरुशलेम नगरीए परज़ा लै खास्सी रोश्शै अर खिरी दैनअ बिधाता तिन्‍नां आछी सम्हनै पठी बरैबाद हणैं।

सिदकिया किअ बाबेल देशे राज़ै नबूकदनेसरा लै द्रोह, 4 नबूकदनेसर बी आअ आपणीं सैना लई संघा छ़ेल़अ राज़धानी एरुशलेम सिदकिया राज़ेए राज़ा दी नहुई साला दसा पोशै राज़ै सिदकिया संघै जुध। तिन्‍नैं डाहै नगरी बागै डेरै पाई संघा डाहै फेरा-फेर गहल़ै कैद करी।✝52:4 एज. 24:2 5 तिंयां डाहै सिदकिया राज़ेए राज़ा दी गैर्हूई साला तैणीं तिहै ई नगरी भितरी कैद करी।

6 तैहा साला नौआ शाल़्है पुजधी पल़अ नगरी भितरी घोर नकाल़ तेखअ निं लोगा का खाणां-पिणां लै किछ़ बच़अ, 7 तेखअ पाई बाबेल देशे सैना नगरीए गहल़े दुआल ढोल़ी। यहूदे सारी सैना ठुर्ही तिन्‍नां डरै अर तिंयां डेऊऐ राचो-राच नगरी छ़ाडी दूई दुआली मांझ़ली प्रऊल़ी बाती राज़ेए बागा बातीए बाता। नगरी थिई बाबेल देशे सैना फेरा फेर गोटी डाही दी पर तज़ी बी निखल़ै तिंयां बच़ी अराबा खागा बाखा लै।✝52:7 एज. 33:21

8 पर बाबेल देशे सैना किअ सिदकिया राज़ैओ पिछ़अ संघा ढाकअ सह जेरिहो नगरी नेल़ अराबा रेगीस्तानै। सिदकिया राज़ै संघै ज़ेतरै सपाही थिऐ तिंयां ठुर्है तेऊ छ़ाडी ओर्ही-पोर्ही दूर। 9 राज़अ सिदकिया निंयं तिन्‍नैं हमात मुल्खै रिबला नगरी बाबेल देशे राज़ै नबूकदनेसरा सेटा। तिधी किअ नबूकदनेसरै सिदकिया लै सज़ा दैणैंओ हुकम ज़ारी। 10 रिबला नगरी पाऐ बाबेल देशे राज़ै नबूकदनेसरै यहूदे राज़ै सिदकिये आछी सम्हनै तेऊए शोहरू अर तेऊए कार-करिंदै मारी। 11 तेखअ बझ़ैल़ी तेऊ सिदकिया राज़े आछी पोर्ही काढणैं संघा निंयं सह शांघल़ी लोहै करै बान्हीं बाबेल देशा लै। सिदकिया डाहअ तेऊ मरनै तैणीं तिधी कैद करी।✝52:11 एज. 12:13

बिधाते भबने बरैबादी

12 नबूकदनेसरा गई ती बाबेल देशै राज़ करदी ठारा साला हई, उन्हुंई साला दस शाऊंणै आअ नबूज़रदान एरुशलेम नगरी लै, सह थिअ नबूकदनेसर राज़ैओ बज़ीर अर सैनापति। 13 नबूकदनेसरै चैल़ी एरुशलेम नगरी बिधाते भबन, राज़े मैहलै अर होरी कार-करिंदे अर सेठ लोगे घअरै आग।✝52:13 1 राज़. 9:8 14 तेऊ संघै ज़ुंण कसदीए सैना थिई, तिन्‍नैं पाअ एरुशलेम नगरी फेर बणाअं द गहल़ ढोल़ी। 15 ज़ुंण आम लोगा मांझ़ै कैदी एरुशलेम नगरी बच़ै दै थिऐ, अर ज़ुंण बाबेल देशे राज़े पक्षा लै थिऐ फिरै दै, अर ज़ाण-प्रबीण कारीगीर, निंयैं नबूज़रदानै बाबेल देशा लै। 16 पर रैनै-गरीब अर पठी दाल़जी मणछ डाहै नबूज़रदानै यहूदा मुल्खै ज़ैगा-ज़िम्मीं अर दाखे बागा दी बेठू लाई।

17 बिधाते भबना दी ज़ुंण कांस्से थाम्ह, खुर्शी, गाड्डै, बडअ कांस्सैओ कल़ाह निंयैं तिन्‍नैं काढी बाबेल देशा लै आप्पू संघा।✝52:17 1 राज़. 7:15-47 18 भबना दी पूज़ा-गाज़ा करने ज़ेतरै बी कांस्से चाण-भांडै, डबरी, छ़ारा काढणें पल़ैंज़ै, शूप, च़िमटै, धूप दानी धनैरै अर ज़ेतरी च़िज़ा बिधाते भबनै पूज़ा-गाज़ा करने कामैं थिई तिंयां निंईं तिन्‍नैं पठी। 19 सुन्‍नें कऊली, होर भांडै, सदीऐ, दाखे रसे अर्घै दैणें कऊली, लोधल़ै ढाकणें डबरी अर ज़ेतरी बी सुन्‍नैं अर च़ंदीए च़िज़ा थिई, तिंयां निंईं नबूज़रदान सैनापति आप्पू संघै बाबेल देशा लै।

20 बिधाते भबना लै ज़ुंण राज़ै सुलैमानै कांस्से दूई थाम्ह, खुर्शी, गाड्डै अर बडअ कल़ाह अर तेता हेठै बारा बल्द तै बणाऐं दै, तेतो बज़न करनअ त बशा का बागै। 21 दूई थाम्ह तै ठारा-ठारा हाथ लाम्मै अर तिधा का उझै त तेतो टोप च़ार हाथ उछ़टअ। बारा हाथ थिअ तेतो घेरअ अर च़ार आंगल़ तै तिंयां मोट्टै। भितरा का थिऐ तिंयां खोखलै। 22 हर थाम्हा प्रैंदै थिअ कांस्से टोप अर तेथ फेर फिरदी थिई ज़ाल़ीदार कांगणी लाई दी अर कांगणी फेर तै नारदाणें फूला ज़िहै कांस्से शल़ुम्हणूं लाऐ दै। 23 टोपा दी थिऐ छैनुऐ-छैनुऐ नारदाणैं ज़िहै शल़ुम्हणूं ज़ुंण धरना का शुझिआ तै अर ज़ाल़ीदार कांगणी दी थिऐ शौ-शौ शल़ुम्हणूं लाऐ दै।

यहूदा मुल्खे परज़ा निंईं बाबेल देशा लै

24 एता का लाऊआ निंयैं नबूज़रदान सैनापति सरयाह माहा प्रोहत, बडअ प्रोहत सपन्याह अर बिधाते भबने चअन दरोगै कैद करी। 25 नगरी दी किऐ तिन्‍नैं एक सैनापति कैद, राज़े सात खास बज़ीर अर सैनापतिओ काईथ ज़हा का सैने साब-कताब डाहणें ज़िम्मैंबारी हआ ती सह बी किअ कैद अर शाठ खास सपाही तै होर एरुशलेम बच़ै दै तिंयां बी निंयैं आप्पू संघै कैद। 26 नबूज़रदान सैनापति पजैल़ै तिंयां बाबेल देशे राज़ै सेटा हमात मुल्खै रिबला नगरी 27 तिधी बझ़ैल़ै बाबेल देशे राज़ै तिंयां खास्सै च़िक्‍कणै अर खिरी पाऐ तिंयां हमात मुल्खै रिबला नगरी मारी।

इहअ करै निंयैं यहूदा मुल्खे लोग आपणीं ज़ैगा का दूर कैदी बणाईं।

28 बाबेल देशे राज़ै नबूकदनेसरै ज़ेतरै यहूदी मणछ बाबेल देशा लै कैद करी निंयैं तिंयां थिऐ एतरै: आपणैं राज़ा दी सातुई साला निंयैं तेऊ चअन हज़ार त्रेई ज़ण्हैं, 29 ठार्हुई साला निंयैं नबूकदनेसरै राज़धानी एरुशलेम नगरी का आठ शौ बत्ती ज़ण्हैं, 30 ज़ांऊं नबूकदनेसरा राज़ करदी त्रेई साल लागी, तैहा साला पजैल़ै तेऊ सात शौ पंजताल़ी ज़ण्हैं ज़ुंण तेऊए सैनापति नबूज़रदानै निंयैं तै। इहअ करै निंयैं तेऊ पठी च़ार हज़ार छ़ह शौ यहूदी बाबेल देशा लै।

इज़राईली राज़ेए खिंबा लै आशा

31 ज़ांऊं एबल-मरोदक बाबेल देशो राज़अ बणअ, तेऊ किई यहूदा मुल्खे राज़ै जेहोकीना लै झींण संघा किअ तैहा ई साला पच्‍ची फागणै सह कैद खानै का आज़ाद। जेहोकीन राज़ै गई ती सैईंती साला बिति ज़धकअ सह बाबेल देशा लै कैद करी निंयं त। 32 एबल-मरोदक त जेहोकीना लै खास्सअ झणैल़ू; तेऊ किई जेहोकीन राज़ै संघै शोभलै करै गल्‍ला संघा किई तेऊए खास्सी इज़त। होर बी थिऐ कई देशे राज़ै बाबेल देशे गलामी दी, पर बाबेल देशै राज़ै दैनी जेहोकीना बडी पदबी अर खास अदर। 33 जेहोकीन राज़अ काढअ तेऊ कैद खानै का बागै संघा बझ़ैल़ै कैदीए झिकल़ै पोर्ही खोल्हणैं अर तधा बाद खाई तेऊ सारी ज़िन्दगी बाबेल देशे राज़ेए मेज़ा दी राज़ै संघै रोटी। 34 तधा बाद ज़ेभै तैणीं जेहोकीन ज़िऊंदअ रहअ, बाबेल देशे राज़ै त तेऊ लै हर धैल़ीए गरज़ पूरी करना लै खर्च़अ लाअ द, सह रहअ तेऊ सारी अमरा भेटदअ लागी ज़ेभै तैणीं सह मूंअ निं आथी।