1 ज़ांऊं ईशू इना गल्‍ला करी मुक्‍कअ, तेऊ बोलअ उझै सरगा बाखा भाल़ी, "हे मेरै बाब परमेशर, सह घल़ी गई एछी, आपणैं पूतो प्रतप्प रहैऊ कि पूत बी तेरअ प्रतप्प रहैऊई सके। 2 किल्हैकि तंऐं दैनअ सोभी मणछो हक मुल्है ताकि ज़ुंण तंऐं मुल्है दैनै, तिन्‍नां लै हुंह सदा रहणैं आल़ी ज़िन्दगी दैई सके। 3 सदा रहणैं आल़ी ज़िन्दगी अह कि तिंयां ताह शुचै परमेशरा अर मसीहा ईशू ज़ुंण तंऐं छ़ाडअ द आसा तेऊ बछ़ैणीं सके।

4 "ज़ुंण काम तंऐं मुल्है करना लै दैनअ त, सह काम पूरअ करी रहैऊअ मंऐं पृथूई दी तेरअ प्रतप्प। 5 ऐबै ए मेरै बाब, तूह रहैऊ आप्पू संघै मेरअ प्रतप्प, तेऊ प्रतप्पा करै, ज़ुंण एऊ संसारा बणाणैं का आजी शुरू दी मेरी ताह संघै थिअ।

6 "ज़ुंण मणछ तंऐं एऊ संसारै मुल्है दैनै तै, तिन्‍नां दी हेरअ मंऐं तेरअ नाअं प्रगट करी। तिंयां थिऐ ताह संघै अर तंऐं दैनै तिंयां मुल्है, अर तिन्‍नैं हेरअ तेरअ बैण मनी। 7 ऐबै हेरअ तिन्‍नैं समझ़ी कि ज़ुंण किछ़ बी तंऐं मुल्है दैनअ, हुंह आसा तंऐं छ़ाडअ द। 8 किल्हैकि ज़ुंण गल्‍ला तंऐं मुखा पजैल़ी, मंऐं पजैल़ी तिंयां तिन्‍नां का अर तिन्‍नैं बी हेरी तिंयां गल्‍ला मनी अर अह सत्त बी हेरी ज़ाणीं कि हुंह आसा ताखा निखल़अ द, अर ऐहा गल्‍लो बी हेरअ विश्वास करी कि हुंह आसा तंऐं छ़ाडअ द।

9 "हुंह करा तिन्‍नां लै ताखा अरज़ अर संसारे होरी लोगा लै अरज़ निं हुंह आझ़ करदअ। पर हुंह करा तिन्‍नां लै ई अरज़ ज़ुंण तंऐं मुल्है आसा दैनै दै, किल्हैकि तिंयां आसा तेरै। 10 ज़ुंण बी मेरअ आसा, सह आसा सोभ तेरअ अर ज़ुंण तेरअ आसा सह आसा मेरअ। एता करै हुअ मेरअ प्रतप्प प्रगट। 11 आजू निं हुंह एऊ संसारै रहणअ पर ईंयां रहणैं एऊ ई संसारै। हुंह च़ाल्‍लअ ऐबै ताह सेटा एछी, ए मेरै बाब पबित्र परमेशर, आपणैं तेऊ नाओंआं करै ज़ुंण तंऐं मुल्है आसा दैनअ द, बच़ाऊ इना कि ईंयां बी हाम्हां ज़िहै एक हई सके। 12 ज़ेभै हुंह तिन्‍नां संघै त, तेभै बच़ाऊऐ तिंयां मंऐं तेरै नाओंआं करै ज़ुंण तंऐं मुल्है आसा दैनअ द, मंऐं किई तिन्‍नें हेर-सभाल़, अर एकी बनाशे शोहरू छ़ाडी निं होर कोहै बरैबाद हुअ, सह हुअ तै कि पबित्र शास्त्रा दी लिखअ द बैण पूरअ होए।*जोह. 18:9

13 "पर ऐबै च़ाल्‍लअ हुंह ताह सेटा एछी, अर इना गल्‍ला बोला हुंह संसारै कि मेरी खुशी लोल़ी तिन्‍नां आप्पू दी पूरी भेटी। 14 मंऐं हेरी तेरी गल्‍ला तिन्‍नां सेटा पजैल़ी अर संसारे होरी मणछै किई तिन्‍नां लै नफरत। किल्हैकि ज़िहअ हुंह एऊ संसारो नांईं आथी, तिहै ई निं तिंयां बी एऊ संसारे आथी। 15 ऐबै निं हुंह ताह सेटा एही अरज़ करदअ कि तूह च़क तिन्‍नां एऊ संसारा का। पर हुंह करा एही अरज़ कि तिन्‍नां डाहे तेऊ कदुष्ट राख्सा का बच़ाऊई।

16 "ज़िहअ हुंह एऊ संसारो नांईं आथी, तिहै ई निं तिंयां बी एऊ संसारे आथी 17 तेरै बैण आसा शुचै, तिन्‍नां कर सत्ता करै आप्पू लै ज़ुदै। 18 ज़िहअ, तंऐं हुंह संसारा लै छ़ाडअ, तिहै ई छ़ाडै मंऐं तिंयां संसारे मणछा सेटा। 19 तिन्‍नां लै करा हुंह आप्पू पबित्र बल़ीदान ताकि तिंयां बी सत्ता करै पबित्र होए।

20 "हुंह निं सिधी इना मेरै च़ेल्‍लै लै ताह सेटा अरज़ करदअ। पर हुंह करा तिन्‍नां लै बी अरज़ ज़ुंण इने गल्‍ला शूणीं मुंह दी विश्वास करे। 21 तिंयां सोभ लोल़ी एक हुऐ। ज़िहअ हुंह ताह दी आसा, तिहै ई लोल़ी तिंयां हाम्हां दी हुऐ, एते तैणीं कि एऊ संसारे मणछ विश्वास करे कि तंऐं आसा हुंह छ़ाडअ द।

22 "सह प्रतप्प ज़ुंण तंऐं मुल्है आसा दैनअ द, सह आसा दैनअ द मंऐं तिन्‍नां लै कि तिंयां लोल़ी तिहै एक हुऐ ज़िहै हाम्हैं एक आसा। 23 हुंह तिन्‍नां दी अर तूह मुंह दी ताकि तिंयां सिध्द हई एक हई सके अर ऐहा गल्‍लो संसारा का थोघ लागे कि तंऐं आसा हुंह छ़ाडअ द। ज़ेही झ़ूरी तंऐं मुल्है किई तेही किई तंऐं तिन्‍नां लै बी। 24 ए मेरै बाब, हुंह च़ाहा इहअ कि ज़ुंण तंऐं मुल्है आसा दैनै दै, तिंयां लोल़ी मुंह आप्पू संघा तिधी हुऐ ज़हा ज़ैगा हुंह आसा। ताकि तिंयां तेऊ प्रतप्पा भाल़े ज़ुंण तंऐं मुल्है दैनअ। किल्हैकि तूह झ़ूरा मुल्है एऊ संसारा बणाणैं का आजी ओर्ही।*जोह. 14:3

25 "हे धर्मीं बाब, संसारे होरी मणछै निं हुंह बछ़ैणीं, पर हुंह बछ़ैणा ताह अर इनै बी हेरअ बछ़ैणीं कि हुंह आसा तंऐं छ़ाडअ द। 26 मंऐं खोज़अ तेरअ नाअं तिन्‍नां का अर आजू बी रहणअ मुंह खोज़दै लागी कि ज़ुंण झ़ूरी ताह मुंह संघै ती, सह तिन्‍नां दी रहे अर हुंह बी रहे तिन्‍नां दी।"