1 ज़ांऊं ईशू का थोघ लागअ कि फरीसी मणछै शूणीं ईंयां गल्‍ला कि ईशू दैआ डुबकी अर तेऊए हुऐ जोहन्‍ना का बी खास्सै च़ेल्‍लै। 2 (ईशूए च़ेल्‍लै दैआ तै डुबकी, आप्पू निं सह डुबकी दैंदअ त)। 3 तेखअ डेऊअ ईशू यहूदा का गलील मुल्खा लै।

4 गलील मुल्खा लै डेऊणअ त तेऊ सामरी मुल्खै बाती। 5 इहअ करै पुजअ सह सुखार नाओंऐं सामरी मुल्खै एकी गराऊंऐं। अह गराअं आसा तैहा ज़ैगा ज़ुंण याकबै आपणैं शोहरू युसुफा लै दैनी ती। 6 याकबो कुहअ बी थिअ तिधी, ईशू पुजअ लाम्मै सफरा का थकी करै संघा बेठअ तेऊ कुहै सेटा तिधी। ईंयां गल्‍ला हुई धैल़ी दपहरै।

7 तेतरी आई एक सामरी बेटल़ी तेऊ कुहै दी पाणीं भरदी। ईशू बोलअ तैहा लै, "मुखा बी पणैऊं पाणीं।" 8 ईशूए च़ेल्‍लै तै तैहा नगरी डेऊऐ दै खाणां लै रोटी लंदै।

9 सामरी बेटल़ी ईशू लै बोलअ, "तूह आसा यहूदी* अर हुंह आसा सामरी* बेटल़ी। तूह मुखा किल्है मांगा पाणीं?"✝

10 ईशू दैनअ तैहा लै ज़बाब, "ज़ै ताखा परमेशरे बरदानो थोघ हंदअ, अर इहअ थोघ हंदअ कि तूह कहा संघै आसा लागी दी गल्‍ला करदी, तै मांगदी तूह मुखा अर मुंह दैणअ त ताल्है सदा रहणैं आल़ी ज़िन्दगी दैणैं आल़अ पाणीं।" 11 तैहा बेटल़ी बोलअ, "हे मालक, ताखा पाणीं भरना लै भांडअ ता आथी निं, अर कुहअ आसा डुघअ, तै ताखा ज़िन्दगी दैणैं आल़अ पाणीं किधा का आअ?" 12 तूह कै म्हारै दाद-बाब याकबा का बडअ आसा, ज़ुंणी हाम्हां लै अह कुहअ दैनअ, संघा एऊ ई कुहै का आप्पू बी झुटअ, आपणैं शोहरू का बी पणैऊंअं अर आपणैं डागै-धणा का बी पणैऊंअं।

13 ईशू दैनअ तैहा लै ज़बाब, "ज़ुंण एऊ पाणीं झुटे, तेऊ एछणी भिई चिशै। 14 पर ज़ुंण तेऊ पाणीं झुटे ज़ुंण मुंह दैणअ, तेऊ निं कधि चिशै एछणी। होर ता होर, ज़ुंण पाणीं मुंह तेऊ लै दैणअ, तेते निखल़णीं तेऊ दी ज़िन्दगी दैणैं आल़ी सोबल़ अर तेता दैणीं तेऊ लै सदा लै ज़िन्दगी।"

15 तैहा बेटल़ी ईशू लै बोलअ, "हे प्रभू तेऊ पाणीं दै मुल्है बी, मुंह निं लोल़ी कधि चिशै आई, नांईं लोल़ी मुंह पाणीं भरना लै एतरअ दूर पल़अ एछणअ।"

16 ईशू बोलअ तैहा लै, "डेऊ आपणैं लाल़ै आण शादी।"

17 तेखअ तैहा बेटल़ी बोलअ, "मेरअ निं लाल़अ आथी।" इहअ शूणीं बोलअ ईशू तैहा लै, "तंऐं खोज़ी शुची गल्‍ल कि तेरअ निं लाल़अ आथी। 18 किल्हैकि तंऐं हेरै पांज़ घअर बस्सी, ज़हा संघै तूह आझ़काला रहा, सह बी निं तेरअ लाल़अ आथी। अह खोज़ी तंऐं शुची गल्‍ल।"

19 बेटल़ी बोलअ, "हे प्रभू मुखा ज़ाण्हिंआं इहअ कि तूह आसा परमेशरो गूर। 20 म्हारै सामरी दाद-बाब डेओआ तै ऐहा धारा परमेशरा सेटा माथै टेक्‍कदै, अर तम्हैं यहूदी बोला इहअ कि परमेशरे भज़न करने ज़ैगा आसा एरुशलेम नगरी?"✝

21 ईशू बोलअ तैहा लै, "हे ज़नानी, मेरी गल्‍लो विश्वास कर कि इहअ बगत एछणअ, नां तम्हां ऐहा धारा परमेशरे च़ाकरी करनी, नां एरुशलेम नगरी। 22 ✝ तम्हैं सामरी ज़सरी च़ाकरी करा, तेऊओ निं तम्हां का खास्सअ थोघ आथी अर हाम्हां यहूदी का आसा तेऊए सोभी गल्‍लो थोघ, उद्धार एछणअ यहूदी मणछा बाती।

23 "आजू एछणअ इहअ बगत, इधी तैणीं कि सह बगत आझ़काला बी, शुचै भगता करनअ परमेशरो भज़न आत्मां अर सत्ता दी रही करै, परमेशर लोल़ा आप्पू लै इहै ई च़ाकरी करनै आल़ै। 24 परमेशर आसा आत्मां, अर ज़रूरी आसा कि तेऊए च़ाकरी करनै आल़ै लोल़ी आत्मां अर सत्ता दी रही भज़न किअ।"

25 तैहा बेटल़ी ईशू लै बोलअ, "हुंह ज़ाणा कि मसीहा ज़ुंण महान मणछ आसा, सह आसा एछणैं आल़अ, ज़ेभै सह एछणअ, तेभै खोज़णीं तेऊ हाम्हां का सोभै गल्‍ला।"

26 ईशू बोलअ तैहा लै, "हुंह ज़ुंण ताह संघै गल्‍ला करदअ आसा लागअ द, हुंह आसा सह ई।"

27 तेतरी गऐ ईशूए च़ेल्‍लै बी पुजी, तिंयां हुऐ रहैन कि सह थिअ तैहा बेटल़ी संघै गल्‍ला करदअ लागअ द, पर तिन्‍नैं निं इहअ पुछ़अ कि तूह किज़ै च़ाहा अर ऐहा संघै किज़ै गल्‍ला करा। 28 सह बेटल़ी डेऊई आपणैं पाणींए घल़ै तिधी छ़ाडी सोभी लोगा का खोज़दी नगरी लै, 29 एछा, एकी मणछा भाल़ा, ज़ुंणी मेरै बारै कई गल्‍ला खोज़ी ज़ुंण मेरी ज़िन्दगी दी हुई-बिति दी आसा, हेरा, अह मसीहा किनी आसा? 30 इहअ शूणीं आऐ नगरी का खास्सै मणछ ईशू सेटा लै।

31 तेतरी ईशूए च़ेल्‍लै बोलअ, "हे गूरू, रोटी लअ खाई।"

32 पर ईशू बोलअ तिन्‍नां लै, "मुखा आसा खाणां लै एही रोटी ज़ेतो तम्हां का थोघ निं आथी।"

33 च़ेल्‍लै लागै आप्पू मांझ़ै गल्‍ला करदै, "एऊ लै रोटी कै कुंणी आणी हेरी?"

34 ईशू बोलअ तिन्‍नां लै, "मेरी रोटी आसा ईंयां कि हुंह तेऊए साबै सोभै गल्‍ला करूं ज़ुंणी हुंह छ़ाडअ द आसा, अर तेऊओ काम पूरअ करूं। 35 तम्हां का कै थोघ निं आथी कि फसला लऊंणा लै आसा अज़ी च़ार भिन्‍नैं बाकी? पर हुंह बोला खल़ै उझ़िआ अर फेर दैआ भाल़णीं। फसल गई पाक्‍की अर लऊंणा लै हई। 36 लऊंणै आल़ै भेटा मज़दूरी, अर सदा रहणैं आल़ी ज़िन्दगी लै डाहा फल़ कठा करी, ताकि बऊंणैं अर काटणै आल़ै दुही लै नंद होए। 37 एता लै आसा अह कहाबत शुची, ‘बऊंणैं आल़अ आसा होर अर काटणै आल़अ आसा होर।’*मिक. 6:15

38 "मंऐं छ़ाडै तम्हैं तेऊ खेचा लऊंदै ज़ेथ थारी कोई मैन्थ निं आथी लागी दी, सह आसा होरी किई दी अर तम्हैं आसा हुऐ दै तैहा मैन्था का फसले साझ़ू।"

39 कई सामरी लोगै किअ तैहा बेटल़ी खोज़ी दी गल्‍ला करै ईशू दी विश्वास, तैहा बोलअ इहअ, "एऊ मणछै खोज़ी तिंयां कई गल्‍ला ज़ुंण मेरी ज़िन्दगी दी हुई-बिति दी आसा।"

40 तिन्‍नैं सामरी किई ईशू सेटा एछी अरज़ कि हाम्हां सेटा दै रहणैं, ईशू रहअ तेखअ दूई धैल़ै तैणीं तिधी। 41 ईशूए बैणा शूणीं किअ होरी बी कई लोगै विश्वास। 42 तिन्‍नैं बोलअ तैहा बेटल़ी लै, "हाम्हैं निं सिधअ तेरै बोल़णैं करै विश्वास किअ, पर हाम्हैं हेरअ आप्पै शूणीं अर आप्पै भाल़ी कि अह ई आसा सच्च़ी एऊ संसारै उद्धार दैणैं आल़अ।"

43 दूई धैल़ै बाद डेऊअ सह तिधा का गलील मुल्खा लै। 44 किल्हैकि ईशू थिअ आप्पै बोलअ द कि परमेशरे गूरो निं आपणैं घअरै अदर हंदअ। 45 ज़ांऊं ईशू गलील पुजअ, गलीली लोग आऐ बडी खुशी-खुशी मिलदै, किल्हैकि ज़ेतरै काम तेऊ एरुशलेम नगरी ऊवार्णे थैरा दी किऐ तै, तिंयां काम भाल़ै तै तिन्‍नैं बी, किल्हैकि तिंयां बी तै एरुशलेम जाचा लै आऐ दै।

46 ईशू आअ भिई तेखअ गलील मुल्खे काना गराऊंआं लै बापस फिरी, ज़िधी तेऊ पाणींओ दाखो रस बणाअं त। तिधी आअ एक राज़ैओ दरबारी, तेऊओ शोहरू त कफरनहूम नगरी बमार हुअ द। 47 तेऊ दरबारी शूणीं एही गल्‍ला कि ईशू आसा यहूदा का गलील मुल्खा लै आअ द। सह डेऊअ ईशू सेटा संघा बोलअ, "हे प्रभू, तूह एछ मुंह संघै कफरनहूम नगरी मेरै घअरा लै, संघा कर मेरै शोहरू नबिज़री बमारी का नरोगै! नांईं ता तेतरी जाणीं तेऊए मौत हई।"

48 ईशू बोलअ तेऊ लै, "ज़ेभै तैणीं तम्हैं नछ़ैण अर बडै-बडै च़मत्कार नांईं भाल़े, तेभै तैणीं निं तम्हां कधि मेरअ विश्वास करनअ।"*दान. 4:2

49 राज़ैए दरबारी बोलअ, "हे प्रभू, मेरै शोहरू मरनै का आजी च़ाल्‍ल तूह मुंह संघै।"

50 ईशू बोलअ, "डेऊ, तेरअ शोहरू आसा ज़िऊंदअ।" सह डेऊअ ईशूए गल्‍ला दी विश्वास करी घअरा लै। 51 सह पुजअ त आधी बाता उंधै बापस फिरी कि तेऊए दास पुजै तेऊ सेटा अर तिन्‍नैं पजैल़अ तेऊ सेटा समाद, "तेरअ शोहरू आसा ज़िऊंदअ।" 52 तेऊ पुछ़अ तिन्‍नां का, "कहा घल़ी हुअ सह राम्बल़अ?"

तिन्‍नैं बोलअ, "हिझ़ दपहरा बाद बेठअ तेऊओ ज़अर।" 53 तेखअ हेरअ तेऊ समझ़ी कि अह हुअ तैहा ई घल़ी, ज़हा घल़ी ईशू बोलअ तेऊ लै, "तेरअ शोहरू आसा ज़िऊंदअ।" तेऊए घअरे सारै टबरै किअ ईशू दी विश्वास। 54 अह त ईशूओ दुजअ च़मत्कार ज़ुंण तेऊ यहूदा का एछी गलील पुजी किअ त।