जेरमयाह 16

एरुशलेम नगरी लै परमेशरे सोठ

1 बिधाता किई मुंह संघै भिई गल्‍ला संघा बोलअ इहअ, 2 "ऐहा ज़ैगा नां बैह करी नां तेरै किज़ै हुअ-ज़ाअ लोल़ी। 3 हुंह खोज़ूं ताखा ज़ुंण शोहरू-शोहरी ऐहा ज़ैगा हणैं अर ज़ुंण तिन्‍नां ज़ल्म दैणैं आल़ै तिन्‍नें ईज-बाब हणैं, तिन्‍नां लै किज़ै हणअ! 4 तिन्‍नां मांझ़ै मरनै कई नबिज़री बमारी करै, तिन्‍नां लै निं कोही शोग करनअ अर नां तिन्‍नें ल्हासा कहा दाबी डाहणीं। तिन्‍नें ल्हासा हणीं धरनीं मल़-गोबरा ज़ेही पल़ी दी। होर मरनै कई जुधा दी तलबारा अर कई मरनै देशै पल़ै दै नकाल़ा करै। तिन्‍नें ल्हासा च़ोच़ल़णी काअ-गरली अर बणें शकारी ज़ीबा।

यहूदा लै सज़ा

5 "तूह निं हेरे तिन्‍नां घअरै डेऊई ज़िधी मखाण हणअ पल़अ द। तूह निं कोही लै शोग मनाऊंईं नां चिंजदअ डेऊई। ऐबै निं हुंह मेरी परज़ा लै बर्गत दैंदअ अर नां झ़ूरदअ अर नां झींण करदअ। 6 कै सेठ कै गरीब; ऐहा ज़ैगे मरनै सोभ पर नां तिन्‍नां लै कहा मखाण पाणअ अर नां तिंयां कहा दाबी डाहणैं। तिन्‍नां पिछ़ू शोग मनाऊंणअ लै देही ब्रूज़णी अर नां कहा आपणअ मूंड छाम्बणअ। 7 कसरै ईजा-बाबा मरनै पिछ़ू निं तिन्‍नां सेटा कोह चिंजदै एछणैं नां तिन्‍नां लै कहा किज़ै खाण-पींण निंणअ।

8 "ज़हा घअरै धाम आसा, तेऊ घअरै बी निं डेऊई आथी, तिन्‍नां संघै बी निं खांदअ-पिंदअ बेशी। 9 हुंह आसा स्वर्गे सारी सैनो मालक बिधाता, इज़राईलो परमेशर। हुंह बोला ताल्है इहअ, ‘थारी आछी भाल़दी-भाल़दी करनअ मुंह थारै तिन्‍नां ई धैल़ै नसाफ। मुंह करनअ इधी एरुशलेम इहअ कि खुशी अर नाच़णै-खेल्हणे निं गल्‍ला बी शुण्हनी। नां लाल़ै अर लाल़ीए गल्‍ला शुण्हनी।’✝16:9 जेर. 7:34; 25:10; प्रका. 18:23

10 "ज़ांऊं ताह ईंयां सोभै गल्‍ला इना लोगा का खोज़णीं, तिन्‍नां पुछ़णअ ताखा इहअ, ‘बिधाता किल्है सोठी हाम्हां लै एही आफ़त पाणीं? हाम्हैं, किछ़ कशूर निं किअ! नां हाम्हां म्हारै परमेशर बिधाता लै कोई पाप किअ!’

11 "तूह खोज़ै तिन्‍नां का एही गल्‍ला कि बिधाता बोलअ तम्हां लै इहअ, ‘थारै दाद-बाब हुऐ मुखा दूर संघा लागै तिंयां होरी देअए च़ाकरी करदै। तिन्‍नैं छ़ाडअ हुंह अर तिन्‍नैं निं मेरै बधाने शिक्षा मनी। 12 पर तम्हैं किअ थारै दादा-बाबा का बी खास्सअ बूरअ। तम्हैं आसा सोभ हठू अर कदुष्ट अर तम्हैं निं ज़िहअ मंऐं बोलअ तिहअ शूणअ। 13 तैही लाऐ मंऐं ऐबै तम्हैं ऐहा ज़ैगा दूर इहै देशा जैंदरी शोटी ज़ुंण नां तम्हैं कधू भाल़अ नां थारै दादै-बाबै आथी भाल़अ द। तिधी रहणैं तम्हैं होरी देअए धैल़-राच बेठू लागी अर तेथ निं तम्हां लै मेरअ जश हणअ।’"

गलामी का बापस फिरनअ

14 तेखअ बोलअ बिधाता इहअ, "आजू एछणअ इहअ बगत कि लोगा निं मेरै नाओंऐं इहै सोह खाणैं, ‘ज़ुंणीं ज़िऊंदै परमेशरै इज़राईली मणछ मिसर देशे धरती का काढी आणै हाम्हैं काढा तेऊए सोह।’ 15 तिन्‍नां काढणैं मेरै नाओंऐं इहै सोह, ‘सह ज़िऊंदअ परमेशर ज़ुंणीं इज़राईली मणछ उतर दिशा बाखा धरती अर संसारे सोभी देशा का इज़राईली झाल़ी आणै ज़ेथ तेऊ आप्पै तिंयां छिंगै तै, हाम्हैं काढा तेऊए सोह।’ मुंह आणनैं तिंयां तिन्‍नें आपणैं देशे तैहा ज़ैगा लै बापस फरेऊई ज़ुंण मंऐं तिन्‍नें दादा-बाबा लै थिई दैनी दी। अह गल्‍ल डाही मंऐं बिधाता बोली।"

आजू ज़ुंण सज़ा भेटणीं

16 बिधाता बोलअ इहअ, "मुंह छ़ाडणैं इना बापस झाल़दै खास्सै मणछ ज़िहै मणछ म्हाछ़ली ढाकदै डेओआ। तेखअ छ़ाडणैं मुंह कई मणछ शकारी ज़िहै शकारा करदै कि तिन्‍नां आणनैं ईंयां हर पर्बत, धारा अर ढुंखरा-डुआरा का ढाकी। 17 हुंह आसा भाल़अ लागअ द कि ईंयां मणछ किज़ै-किज़ै करा। एही निं किछ़ गल्‍ल आथी ज़ुंण मेरी आछी भाल़ी निं सकदी। मुखा आसा कबल्‍लै तिन्‍नें पाप शुझदै लागै दै। 18 तिन्‍नें कदुष्ट कामां अर पापा लै लागणअ तिन्‍नां दुगणअ भुगतणअ, किल्हैकि तिन्‍नैं लाई तिन्‍नां मूंईं दी ल्हासा ज़ेही मुहुर्ती करै मेरी ज़ैगा छ़ोत। तिन्‍नैं भरअ तिन्‍नां दखाऊटी मुहुर्ती करै सारअ देश।"

जेरमयाह किई बिधाता सेटा अरज़

19 तेखअ किई मंऐं बिधाता सेटा एही अरज़,

"बिधाता, सह आसा तूह ज़ुंण मुंह बच़ाऊआ अर ज़ुण मुल्है बल दैआ,

ज़ेभै आफ़त पल़ी, तेभै करा मेरी मज़त तूह।

धरतीए बाढा ओर्ही एछणैं ताह सेटा देशा देशे लोग, तिन्‍नां बोल़णअ इहअ,

‘म्हारै दाद-बाब रहै नकली अर बृथा देअआ पिछ़ू हांढदै लागी!✝16:19 रोम. 1:25

20 मणछ कै आपणअ देअ आप्पी सकअ बणाईं? ज़ाथी निं इहअ करी सकदै!

ज़ै तिन्‍नैं इहअ किअ, तै निं तिंयां देअ-देबी असली दी किछ़ आथी।’"

21 बिधाता दैनअ ज़बाब,

"तैही रहैऊंणअ मुंह एकी बारी सोभी देशा का मेरअ महान बल अर शगती।

तेखअ लागणअ तिन्‍नां का थोघ कि हुंह आसा बिधाता।"