1 Hangu Selemani, mwana mpalu gwa mfalumi Dawudi, kaligangamaziyiti muufalumi wakuyi na toziya Mtuwa Mlungu, Mlungu gwakuyi, kaweriti pamuhera nayomberi, kamtekelera na kumtenda kaweri makulu nentu.

2 Mfalumi Selemani kawashemiti Waisraeli woseri na wakulu wa mashonta woseri wa vipinga vya maelufu na vya mamiya na watoza na wakulu woseri wa Israeli na wakulu wa kaya. 3 Su Selemani kawalagalira kagendi pamuhera nawa mpaka pahala pa kutambikira aku Gibeoni. Kagenditi nawa kulii toziya panu ndo pahala paliweriti liringu linanagala lyakalinyawiti Musa ntumintumi gwa Mtuwa Mlungu kushiwala aku. 4 Mfalumi Dawudi kaweriti kala kalijega Lisadiku lya lipatanu lya Mlungu kulawa Kiriyati Yearimu mpaka kuliringu lyakanyawiti aku Yerusalemu. 5 Ntambu iraa shitalawanda sha shaba shashinyawitwi na Bazaleli, mwana gwa Uri na mzukulu gwa Huri, viraa shiweriti aku Gibeoni kulongolu Kuliringu Linanagara lya Mtuwa Mlungu. Palii mfalumi Selemani na wantu woseri wamluwa Mtuwa Mlungu. 6 Selemani kakweniti pahala pampindi papaweriti shitalawanda sha shaba shashiweriti palongolu Paliringu Linanagala na kalaviyiti tambiku elufu yimu za kulunguziwa pampindi pa shitalawanda ashi.

7 Pashiru panu, Mlungu kamlawiriti Selemani na kumgambira, "Gunduwi shoseri shagufira, naneni hanikupanani."

8 Selemani kamgambira Mlungu, "Gumtendiriti tati gwangu Dawudi ufiru mkulu na guntenda kuwera mfalumi pahala pakuyi. 9 Vinu, gwee Mtuwa Mlungu, gutendi lipatanu lyaku lyagutakuliti kwa Dawudi tati gwangu. Toziya gunumika weri mfalumi kwa wantu awa yawawera wavuwa yawawalangikandiri gambira madikudiku. 10 Hangu, nikuluwa gumpanani luhala na umani su wezi kuwalonguziya wantu waku weri, hangu ndo gaa yakaweza kuwalonguziya wantu waku yawawera wavuwa hangu?"

11 Mlungu kamwankula Selemani, "Toziya mlandu agu gwaguluwiti gulawa mmoyu mwaku nagwenga gunduwandiri lunda na vintu vitangala na ligoya, pota kuluwa wankondu walaguwi, pota kuluwa gulikali mashaka mavuwa, kumbiti guluwa luhala na umani su kuwalonguzi weri wantu waneni yanikupanani guweri mfalumi gwawu, 12 hanikupanani luhala na umani. Viraa, hanikupanani ulunda na vintu vitangala na ligoya nentu kuliku mfalumi yumonga yoseri yakaweriti pamberi pa gwenga na yanakaweri mfalumi pagwenga."

13 Su, Selemani kawukiti pahala panu pa kuguwira, aku Gibeoni, paliweliti na Liringu Linanagala na kawuya Yerusalemu kulii kawakolamlima Israeli. 14 Selemani kajojoniriti mbutuka za kukwegwa na farasi elufu yimu na miya msheshi na farasi elufu lilongu na mbili, weni kawatuliti mumiji yana vituwu vya mbutuka za kukwegwa na farasi na zimonga kazituliti aku Yerusalemu. 15 Mfalumi Selemani kongeriti feza na zahabu ziweriti zivuwa gambira mabuwi kumji gwa Yerusalemu na mbawu za mitera ya miyelezi iweriti ivuwa gambira mikuyu pasi pavigongu pa Yudea. 16 Farasi wa Selemani walawiti Misri na kilikia, watenda ushuwuzi wakuyi wawahemeriti kulawa aku. 17 Wahemeriti mbutuka yimu ya kukwega na farasi kulawa Misri handa kilu saba za feza na kila farasi yumu handa kilu mbili za feza. Viraavirii wawawuziti farasi awa na mbutuka zakuyi kwa wafalumi wa Hiti na Sria.