1 सोभी का आजी आसा बैण,

सह बैण त परमेशरा संघै,

सह बैण ई त परमेशर,

2 अह ई बैण त सोभी का आजी परमेशरा संघै।

3 परमेशरै बणाईं सोभै गल्‍ला तेऊ करै,

इहअ निं किछ़ै आथी ज़ुंण तेऊ बाझ़ी बणअ।

4 सह आसा सोभी ज़िन्दगीओ मूल़,

तेऊए ज़िन्दगी करै हुअ सोभी लै प्रैश्शअ।

5 प्रैश्शअ च़मकअ न्हैरै दी,

न्हैरै च़ाहअ सह शेऊणअ पर सह निं तेऊ शेऊई सकअ।

6 परमेशरै छ़ाडअ एक मणछ तेऊ नाअं त जोहन्‍ना। 7 सह आअ संसारा लै लोगा का तेऊ प्रैश्शे बारै समादा खोज़दअ, ताकि सोभ ज़ण्हैं तेऊए गल्‍ला शूणीं विश्वास करे। 8 जोहन्‍ना नांईं त आप्पू प्रैश्शअ आथी, पर सह थिअ तेऊ प्रैश्शे बारै लोगा का खोज़दअ आअ द।

9 असली प्रैश्शअ ज़ुंण सोभी मणछा लै प्रैश्शअ दैई सका, सह थिअ संसारै एछणैं आल़अ।

10 सह आअ एऊ संसारै ज़ुंण तेऊ आप्पै आसा बणाअं द, पर एऊ संसारे मणछै निं सह बछ़ैणअ आथी। 11 सह आअ आपणैं देशै, पर ज़ुंण तेऊए आपणैं लोग तै तिन्‍नैं निं सह मनअ। 12 पर ज़ुंणी बी सह मनअ अर तेऊ दी विश्वास किअ, तिन्‍नां लै दैनअ तेऊ परमेशरे लुआद हणैंओ हक। 13 तिंयां निं संसारे रिती दी परमेशरे लुआद बणै ज़िहै संसारै मणछ बैह करी शोहरू लै ज़ल्म दैआ। पर तिन्‍नों बाब आसा परमेशर अर तेऊ दैनअ तिन्‍नां लै नऊंअ ज़ल्म।

14 तेऊ बैणै लई मणछे देही अर झींण अर सत्ता दी भर्हुई करै किअ हाम्हां जैंदरी बसेरअ, हाम्हैं भाल़अ तेऊओ इहअ प्रतप्प, ज़िहअ बाबे तेऊ शोहरूए प्रतप्प हआ ज़ुंण आपणैं बाबो कल्हअ शोहरू हआ।✝

15 जोहन्‍ना बी खोज़अ तेऊए बारै अर हाक्‍का लाई करै बोलअ इहअ, "अह आसा सह ई ज़सरै बारै मंऐं इहअ बोलअ त कि मुंह बाद एछणअ एक इहअ, ज़ुंण मुखा बडअ आसा अर ज़ुंण मुखा पैहलै थिअ।"

16 किल्हैकि तेऊए भरपूर झींण करनै करै भेटअ हाम्हां जशा प्रैंदै जश। 17 इहअ करै बधान, खोज़अ हाम्हां का परमेशरे गूर मोसा, पर जश अर सत्त रहैऊअ परमेशरै मसीहा ईशू करै। 18 परमेशर निं आझ़ तैणीं कोही भाल़अ, पर बाब परमेशरो कल्ही पूत ज़ुंण तेऊए भोसल़ै आसा, तेऊ किअ परमेशर हाम्हां लै प्रगट।

19 जोहन्‍ने शाजत आसा एही, ज़ांऊं यहूदी सैणैं, एरुशलेम नगरी का प्रोहत अर लेबी जोहन्‍ना सेटा लै इहअ पुछ़दै छ़ाडै, "तूह कुंण आसा?" 20 जोहन्‍ना निं ऐहा गल्‍ला लै हुधूअ, पर तेऊ मनी अह गल्‍ल संघा खोज़अ इहअ, "हुंह निं मसीहा आथी।"

21 तेखअ पुछ़अ तिन्‍नैं जोहन्‍ना का, "ज़ै तूह मसीहा निं आथी, तै तूह आसा कुंण? तै तूह परमेशरो गूर एलियाह आसा?"

जोहन्‍ना बोलअ, "हुंह निं आथी"

"तै कै तूह परमेशरो गूर आसा?"

जोहन्‍ना दैनअ तिन्‍नां लै ज़बाब, "हुंह निं इना मांझ़ै कोहै बी आथी।"

22 तेखअ पुछ़अ तिन्‍नैं जोहन्‍ना का, "तै तूह आसा कुंण? हाम्हां लागा तिन्‍नां लै ज़बाब दैणअ ज़ुंणी हाम्हैं छ़ाडै दै आसा कि तूह आपणैं बारै किज़ै बोला?"✝

23 तेखअ बोलअ जोहन्‍ना, "ज़िहअ परमेशरे गूर ईशायाह आसा बोलअ द,

‘हुंह आसा शुन्‍नैं रेगीस्तानै एकी हाक्‍का लाणैं आल़ैओ बोल,

प्रभू एछणें धैल़ी लै डाहा बाता शुंहीं-शोधी,

तेऊए सुआगत करना लै रहा सोभ तैर्हुई।’"

24 ईंयां तै फरीसी मणछा बाखा छ़ाडै दै। 25 तेखअ पुछ़अ तिन्‍नैं जोहन्‍ना का सुआल, "ज़ै तूह मसीहा बी नांईं आथी, नां तूह परमेशरो गूर एलियाह आथी, अर नां तूह परमेशरो गूर आथी, तै तूह लोगा लै डुबकी किल्है दैआ?"

26 जोहन्‍ना दैनअ तिन्‍नां लै ज़बाब, "हुंह, दैआ पाणीं दी डुबकी; पर तम्हां मांझ़ै आसा एक मणछ खल़अ ज़हा तम्हैं नांईं बछ़ैणदै। 27 मतलब ज़ुंण मुंह बाद एछणैं आल़अ आसा, सह आसा सोभी का महान अर इधी तैणीं कि हुंह निं तेऊ सेटा एता जोगी बी आथी कि हुंह तेऊए पोलल़ै खोल्हणैं च़ाकरी करनै आल़अ दास बणी सकूं।"

28 ईंयां गल्‍ला हुई जरदण नदी पार बेथनी नगरी दी, ज़िधी जोहन्‍ना लोगा लै डुबकी दैआ त।

29 दुजै धैल़ै भाल़अ जोहन्‍ना ईशू आप्पू बाखा एछदअ अर तेऊ बोलअ, "भाल़ा, अह आसा परमेशरो मिम्मूं, ज़ुंण एऊ संसारे सारै पाप दूर करा।✝

30 "अह आसा सह ई ज़सरै बारै मंऐं बोलअ त कि एक मणछ एछणअ मुंह पिछ़ू, ज़ुंण मुखा बडअ आसा किल्हैकि सह थिअ मुखा पैहलै। 31 मुंह ता निं तेऊए बछ़ैण आथी ती, तैही आअ हुंह पाणींए डुबकी दैंदी-दैंदी कि सह लोल़ी इज़राईले लोगा दी प्रगट हुअ।"

32 जोहन्‍ना दैनी अह शाजत, "मंऐं भाल़ी पबित्र आत्मां पालल़ी ज़ेही सरगा का होथदी अर सह बेठी ठीक ईशू प्रैंदै। 33 हुंह निं एऊ बछ़ैणदअ आथी त, पर ज़ुंणी हुंह पाणींए डुबकी दैंदअ छ़ाडअ, तेऊ परमेशरै खोज़अ मुखा इहअ कि ज़हा प्रैंदै तूह आत्मां होथदी अर बेशदी भाल़े, सह ई आसा पबित्र आत्मां करै डुबकी दैणैं आल़अ। 34 आझ़ भाल़अ मंऐं आपणीं आछी, अर आझ़ आसा हुंह ऐहा गल्‍लो शाजत कि अह ई आसा परमेशरो पूत।"✝

35 दुजै धैल़ै बी तै जोहन्‍ना अर तेऊए च़ेल्‍लै मांझ़ै दूई ज़ण्हैं खल़्हुऐ दै। 36 जोहन्‍ना बोलअ ईशू डेऊंदअ भाल़ी करै, "भाल़ा, अह आसा परमेशरो मिम्मूं।" 37 ऐहा गल्‍ला शूणीं लागै तिंयां जोहन्‍ने दूई च़ेल्‍लै ईशू पिछ़ू हांढदै।

38 ज़ांऊं ईशू तिंयां आप्पू पिछ़ू एछदै भाल़ै, सह लागअ तिन्‍नां का पुछ़दअ, "तम्हैं कहा लोल़ै आसा लागै दै?"

तेखअ बोलअ तिन्‍नैं ईशू लै, "हे गूरू, तूह किधी रहा?"

ईशू बोलअ, "च़ाल्‍ला हांढदै लागा, तम्हां का जाणअ आप्पै शुझुई।"

39 तेखअ भाल़ी तिन्‍नैं ईशूए रहणें ज़ैगा, अर तैहा धैल़ी रहै तिंयां तेऊ ई संघै, ईंयां गल्‍ला हुई दपहरा बाद उडै।

40 तिन्‍नां दूई मांझ़ै ज़ुंण जोहन्‍ने गल्‍ला शूणीं ईशू पिछ़ू आऐ, एक त शमौन पतरासो भाई आन्दरू। 41 तेऊ बोलअ आपणैं सकै भाई शमौना सेटा लै डेऊई, "हाम्हां गअ मसीहा भेटी।"✝

42 आन्दरू आणअ शमौन ईशू सेटा लै अर तेऊ भाल़ी बोलअ ईशू, "तूह आसा जोहन्‍नो शोहरू शमौन, ताल्है बोल़णअ कैफा मतलब ‘पतरास।’"

43 दुजै धैल़ै किअ ईशू गलील मुल्खा लै डेऊणेओ बच़ार, तिधी भेटअ तेऊ फलिप्प नाओं मणछ ईशू बोलअ तेऊ लै, "मुंह संघै च़ाल।" 44 फलिप्प, आन्दरू अर पतरास तै चिहै बैतसैदा नगरी का।

45 फलिप्पै बोलअ नतनेला सेटा डेऊई, "ज़सरै बारै परमेशरे गूर मोसा लिखै दै बधाना दी बोलअ, अर परमेशरे गूरै ज़ुंण आजू हणैं आल़ी गल्‍ला आसा खोज़ी दी, सह गअ हाम्हां भेटी, सह आसा युसुफो शोहरू नासरत नगरीओ ईशू।"✝

46 नतनेलै बोलअ तेऊ लै, "नासरत नगरी का कै कोई राम्बल़ी च़ीज़ बी निखल़ी सका?"

फलिप्पै बोलअ, "च़ाल्‍ल आप्पै भाल़।"

47 ईशू भाल़अ नतनेल आप्पू बाखा लै एछदअ संघा बोलअ, "भाल़ा, अह आसा असली इज़राईले खिंबा का। एऊ दी निं किछ़ै कपट आथी।"

48 नतनेलै बोलअ ईशू लै, "तंऐं किहअ करै बछ़ैणअ हुंह?"

ईशू दैनअ तेऊ लै ज़बाब, "फलिप्पै शादअ तूह बादा का, तेता का आजी हेरअ त मंऐं तूह फेडूए बूटा गोधै भाल़ी।"

49 तेखअ बोलअ नतनेलै, "हे गूरू, तूह ई आसा परमेशरो पूत अर तूह ई आसा इज़राईलो माहा राज़अ।"

50 ईशू बोलअ तेऊ लै, "मंऐं बोलअ, तूह भाल़अ मंऐं फेडूए बूटा गोधै, तै किअ तंऐं विश्वास? अह निं किछ़ बी आथी, ताह भाल़णैं एता का बडै-बडै काम।"✝

51 तेखअ बोलअ ईशू, "हुंह खोज़ा तम्हां का सत्त कि तम्हां भाल़णअ स्वर्ग खुल्हअ द अर परमेशरो स्वर्ग दूत हेरनअ तम्हां मुंह मणछे पूता लै उंधै एछदअ अर उझै डेऊंदअ।"✝