जेरमयाह 35

जेरमयाह अर रकाबे आद-लुआद

1 ✝ 35:1 2 राज़. 23:36—24:6; 2 इति. 36:5-7 ज़धू जोशियो शोहरू जेहोकीम यहूदा मुल्खो राज़अ थिअ, तधू दैनअ बिधाता मुल्है समाद। बिधाता बोलअ इहअ, "जेरमयाह, 2 तूह डेऊ तिन्‍नां मणछा सेटा ज़ुंण रकाबी टोली का आसा। संघा कर तिन्‍नां संघै गल्‍ला। तिन्‍नां आण मुंह बिधाते भबने खुडी लै संघा दैऐ तिधी तिन्‍नां लै दाखो रस झुटणा लै।"

3 मंऐं आणै सोभ रकाबी टोलीए लोग शादी। जजनिया, तेऊए बाबा नाअं बी थिअ जेरमयाह अर सह आसा हाबासानीओ शोहरू, तिन्‍नें सोभ शोहरू-माठै अर भाई-बंध 4 पजैल़ै मंऐं सोभ बिधाते भबनै। मंऐं बशैल़ै तिंयां तैहा खुडी ज़ुंण ज़ेथ हनान गूरे शोहरू रहा तै। हनान थिअ जिगदालीओ शोहरू, अह खुडी थिई तैहा खुडी प्रैंदा बाखा ज़ेथ शलूमो शोहरू मासेया बिधाते भबनो दरोगअ रहा त अर होरी कार-करिंदे कमरै बी थिऐ तेता नेल़।

5 तेखअ डाहै मंऐं सोभी रकाबी सेटा दाखे रसा करै भरै दै प्रिहै संघा बोलअ, "हुंज़ा दाखो रस झुटा।"

6 पर तिन्‍नैं दैनअ बोलअ मुल्है इहअ, "हाम्हां निं अह दाखो रस झुटणअ। म्हारै दाद-बाब रकाबे शोहरू जोनादाबै आसा इहअ हुकम किअ द, ‘नां तम्हैं अर नां आजू थारी आद-लुआदा मांझ़ै कुंणी लोल़ी कधू दाखो रस झुटअ।’ 7 तेऊ आसा हाम्हां लै इहअ बी डाहअ द बोली, ‘नां आप्पू लै घअर च़िणीं, नां खेच-खहल़ खटी अर नां तेथ दाखो बेज़अ रोही। तम्हैं रहै सदा खिम्भा दी, तै रहणैं तम्हैं ऐहा ज़ैगा ज़िऊंदै बच़ी ज़ेथ तम्हैं परदेसी ज़िहै आसा।’ 8 हाम्हैं आसा आझ़ तैणीं तिहअ ई करदै लागै दै ज़िहअ रकाबे शोहरू जोनादाबै हाम्हां लै बोलअ द आसा। हाम्हां निं कधि दाखो रस झुटणअ अर नां म्हारी बेटल़ी अर नां म्हारै शोहरू-शोहरी दाखो रस झुटदै। 9 हाम्हैं निं तधा बाद आप्पू लै घअर च़िणीं तेथ बस्सै, नां हाम्हां का खेच-खहल़ आथी, नां बेज़अ अर नां दाखे बाग अर नां साल-फसल काढदै। 10 हाम्हैं रहा कबल्‍लै खिम्भा दी। हाम्हैं ज़िऊआ पठी तेही ई ज़िन्दगी ज़िहअ म्हारै दाद-बाब जोनादाबै खोज़ी आसा डाहअ द। 11 पर ज़ांऊं बाबेल देशो राज़अ नबूकदनेसर एऊ देशा संघै जुध करदअ आअ, हाम्हैं सोठअ इहअ कि बाबेल अर सिरीया देशे सैना का बच़ी डेऊणअ हाम्हां राज़धानी एरुशलेम। तैही आसा हाम्हैं आझ़काला एरुशलेम रहंदै लागै दै।"

12 तेखअ बोलअ स्वर्गे सारी सैने मालक बिधाता मुल्है इहअ, "जेरमयाह, 13 तूह डेऊ संघा बोल यहूदा अर राज़धानी एरुशलेम नगरीए लोगा लै इहअ कि स्वर्गे सारी सैनो मालक इज़राईलो परमेशर बिधाता बोला इहअ, ‘हुंह बिधाता पुछ़ा तम्हां का इहअ कि तम्हैं मेरी गल्‍ला किल्है निं शुणदै अर तम्हैं किल्है निं तिहअ करदै ज़िहअ तम्हां लै हुंह बोला? 14 रकाबे शोहरू जोनादाबै डाहअ आपणैं शोहरू-माठै का खोज़ी कि दाखो रस निं झुटी अर तिन्‍नें आद-लुआदा मांझ़ै तोही निं आझ़ तैणीं बी कुंणी दाखो रस झुटअ! हुंह रहअ कबल्‍लअ तम्हां लै बोल्दअ लागी पर तम्हैं निं मेरअ धख ज़िहअ बी शूणअ। 15 हुंह रहअ तम्हां सेटा लै भिई-भिई आपणैं दास अर गूरा छ़ाडदअ लागी अर तिंयां रहै तम्हां लै बोल्दै लागी कि आपणैं कदुष्ट काम अर पाप करनअ छ़ाडा, इना देअए मैहरै-मुहुर्ती पूज़दै निं लागा नां इने च़ाकरी करा। तै रहणैं तम्हैं ऐहा ज़ैगा खास्सी साला बस्सी ज़ुंण मंऐं थारै दादा-बाबा लै आसा दैनी दी। पर तम्हैं किई मेरी गल्‍ला शूणीं नां शूणीं अर तम्हैं निं धैन ई दैनअ कि हुंह तम्हां लै किज़ै बोला। 16 रकाबे शोहरू जोनादाबे आद-लुआद आसा आझ़ बी तिन्‍नां गल्‍ला मंदी लागी दी ज़ुंण तिन्‍नें दादै-बाबै तिन्‍नां लै हुकम आसा किअ द। पर तम्हैं यहूदा मुल्खे परज़ा निं मेरअ धख बी शूणअ।

17 "‘तैही बोला ऐबै हुंह इज़राईलो परमेशर बिधाता ज़ुंण स्वर्गे सारी सैनो मालक आसा! शूणां, मंऐं लाई यहूदा मुल्ख अर राज़धानी एरुशलेम नगरीए परज़ा लै घोर आफ़त पाई ज़िहअ मंऐं बोलअ त कि मुंह करनअ इहअ। किल्हैकि हुंह रहअ तम्हां लै बोल्दअ लागी पर तम्हैं निं मेरी गल्‍ला शूणीं। हुंह रहअ तम्हां लै हाक्‍का लांदअ लागी पर तम्हैं निं होह बी किअ।’"

18 मंऐं खोज़ी रकाबी टोलीए तिन्‍नां मणछा का ईंयां पठ गल्‍ला कि बिधाता दैनअ तम्हां लै मुखा समाद, "जेरमयाह, इना का खोज़ इहअ, ‘हुंह स्वर्गे सारी सैनो मालक बिधाता, इज़राईलो परमेशर बोला तम्हां लै कि तम्हैं आसा तिहअ ई करदै लागै दै ज़िहअ रकाबे शोहरू जोनादाब थारै दाद-बाब तम्हां लै हुकम आसा किअ द। तम्हैं मनी तेऊए सोभ गल्‍ला अर तम्हैं आसा तेही ई ज़िन्दगी ज़िऊंदै लागै दै ज़िहअ तेऊ तम्हां लै बोली आसा डाहअ द। 19 तैही बोला आझ़ हुंह स्वर्गे सारी सैनो मालक बिधाता, इज़राईलो परमेशर इहअ कि रकाबे शोहरू जोनादाबे आद-लुआदा मांझ़ै हणअ सदा एक ज़ण्हअ मणछ मेरी च़ाकरी मेरी च़ाकरी करदअ ज़रूर।’"