Conversão

19 Su, mleki vidoda vyamtenditi, mumuwuyiri Mlungu gwenu su yomberi kafuti vidoda vyenu.

38 Peteru kankula, "Mtubu na kila yumu gwenu kabatizwi kwa litawu lya Yesu Kristu su mpati kuwusiya vidoda vyenu na kwanga kwayidi kwa Rohu Mnanagala.

30 Mlungu katenda gambira kawona ndiri vipindi vilii wantu pawaweriti wangalimahala. Kumbiti vinu, kahimiziya wantu woseri kila pahali waleki vidoda vyawatenda.

17 Kwanjira shaka shilii Yesu kanjiti kubwera pakalonga, "Mleki vidoda, toziya Ufalumi wa kumpindi wapakwegera!"

8 Mlanguziyi kwa vitendu handa mleka vidoda.

15 pakalonga, "Shaka shiza! Ufalumi wa Mlungu wapakwegera. Mleki vidoda vyamtenda na mushijimiri Shisoweru Shiwagira!"

7 Ndo ntambu ira ayi, nukugambirani haiweri nemeru nentu kumpindi kwa yakatenda vidoda yumu pakaleka vidoda vyakatenditi kuliku wantu malongu tisa na tisa yawamfiriziya Mlungu, ndoweni yawalihola wahera vidoda vyakuleka.

10 Nankuwagambira nakaka ndo hera hangu, wantumintumi wa kumpindi kwa Mlungu hawanemeleri toziya ya muntu yumu yakatenda vidoda pakaleka vidoda vyakatenditi."

32 Niza ndiri kuwashema wantu waheri, kumbiti niza kuwashema wantu yawawera na vidoda waleki vidoda vyawatenda."

9 Mtuwa kakawa ndiri kugatenda galii gakalagiliti gambira wantu wamonga ntambu yawalihola kuwera hakakawi. Yomberi kahepelera toziya ya mwenga, toziya kafira ndiri ata yumu gwenu kagamiri, kumbiti kawakwega woseri wapati kuleka vidoda vyawatenda.

Mtuwa Mlungu kankuwashema wantu woyi vidoda

12 "Mtuwa Mlungu kalonga hangu, muwuyiri neni kwa moyu gwenu gwoseri

kwa kwoya kuliya, kulira na kudaya."

13 Nampapula nguwu zyenu hera,

kumbiti mpapuli myoyu yenu viraa.

Mumuwuyiri Mtuwa Mlungu, Mlungu gwenu,

toziya mweni kamema manemu pamuhera na lusungu,

yomberi kakalala ndiri kalongola, mweni kamema ufiru,

mashaka goseri kakala kulegeziya na hapeni kazibu.

14 handa wantu waneni yawashemwa kwa litawu lyangu pawalinanagaziya na pawaluwa na pawansakula na kuleka njila zawu zidoda, su, neni haniwapikanili kulawa kumpindi, haniwalekezi vidoda zawu na kuyinemeziya isi yawu.

Hezekia kankutenda matandiru ga pasaka

1 Mfalumi Hezekia kawajegeriti ulagilagi wantu woseri wa Israeli na Yuda na viraa kawalembela luhamba wenikaya wa Efraimu na manase, pakawashemera woseri wizi Munumba Nkulu ya Mtuwa Mlungu yayiwera Yerusalemu, su kutenda msambu lishaka lya pasaka kwa ligoya lyakuyi Mtuwa Mlungu, Mlungu gwa Israeli. 2 Mfalumi na watanga wakuyi na wantu yawajojonikiti Yerusalemu walijimirana kutenda msambu agu gwa Pasaka mumwezi gwa pili, 3 msambu gutendikitindiri kwa shaka shakuyi, toziya walanga ya Watambika wavuwa waweriti wenilipungi na wantu waweriti hawenilijojoniri aku Yerusalemu. 4 Mpangu agu gumfiriziyiti mfalumi pamuhera na wantu woseri yawaweriti walijojonira. 5 Hangu wamuwiti kubwera koseri muisi ya Israeli, kulawa Beeri Sheba mpaka Dani, handa wantu wizi Yerusalemu kutenda msambu gwa pasaka gwa Mtuwa Mlungu, Mlungu gwa Israeli. Pasaka gambira ayi yenenemelerwi na wantu wavuwa handa awa kulawirana na ntambu yayilembitwi. 6 Kwa lagiru ya mfalumi, watanga wakuyi na wantumintumi wakuyi wajegiti luhamba koseri kuisi ya Israeli na Yuda. Luhamba alu luweriti na ulagilagi awu.

"Mwenga wantu wa Israeli yamponikiti pa makomangu ga wafalumi wa Ashuru. Mmuwuyili Mtuwa Mlungu, Mlungu gwa Abrahamu, Isaka na Israeli, su na yomberi kapati kuwawuyira. 7 Namwera handa wambuyi wenu na walongu wenu weni wawerandiri waaminika kwa Mtuwa Mlungu, Mlungu gwa wambuyi wawu, mweni kawakomangiti ntambu yamuwona. 8 Namuwela namtiti handa wambuyi wenu, ila mumujimiri Mtuwa Mlungu. Mwizi Munumba Nkulu yakuyi mweni kayipunga mashaka goseri, mumumguwiri Mtuwa Mlungu, Mlungu gwenu, su nakawakalalira. 9 Handa pamumuyira Mtuwa Mlungu, walongu weni yawalopolitwi na wana wenu, hawawonerwi lusungu na kuwaleka wawuyi muisi ayi. Toziya Mtuwa Mlungu, Mlungu gwenu, ndo yakalekiziya na kana lusungu na yomberi hakawanki payiwera hamumuwuyiri."

10 Su, Walagilagi awa wagenditi kulawa mji gumu mpaka gumonga koseri muisi ya Efraimu na Manase, Wasokiti ata Zabuloni, kumbiti wantu wawasekiti na kuwajongera. 11 Ata hangu, wantu wadidini muwamu mwa makabila ga Asheri, Manasi na Zabuloni, walinanagaziya wiza Yerusalemu. 12 Makakala ga Mlungu gaweliti gatenditi lihengu mu Yuda, kawatenditi wajimili litakulu lya mfalumi na watanga wakuyi ntambu ya malagalira ga Mtuwa Mlungu.

Msambu gwa Pasaka gwankutendeka

13 Wantu wavuwa nentu walijojonira aku Yerusalemu mumwezi gwa pili, kutenda msambu gwa mabumunda yagalekerwandiri simika. 14 Wanjiti lihengu, waviwusiya vitalawanda vyoseri yaviweriti Yerusalemu na zimonga zoseri yazitenderitwi kutumuziya ubani, wapapa na kuziyasa kululalanda lwa Kidironi. 15 Shaka sha lilongu na msheshi lya mwezi agu wamlikitula mwanakondolu gwa pasaka. Watambika na Walawi yawalipungitindiri wawoniti soni,su walipungiti na kujega tambiku za kulunguziya tolosu Munumba Nkulu ya Mtuwa Mlungu. 16 Watoriti mpenu zawu Munumba Nkulu kulinganira na malagalira yagaweriti lagira za Musa, muntu gwa Mlungu. Walawi wawapananiti watambika mwazi gwa tambiku na womberi wayimishira mushitalawanda. 17 Toziya wavuwa yawajojonikiti panu wawerandiri walipunga, Walawi wafiritwi kuwalikitula wakondowu wa Pasaka na kuwalaviya kulongolu kwa Mtuwa Mlungu kwajili yawu. 18 Tembera wantu, wavuwa ya walii yawalawa Efraimu na Manasena Isakari na Zabuloni, waweriti walipungandiri, ata hangu waliiti pasaka kumbeli na malagaliru. Kumbiti mfalumi Hezekia kawaluwira pakalonga, "Mtuwa Mlungu yaguwera mnanagala, gumlekeziyi kila yumu, 19 yakakuluwa kwa moyu gwakuyi goseri gwee Mtuwa Mlungu, Mlungu gwa wambuyi wakuyi, hata handa yomberi kaherepandiri kulinganira na lagiru ya Numba Nkulu ya Mlungu." 20 Mtuwa Mlungu kajimila luwa ya Hezekia, kawalekeziya wantu hawa. 21 Waisraeli woseri yawaweriti walijojonira mumji gwa Yerusalemu watenditi msambu gwa mabumunda ya yagalekerwandiri simika mushaka sha saba, pawawera na nemeleru nkulu. Walawi na Watambika wamkwisiti Mtuwa Mlungu mashaka goseri, wamwimbiriti kwa makakala gawu goseri. 22 Mfalumi Hezekia kawakwisa na kuwatula mumoyu watambika kwa kuwera watenda guwira kwa umani uvuwa.

Msambu gwa pili gwa pasaka

pa kupera shaka sha saba sha mashaka geni wantu waliyiti na walaviya litambiku za ponga na kumguwira Mtuwa Mlungu, Mlungu gwa wambuyi wawu,

23 Lijojoniru lyoseri lijimiriti kwendeleya na msambu gwa shaka sha mashaka saba. 24 Mfalumi Hezekia gwa Yuda kawapananiti wantu yawajojonilwa jumla ya wang’ombi shipalu elufu yimu na kondolu elufu saba ntambu iraayi na wakulu wawapananiti wang’ombi shipalu elufu yimu na wakondolu elufu lilongu. Walanga nkulu ya watambika walipunga. 25 Kila muntu yakajojonikiti kasekeleliti nentu. Wantu woseri wa Yuda na watambika na walawi na walii kulawa Israeli yawiziti na wahenga yawalikala mu Israeli na Yuda, woseri wasekeleriti nentu. 26 Kuweriti na nemeleru nkulu Yerusalemu, toziya kwanjira makashu ga mfalumi Selemani mwana gwa Dawudi, mfalumi gwa Israeli, shintu handa ashi hashenilawiri aku Yerusalemu. 27 Shakapanu, watambika na walawi wawaluwila wantu ntekelera zakuyi Mtuwa Mlungu, nayomberi kulawa kumpindi kagapikanira maluwa gawu na kagajimila.

19 Neni numkalipira na kumwazibu yoseri yanumfira. Hangu gulanguziyi nfiru yaku yoseri na kuleka vidoda vyagutenda.

Makaliru ga makashu na makaliru ga syayi

5 Hangu mshilagi kila shintu shikondola shashiwera mngati mwenu, uhumba na uhakata na lumatamata ludoda na shamata na maholu madoda aga galifana na kuguwira shinyagu.

13 Namlaviya ata pahala pamu pa nshimba zyenu ziweri shintu sha kutendera madoda na vidoda, kumbiti mulilaviyi maweni kwa Mlungu gambira wantu woseri yawazyukusiwitwi na mulaviyi umuntu wenu kwa Mlungu kwa kutenda matendu gagamfiriziya Mlungu.

Kutenda viheri kwa wantu woseri

1 Walongu wangu, handa pamumwona muntu yoseri kagomiziwa na shidoda shoseri, su mwenga yamuwera wa shirohu mumwuziyi muntu ayu kwa rohu ya upoli pamulilola weri maweni su namujerwa viraa.

21 Hangu, muleki kutali vitwatira vyoseri vidoda na matendu madoda gavuwa gageneya, mumjimiri Mlungu na kwanka shisoweru shashiyalitwi mumyoyu mwenu, na shiweza kuwalopoziya.