1 Mushinja sha selasini na sita sha ukolamlima wa mfalumi Asa, Baasha, mfalumi gwa Israeli, kayikomangiti isi ya Yuda na kwanja kulinyawa liboma kuguzyengeta mji gwa Rama su muntu yoseri nakaweza kulawa pota kwingira muisi ya Asa mfalumi gwa Yuda. 2 Su mfalumi Asa katola feza na zahabu kulawa luhanja lya numba ya Mtuwa Mlungu na kuliboma, kazijega Damasiku kwa mfalumi Beni Hadadi gwa isi ya Aramu, kalonga, 3 "Tutendi mapatanu ga kuwera pamuhera pakati pangu na gwenga ntambu yakatenditi tati gwangu na tati gwaku. Guloli kakujegera feza na zahabu na lipatanu lyagulituliti gwenga na mfalumi Baasha gwa Israeli lisoki paupeleru na yomberi kawusiya lishonta lyakuyi kwaneni."

4 Panu mfalumi Beni Hadadi kajimiliti shakalongiti mfalumi Asa, kawatumiti wakulu wa mashonta wakuyi kuyikomanga miji ya Israeli. Naweni wayilopoliti miji ya Iyoni na Dani, Abeli Maimu na miji yoseri ya Nafutali yayiweriti na luhanja lwa viboga. 5 Mfalumi Baasha pakapatiti visoweru vya makomangu aga, kalekiti kugunyawa mji gwa Rama, kalekiti lihengu ali. 6 Shakapanu mfalumi Asa kawalagaliriti wantu woseri wa Yuda, wahamisiyiti mabuwi na mbawu kulawa Rama, vintu vyeni Baasha kavitenderiti kunyawira. Shakapanu Asa katendera vintu avi kunyawira liboma kumji gwa Geba na liboma kumji gwa Mizipa.

7 Shaka ashi, mbuyi Hanani kamgenderiti mfalumi Asa gwa Yuda, kamgambira, "Toziya gumtumbiriti mfalumi gwa Shamu na guleka kumtumbira Mtuwa Mlungu, Mlungu gwaku, lishonta lya mfalumi gwa Sria likupota kulawa kumawoku mwaku. 8 Hashi, gulyaruwa shashilawiliti kwa Wakushi na Walibiya waweritindiri lishonta lyanalikakala na mbutuka na wakwenafarasi? Hata hangu pagumtumbiriti Mtuwa Mlungu, yomberi kakutangiti kuwakomanga. 9 Mtuwa Mlungu kapaloleriti weri pasipanu poseli, su kuwapanana makakala walii yawawera waminika kwakuyi. Gwenga gutenda mlandu gwa shingari mahala, hangu kwanjira vinu na kwendeleya haguweri na nkondu." 10 Visoweru avi vimtenditi Asa kamkalaliriti nentu mlola Hanani, ata kamtatira mligereza. Mushaka shiraashi, Asa kanjiti kuwatabisiya nentu wamu wa wantu.

11 Mirandu yakatenditi Asa, kulawa lyanjiru mpaka uperelu, galembitwi mushitabu sha Wafalumi wa Yuda na Israeli. 12 Mushinja sha selasini na tisa sha ufalumi wakuyi, Asa kaweriti na ulweli wa magulu, kalwaliti nentu. Kumbiti ata shaka ashi, Asa kamuwuyirandiri Mtuwa Mlungu kamtangi, kumbiti kalisakulira utanga kulawa kwa waganga. 13 Upeleru Asa kahowiti mushinja sha arobayini na yimu sha ukolamlima wakuyi. 14 Kafintiritwi mulisembi lyakaweriti kalibawiriti mweni mulitalawu, aku mumji gwa Dawudi. Wamgonjekiti mungati mwa lijeneza lyaliweliti wamemiziya uturi wa kila ntambu, shakapanu wapambiti motu mkulu nentu toziya ya kumdayilira.