1 ✝मिसर देशे माहा राज़ै गाज़ा नगरी दी कबज़अ करनै का आजी बोलअ बिधाता आपणैं गूर मुंह जेरमयाह का पलिश्तीए बारै इहअ,

2 "भाल़! बाबेल देशे सैना आई उतरा बाखा पाणींए दरैऊआ ज़ेही,

अह दरैअ भर्हनअ एऊ सारै देशै अर एते सोभी च़िज़ा प्रैंदै।

एता दैणी सोभ नगरी अर तेथ बस्सै दै सोभ मणछ डबेऊई।

लोगा लाणीं लैल़ा-पकारा अर सोभी लाणीं हिक्‍का पटाक्‍की लेरा।

3 ज़ांऊं तिन्‍नां दुशमणा का घोल़ै हांढणे टाप अर,

दुशमणे रथे घरेटा घुर्हने छ़ेल़ शुण्हनी,

ईजा-बाबा निं पिछ़ू फिरी आपणैं शोहरू-माठै बाखा बी भाल़णअ,

तिंयां निं आपणैं हाथै तिन्‍नें मज़त बी करी बोल़णीं।

4 पलिश्तीओ बनाश हणैंओ बगत गअ पुजी,

सूर अर सदोन अर होर ज़ुंण तिन्‍नों साथ दैआ, तिंयां बी हणैं खतम।

मुंह बिधाता करनै पलिश्ती बरैबाद,

तिन्‍नां मांझ़ै निं मुंह एक बी ज़िऊंदअ छ़ाडणअ

ज़ुंण कप्तोर* समुंदरे बाढै आसा बस्सै दै।

5 गाज़ा नगरी बस्सै दै लोगा लै च़ाल्‍लअ घणअ दुख पल़ी,

अशकलोन नगरीए लोग हणैं नड़क्‍क।

ज़ुंण पलिश्ती सऊंऐं मुल्खा बाखा आसा बस्सै दै,

तिन्‍नां लै भाल़ किहअ घणअ शोग पल़णअ!

6 तिन्‍नां लाणीं एही लैल़ा-पकारा, ‘बिधाते तलबारै!

ताह केभै तैणीं रहणअ हाम्हां काटदै लागी?

तूह डेऊ ज़िधा का आई तिधा लै फिरी

संघा रह तेतै च़ुप्पी! ऐबै निं हाम्हां काटै।’

7 अह तलबार निं काटणै का पिछ़ू हटदी!

एता लै अह काम मंऐं सभाल़अ द,

एता लै आसा मंऐं हुकम किअ द कि अशकलोन नगरी अर

पलिश्तीए समुंदरे बाढै बस्सै दै लोगा लै पल़ चुटी।"