जेरमयाह 21

सिदकिया प्रोहते अरज़ निं शूणीं

1 यहूदा मुल्खे राज़ै सिदकिया छ़ाडै मुंह जेरमयाह सेटा मलकिजो शोहरू पशहूर अर मासेया प्रोहतो शोहरू सपन्याह मुंह सेटा एही अरज़ करदै, 2 "ज़ीबाण, तूह पुछ़ हाम्हां लै बिधाता, किल्हैकि बाबेल देशो राज़अ नबूकदनेसर अर तेऊए सैना आई हाम्हां संघै जुधा लै। बिधाता किऐ हाम्हां लै पैहलै बी खास्सै च़मत्कार, झ़ाणीं एभकी बारी बी बिधाता हाम्हां लै एक होर च़मत्कार करे अर बाबेल देशे सैना हाम्हां का पिछ़ू हटे।"✝21:2 2 राज़. 25:1-11; 2 इति. 36:17-21

3 बिधाता बोलअ पशहूर अर मुल्है इहअ कि जेरमयाह, ज़ुंण ताह सेटा लै पुछ़दै आसा छ़ाडै दै, तिन्‍नां का दै राज़ै सिदकिया लै इहअ समाद, 4 "इज़राईलो परमेशर बिधाता बोला इहअ, ‘सिदकिया, बाबेल देशो राज़अ अर तेऊए सैना गई नगरी फेर पुजी, तिंयां पल़णै तम्हां लै चुटी। तम्हां का आसा तिन्‍नां संघै मकाबलै करना लै अस्त्र-शस्त्र थारै हाथै। पर तिंयां अस्त्र-शस्त्र पाणै मुंह तम्हां ई प्रैंदै। थारै दुशमण पजैल़णैं मुंह नगरी भितरी। 5 तम्हां लै पल़णअ मुंह आप्पू आपणैं सारै ज़ोर अर सारै रोश्शा संघी चुटी। 6 ऐहा नगरी दी बस्सै दै पाणै मुंह सोभ मारी। एथ नां मणछ बच़णअ नां पशू बच़णैं, तिंयां मरनै माहा मरी करै। 7 सिदकिया, तेखअ ज़ुंण यहूदा मुल्खै ऐहा नगरी तेरै कार-करिंदै अर लोगा मांझ़ै ज़ुंण जुधा दी तलबारा का, नकाल़ अर बमारी का ज़िऊंदै बच़णैं, तिन्‍नां दैणअ मुंह थारै दुशमण बाबेल देशे राज़ै नबूकदनेसरा कैद करनै ज़ुंण तम्हां मारदअ आसा आअ द। तिंयां पाणै तेखअ तेऊ मारी। तेऊ निं तम्हां लै धख बी झींण करनी अर तेऊ निं तम्हां मांझ़ै एक बी ज़िऊंदअ छ़ाडणअ! अह गल्‍ल डाही मंऐं बिधाता बोली।’"✝21:7 लूक. 21:24

8 तेखअ बोलअ बिधाता मुल्है इहअ कि परज़ा का खोज़ इहअ, "शूणां! मंऐं बिधाता लाई तम्हां लै दूई बाता दैई। तम्हैं सका तेता मांझ़ै तैहा बाता छ़ांटी ज़ुंण ज़िन्दगी बाखा डेओआ, कि तैहा बाता छ़ांटी ज़ेथ आजू मौत आसा। 9 तम्हां मांझ़ै ज़ुंण ऐहा एरुशलेम नगरी दी रहे सह मरनअ जुधा दी तलबारा करै, कि नकाल़, कि मरनअ सह नबिज़री बमारी करै। पर ज़ुंण नगरी का बागै डेऊ बाबेल देशे सैना का आप्पै तिन्‍नें हाथै दैए ज़ुंण नगरी लै मारदै चुटी च़ाल्‍लै पल़ी, तिन्‍नां निं सह मारनअ, तिन्‍नें ज़िन्दगी ता जाणीं तिहअ करै बच़ी। 10 मंऐं आसा सोठी हेरअ द कि अह नगरी निं मुंह ऐबै बच़ाऊंणी, पर ऐहा दैणअ मुंह बरैबाद हणैं। अह करनी बाबेल देशे राज़ै बशै, तेऊ करनीं अह दहई-प्लुशी खतम। अह गल्‍ल डाही मंऐं बिधाता बोली।

राज़ै दाबेदे खिंबा लै समाद

11 "यहूदा मुल्खे राज़ै दाबेदे खिंबे लोगा का बी खोज़ै मेरअ समाद। तिन्‍नां लै बोलै इहअ कि 12 ज़ुंण तम्हैं दाबेदे आद-लुआद आसा, तम्हां लै बोला बिधाता इहअ,

‘हर धैल़ै करा नसाफ अर भलअ।

ज़ुंण लुटी लाऐ तिन्‍नां बच़ाऊआ लुटणैं आल़ै का,

तिन्‍नां करा तिन्‍नां मणछा का आज़ाद ज़ुंणी तिन्‍नें बूरै हाल किऐ।

ज़ै तम्हैं इहअ नांई करे, तै पल़णअ हेरे मेरअ रोश्श तम्हां लै आगी ज़िहअ।

तेता करै हणैं थारै किऐ दै कदुष्ट कामां पिछ़ू दझ़ी खतम।

सह आग भकणी एही कि तेता निं कोहै शेऊई सकदअ।

13 एरुशलेम, तूह आसा धारा उछ़टै दी सरली ज़ैगा टोल्हा ज़ेही बस्सी दी।

पर हुंह निं ताह बाखा आथी!

तूह बोला इहअ कि ताह संघै मकाबलै लै निं कोह एछी सकदअ

थारै उछ़टै पाक्‍कै गहल़ा नां कुंण ढोल़ी सकदअ अर नां भितरी एछी सकदअ।

14 पर मुंह लणी तेरै कामां लै सज़ा दैई।

मुंह चैल़णीं तेरी हर ज़ैगा आग अर आगी करै हणीं ताह फेर सोभ गल्‍ला दझ़ी खतम

अह गल्‍ल डाही मंऐं बिधाता बोली।’"